Ésdras 6 - Biblia en Guaraní - ?anderuete ?e’? Por? 2015

1Upémaramo tetã ruvicha Darío ohekauka pe kuatiañe’ẽ pe óga oñeñongatuhápe imba’erepyeta.

2Ha pe táva Acmetápe, pe mburuvicha rogaguasu opytáva Média retãme, ojejohu peteĩ kuatiañe’ẽ ojehaíva péicha:

3Tetã ruvicha Círo ojupiha áñope, Babilónia retã ruvicha ramo, he’iuka Ñanderuete rogaguasu oĩva’ekue Jerusalénpe oñemopu’ã jevyva’erãha, oñekuave’ẽ hag̃ua upépe kuave’ẽmby ojehapypáva, ha pe ogaguasu tapiakuéra ijyvateva’erã 26 métro, ha 26 métro ipeva’erã.

4Pemopu’ã mbohapy hysýi ojo’ári ita tuichávagui ha peteĩ hysýi yvyra pyahúgui, ha hepy tojepaga tetã ruvicha pirapirégui.

5Ha umi tembiporukuéra óro ha plataguiguáva Nabucodonosor oguenohẽva’ekue Ñanderuete rogaguasúgui ha ojeguerahapava’ekue Babilóniape, toñeme’ẽmba ha tojeguerahapa jevy hendaguépe, Israel Jára rogaguasúpe, ha toñemoĩ Israel Jaratee rógape, oĩva’ekue Jerusalénpe.

6Ha ko’ág̃a peẽ Tatnai, tetã sãmbyhyhára, Setar-Boznai ha peẽ pemoirũva tetã sãmbyhyhárape ysyry mboypýri, peñemomombyry Israel Jára róga rembiapógui.

7Peheja tojejapo Ijára rogaguasu; ha Juda retã sãmbyhyhára ha imburuvichakuéra tomopu’ã jevy Ijára rogaguasu oĩ haguépe.

8Ha che voi ha’éma ojepagava’erãha umi Judayguápe, omyakãva Israel Jára rogaguasu ñemopu’ã, Pérsia retã ruvicha mba’erepyetágui ha impuéstogui oñembyatyvahína ysyry Éufrates mboypýrigui, ha toñeme’ẽ hekoitépe umi Judayguápe omyakãva pe Israel Jára rogaguasu ñemopu’ã, ani hag̃ua hi’arete rei.

9Ha toñeme’ẽ tóro ra’yrusukuéra, ovecha machokuéra ha ovecha ra’yrusukuéra kuave’ẽmby ojehapypátavarõ Ñanderuete yvagayguápe g̃uarã, trígo, juky, víno ha acéite reheve, umi pa’ikuéra Jerusalénpe oikóva he’i háicha ha oñekotevẽ háicha, ko’ẽ ko’ẽ rehe ojejoko’ỹre mba’eve ichuguikuéra,

10ombovy’a hag̃ua yvága Járape, ha oñembo’e hag̃ua hikuái tetã ruvicha ha ita’yrakuéra rekove rehe.

11Ha che voi ha’euka avei oimeraẽva omoambuéva ko tembiapoukapy kóva, tojepe’a peteĩ yvyra hógagui ha toñemosãingo ichupe pévare ha upéi tombotapere hóga.

12Ha yvága Jára voi oiporavomava’ekue Jerusalen oiko hag̃ua upépe, ha tohundi umi mburuvicha térã tetã omopu’ãva ipo omoambue térã ombyai hag̃ua Ñanderuete rogaguasu, oĩva Jerusalénpe. Che, Darío, Pérsia retã ruvicha, amoĩ ko tembiapoukapy pya’ete ojejapopa hag̃ua.

13Upémaramo Tatnai, ysyry Éufrates mboypyrigua tetã sãmbyhyhára, ha Setar-boznai ha iñirũnguéra ojapopa hekoitépe tetã ruvichaguasu Darío he’iva’ekue guive ichupekuéra.

14Upéicha, umi Judaygua omopu’ã joa Ñanderuete rogaguasu ha osẽ porãmba ichupekuéra, umi proféta Hagéo ha Zacarías, Iddo ra’y, he’i haguéicha. Ha omopu’ã ha ojapopa hikuái, Israel Jára oipota háicha, ha Círo, Darío ha Artajérjes, Pérsia retã ruvichakuéra he’iuka haguéicha.

15Ñanderuete rogaguasu ojejapopákuri jasy Adárpe (Márzope), pe ára mbohapyhápe, 6 áño Darío oñepyrũ haguépe oisãmbyhy Pérsia retãme.

16Upéramo Israel ñemoñarenguéra, pa’ikuéra, Leviguakuéra ha ambuekuéra, jepokuapyhágui ouva’ekue, vy’apópe oñepyrũ oiporu pe óga péva Ñanderuete rembiapópe g̃uarã.

17Ha oñepyrũvo hembiapo Ñanderuete rogaguasúpe oikuave’ẽ hikuái 100 tóro ra’yrusu, 200 ovecha mácho ha 400 ovecha ra’yrusu Ñanderuetépe g̃uarã; ha 12 kavara mácho oikuave’ẽ hikuái Israel 12 tríbu rembiapo vai reheguáva.

18Ha omoĩ hikuái pa’ikuéra omba’apova’erãva aty atýpe Ñanderuete rogaguasu rembiapópe, ha umi Levigua aty oñemboja’o haguéicha omba’apo hag̃ua avei Ñanderuete rogaguasúpe Jerusalénpe, ojehai háicha Moises kuatiañe’ẽme.

19Ha avei umi jepokuapyhágui ouva’ekue ra’ykuéra omboarete pe páscua pe ára 14-hápe, jasy peteĩha jave.

20Pa’ikuéra ha Leviguakuéra oñemopotĩmba rire oikuave’ẽ pe páscua opaite ojepokuava’ekue ra’yrekuéra rehe, ambue pa’ikuéra rehe ha avei ijehekuéra.

21Umi Israel ñemoñarenguéra ou jevyva’ekue pe jepokuahágui, ha opavave opytava’ekue Israel retãme ha oñemboykeva’ekue teko ky’águi ho’u joa ko’ã kuave’ẽmbýgui, oñekuave’ẽmava’ekue omomba’eguasu hag̃ua Ñanderuete, Israel Járape.

22Ha vy’apópe omomba’eguasu hikuái pe pan ilevadura’ỹva areteguasu rehegua 7 ára pukukue, Ñanderuete ombovy’águi ichupekuéra, ha Asíria retã ruvicha ipy’a porã haguére avei hendivekuéra, omombaretévo ipokuéra, Ñanderuete, Israel Jára rogaguasu ñemopu’ã rembiapópe.