2 Corintoyguakuérape 4 - Biblia en Guaraní - ?anderuete ?e’? Por? 2015

Páblo ha iñirũnguéra jehasa asy

1Ore romba’apo kyre’ỹme ko tembiapo kóvape, Ñanderuete oremombarete ha oreporiahuverekógui.

2Ore ropoíma umi mba’e ñemi vai oremotĩkuaávagui, ore ndoroikói tova mokõi reheve, ore norombojehe’ái Ñanderuete ñe’ẽ ambue mba’e reheve, romyasãi hekopete ha añetehápe uvei iñe’ẽ opaite kuimba’ekuéra ha kuñakuéra py’apyñe’ẽme g̃uarã (conciéncia) Ñanderuete renondépe.

3Ñanderuete ñe’ẽ porãite (evangélio) ojejaho’i ramo gueteri, upéicharõ ojejaho’i umi oñehundívape g̃uarãnte.

4Ha péva ojehu ko yvy jára (Satana) omohesatũgui ipensamientokuéra, ani hag̃ua ohecha pe tesape oúva Hesu Crísto reko jajaipa ha iñe’ẽ porãitégui, Hesu Crísto ningo Ñanderuete ra’ãnga voi.

5Ore noroñemoherakuãi, romyasãi uvei Ñandejára Hesu Crístopente, ore voi pene rembiguái Hesu Crísto rehehápe.

6Ñanderuete he’i voi ikuatiañe’ẽme: Pytũhágui tohesape pe tesape, (Génesis 1,3). Ha’e voi ohesape avei ñande py’apy jahechakuaa hag̃ua Ñanderuete reko jajaipa Hesu Crísto rova rupi.

Páblo oha’ãrõitéma pe tekove pyahu Ñanderuete rupi

7Roguereko ningo ko mba’erepyete, peteĩ mba’yru yvyguiguápe, rohechauka hag̃ua pe pu’aka oremombaretéva ndaha’eiha kuimba’e pu’akágui, Ñanderuete pu’akágui uvei.

8Upéicha ojehu, rojejopy vai ramojepe opaite mba’épe ndoropoíri ore jeroviágui ha orepy’angata ramojepe, ndaorepy’aropúi.

9Heta oñemoĩ ramojepe orerehe Ñanderuete ndaorerejái ore año, ambuekuéra orereity ramojepe, ndaikatúi orehundieté hikuái.

10Ore rogueraharoína Hesu Crísto ñemano ore rete rehe, ojehecha hag̃ua avei ore rete rehe Hesu Crísto rekove.

11Ore roikovéva ningo roñeme’ẽ rojejuka hag̃uáicha Hesu Crísto rehehápe, Hesu Crísto rekove ojehechauka hag̃ua avei ore rete omanova’erãva rupi.

12Upéicha ningo pe ñemano omba’apo orepype, ha pe tekove omba’apo pendepype.

13Roguerekógui pe Pytu Porãmbáva orembojeroviáva Hesu Crísto rehe, ore romoherakuã iñe’ẽ; Ñanderuete kuatiañe’ẽme he’i voi: Che ajeroviágui che añe’ẽ avei, (Salmokuéra 116,10).

14Ore roikuaa porã Ñanderuete omoingove jevyva’ekuégui Hesu Crístope, ñanemoingove jevyva’erã avei Hesu Crísto rehehápe ha ñanemoĩva’erã Hesu Crísto ñembojovake guapyha renondépe.

15Opaite ko’ã mba’e ojehu ore rekovépe penderehehápe, ojehechauka porãve hag̃ua Ñanderuete ipy’a porãha avei oñemboheta hetave hag̃ua umi ojeroviáva Hesu Crísto rehe, omomba’eguasuve hag̃ua hikuái Ñanderuetépe.

16Upévare ningo ndaorepy’akangýi, omano ramojepe ohóvo ore kuimba’e oka peguáva, ore kuimba’e pypeguáva katu oñembopyahuve ohóvo ko’ẽ ko’ẽ rehe.

17Umi mba’e ore rohasavaroína ivevúi, rohasa asy ramojepe, roikuaágui uperire roguerekotaha hetave teko mimbipa ha vy’a añeteguáva.

18Ore noroma’ẽi umi mba’e ojehecháva rehe, umi ojehecha’ỹva rehe uvei; umi mba’e ojehecháva ndahi’aréi, umi mba’e ojehecha’ỹva katu oikotahína tapia g̃uarã.