Provérbios 30 - Biblia en Guaraní - ?anderuete ?e’? Por? 2015

Agur ñe’ẽnguéra

1Ko’ã ñe’ẽ ko’ãva Agur, Jaque ra’y, Mása pegua he’iva’ekue Itiel ha Ucálpe: Che añeha’ãmba ahávo ha chekangyetereíma,

2añetehápe chetavy, tymbáicha, ha ndaikuaái che rapichakuéra oikuaáva,

3che ndaikuaái jepe pe arandu, ha ndaikuaái Ñanderuete rehe ojeroviáva akãguapy,

4mávapa ojupi yvágape ha oguejy jevy, mávapa omboty ipo pytépe pe yvytu, mávapa ojokua ijahojápe pe yguasu, mávapa omoĩ yvy rembe’y, mba’éichapa héra, ha ita’ýra réra, reikuaa piko.

5Ñanderuete he’íva guive katuete oikova’erã avei, Ha’e ningo umi hese ojeroviáva mo’ãha.

6Ani rembojo’ave mba’eve iñe’ẽ ári, ani hag̃ua Ha’e ndeja’o, ha reiko ijapúva ramo.

7Mokõi mba’énte ajerure ndéve che Ruete; aníkena reñembotove chehegui amano mboyve.

8Tova mokõi ha japu reko emboyke chehegui; ani chemomboriahu ni chembopirapire heta, eme’ẽmínte chéve aikotevẽ haichamínte.

9Anítei ág̃a cheryg̃uatãvo, rombotove, ha ha’e: Máva piko Ñanderuete; térã chemboriahúgui, amonda, ha añe’ẽvai che Jára réra rehe.

10Ani remotĩ pe tembiguáipe ijára renondépe, ani hag̃ua nemaldeci ha rejehavira.

11Oĩ tapicha omaldecíva itúvape ha ndohovasáiva isýpe.

12Oĩ tapicha oimo’ãva ipotĩha, noñemopotĩrira’e katu heko ky’águi.

13Oĩ tapicha hesa oñembotuicháva ha oporoapo’ikuaáva.

14Oĩ tapicha hãinguéra ha’etéva kyse puku ha ijuru kyséicha, omokõ hag̃ua mboriahukuéra ha ohasa asyetévape hetãyguakuéra apytépe.

15Pe ysope imemby mokõi ha tapia he’i: Eme’ẽ chéve, eme’ẽ chéve, eme’ẽ chéve. Mbohapy mba’e oĩ araka’eve nahyg̃uatãiva, ha pe irundyha ningo araka’eve nde’íri, iporãma (ovaléma):

16Pe omanomava’ekue retã, pe membyryru ndaikatúiva imemby, pe yvy nahyg̃uatãiva ýgui, ha pe tata, ko’ãva araka’eve nde’imo’ãi: ovaléma.

17Pe tesa oñembohorýva itúvare ha omboykéva isy rekombo’e, umi yryvu tohesa’o ha ñapykani ra’ykuéra to’u ichupe.

18Mbohapy mba’e naentendéi; ha pe irundyha nahesakãi chéve:

19Pe ñapykani rape árare, pe mbói rape itaguasu ári, pe barcoguasu rape yguasu mbytére, ha pe kuimba’e rape kuñataĩ ndive.

20Peichahína pe kuña ombotavýva iménape. Okaru rire, omopotĩ ijuru ha he’i: Ndajapói mba’eve ivaíva.

21Mbohapy mba’e rehe oryrýi pe yvy, ha pe irundyha rehe ndaipu’akakuaái:

22Pe tembiguáigui oiko ramo tetã ruvicha, pe ivýrovape hembypárõ hembi’urã,

23pe kuña ojehayhu’ỹva (kuña reko vaíva) omenda ramo, ha pe tembiguái kuñáva opyta ramo ijára rendaguépe.

24Irundy mymba imichĩ ramojepe iñarandueteve ichugui:

25Umi tahýi, tetã imbarete’ỹva, arahakúpe jepe ombyaty hembi’urã;

26umi mymba ojoguáva tapitípe, peteĩ tetã ikangýva, hóga apo katu itakuápe;

27umi tuku, naimburuvichái ramojepe, osẽ joaite aty atýpe ho’upa hag̃ua;

28pe teju’i nde pópe rejapyhýva, ha oiko pe tetã ruvicha rogaguasúpe.

29Mbohapy mymba oguata porãite, ha pe irundyha katu oguata heko ñembo’y porãme:

30Pe leõ imbaretevéva mymbakuéra apytépe, mba’evégui ndoguevíri;

31pe kavaju ojeku’akuáva; pe kavara mácho; ha pe tetã ruvicha omoakãva iñorãirõhára atyguasu.

32Reñemotĩse ramo eñembotuichave, nde nearanduse ramo emboty nde juru nde pópe.

33Añetehápe pe kamby kyrakue (créma de léche), reipyvu puku ramo osẽta ñandy (mantéca) ha pe oñambyvo hatãitereíva itĩ huguyva’erã; ha ojejopyete ramo ipochývape oñorãirõta katuete avei.