Jeremías 44 - Biblia en Guaraní - ?anderuete ?e’? Por? 2015

Jeremías oñe’ẽ porã Judayguakuérape opoi hag̃ua ijára gua’úgui

1Ko Ñanderuete ñe’ẽ ou Jeremíaspe he’i hag̃ua opaite Judayguápe g̃uarã oikóva guive Egípto retãme, umi oikóva Migdólpe, Táfnespe, Memfíspe ha Patros yvýpe, ha he’iuka ichupekuéra:

2Péicha he’i Yvága Atykuéra Jára, Israel Jára: Peẽ pehechapáma umi mba’evaieta aguerumava’ekue Jerusalen ha Juda tavakuéra ári; ha peikuaa porãke umía ko’ág̃a itaperepáma; ha ndaiporivéima hetãyguakuéra oikóva ipype.

3Hembiapo vaieta rupi chembopochy, oikuave’ẽgui hikuái mba’e ryakuã porã ha omomba’eguasúgui ambue jarakuérape peẽ ha pende rukuéra ndoikuaaiva’ekuépe.

4Ha tapia ambou peẽme che rembiguái profetakuérape pendeavisa hag̃ua ha’évo: Ani pejapo ko’ã mba’evaiete chembopochy ha chemyangekõiva.

5Ha nohenduséi ni nomoĩri ijapysakúera opoi hag̃ua iñaña rekógui, ha ndopoíri avei hembiapo vaígui, oikuave’ẽve uvei mba’e ryakuã porã ambue jarakuérape.

6Upévare añohẽ che pochy ahapy hag̃ua Juda tavakuéra ha Jerusalénpe, ha upéicha itaperepa ha oñehundipa, oĩ háicha ko ára kóvape.

7Peikuaa porãke, péicha he’i pende Ruete, Yvága Atykuéra Jára, Israel Jára: Mba’upe piko pejapo pendejehe ko’ã mba’evaiete, oñehundipa hag̃ua kuimba’e ha kuñakuérape, mitãrusu ha mitã okambúva jepe Judayguakuéra apytégui.

8Peẽ ningo chembopochy pene rembiapo vai rupi, peiko peikuave’ẽvo mba’e ryakuã porã ambue jarakuérape Egípto retãme, mamo peike haguépe peiko hag̃ua tetã ambueygua ramo, ko teko ñaña rupi peẽ voi peñehundíta ha peikóta maldicion poguýpe ha ñemotĩguasu ramo opaite tetãnguérape g̃uarã oĩva guive ko yvy apére.

9Penderesaráimapa pende rukuéra reko ñañanguégui, umi Juda retã ruvichakuéra ñañanguégui ha hembirekokuéra rembiapo vaikuégui; ha pene rembiapo vaígui ha pene rembirekokuéra rembiapo vaikuégui pejapova’ekue Juda retãme ha Jerusalénpe,

10ko’ag̃aite peve peẽ napeñemomirĩri gueteri ha ndapekyhyjéi chehegui, ha ndapeguatái che rembiapoukapýpe ha che ñe’ẽ he’i háicha, umía Che voi amoĩmava’ekue avei peẽme ha pende ru kuéra renondépe.

11Upévare Che, Yvága Atykuéra Jára ha Israel Jára, ha’e peẽme: Che voi añemoĩta penderehe pohundiete hag̃ua.

12Che ajapyhýta umi hembymiva’ekue Judágui ha ojereva’ekue oike hag̃ua Egípto retãme, ha Egípto retãme katu omanombáta hikuái; ho’áta kyse puku térã ñembyahýi rupi; kyse puku ha ñembyahýigui omanóta umi imitãvéva guive itujavéva peve, ha ojeguerekóta ichupekuéra maldicion ha poromondyiha ramo, ñemotĩguasu ha ñembohoryha ramo.

13Cháke peẽ peikóva guive Egípto retãme, ahavira haguéicha Jerusalénpe, Che pohaviráta avei kyse puku rupi, ñembyahýi ha mba’asy iñasãiva rupi.

14Ha Juda rembyremi oikemava’ekue Egípto retãme opyta hag̃ua ndaiporimo’ãi ojesalvátava oho jevy hag̃ua Juda retãme, ha’ekuéra ohosehápe; ndohomo’ãvéima hikuái ndaha’éi ramo umi mbovymi okañyva’ekue.

15Upéramo umi kuimba’e oikuaa porãva hembirekokuéra oikuave’ẽha mba’e ryakuã porã ambue jarakuérape, ha heta kuña oñembyatýva hendivekuéra peteĩ atyguasúpe, oikóva tetã ambueygua ramo Patróspe, Egípto retãme, he’i jevy hikuái oñondive Jeremíaspe:

16Umi mba’e nde eréva oréve Ñanderuete rérape, ore norohendumo’ãi ha ndorojapomo’ãi.

17Añetehápe rojapóta opaite ñe’ẽme’ẽ ore jurúgui osẽmava’ekue, roikuave’ẽ hag̃ua mba’e ryakuã porã yvága jára kuñáme g̃uarã, roñohẽvo ichupe víno, rojapo háicha jepi ore ha ore rukuéra, ore retã ruvichakuéra ha ore mburuvichakuéra, umi táva Juda peguápe ha Jerusalen callekuérape, ha upeaja roguerekómiva heta pan ha ore py’a rory joa ha mba’eveichagua mba’evai ndorohechaiva’ekue.

18Ha upe ára guive ore noroikuave’ẽvéi mba’e ryakuã porã yvága jára kuñáme g̃uarã ha noroñohẽvéi ichupe g̃uarã víno, ore ndoroguerekovéima mba’eve, ha kyse puku ha ñembyahýi rupi ore mboyve rohóvo ko’ág̃a.

19Ha kuñakuéra he’i joa: Ore kuñakuéra roikuave’ẽ jevýta mba’e ryakuã porã, víno ha pan pe yvága jára kuñáme g̃uarã ha ore menakuéra oikuaa porã ko’ã mba’e ha ore roikuave’ẽve rohóvo ichupe g̃uarã.

20Upéramo Jeremías oñe’ẽ opaite kuimba’e ha kuñakuérape ombohováivo ichupekuéra he’i:

21Peimo’ã piko Ñanderuete hesaraiha, térã naimandu’aveiha pe mba’e ryakuã porã rehe peẽ peikuave’ẽmava’ekue Juda tavakuéra ha Jerusalénpe. Peẽ, pende rukuéra, pene retã ruvichakuéra, pene mburuvichakuéra ha umi tetãygua oikova’ekue Judápe, peikuave’ẽmba ambue jarakuérape.

22Ñanderuete ndohechasevéigui pene rembiapo ñañaita ha umi mba’evaiete pejapomava’ekuégui Ha’e ombotapere pene retã ha peiko maldicion ha mba’e oporomongyhyjéva poguýpe ha pene retã inandi ojehu háicha ko ára kóvape.

23Peikuave’ẽgui mba’e ryakuã porã ambue jarakuérape ha upéicha peñemohembiapo vai Ñanderuete ndive g̃uarã, ha ndapejapovéigui Ñanderuete rembipota, hembiapoukapy, iñe’ẽ ha hekombo’ekuéra he’i háicha, upévare Ñanderuete ombou pendeári ko’ã mba’e ivaíva, ojehu háicha ko ára kóvape.

24Ha Jeremías he’i mayma hetãyguakuérape, ha opaite kuñakuérape: Pehendúke Ñanderuete ñe’ẽ, mayma Judaygua peikóva guive Egípto retãme:

25Péicha he’i, Yvága Atykuéra Jára ha Israel Jára: Peẽ ha pene rembirekokuéra peme’ẽma yvága jára kuñáme pene ñe’ẽ, pende juru rupi, ha pejapose avei pende po rupi, pejévo: Rojapomanteva’erã kuave’ẽmby, roikuave’ẽvéta mba’e ryakuã porã ha roñohẽvéta ichupe g̃uarã víno; añetehápe pemoañete pene ñe’ẽme’ẽmby, ha pejapopa peje haguéicha.

26Upévare, pehendúke Ñanderuete ñe’ẽ, mayma Judaygua peikóva guive Egípto retãme: Che ame’ẽ che ñe’ẽ che rérape (juraménto) he’i pende Ruete, pende jaraite peẽ napehenoiveiva’erã che réra Egípto retãme, peẽ ndapejeveiva’erã: Oikove tapia g̃uarãva rérape.

27Peikuaa porãke, Che ambosako’íta mba’evai, ha ndaposalvamo’ãvéi; ha opaite kuimba’e Juda pegua opytaséva guive Egípto retãme kyse puku térã ñembyahýi rupi omanova’erã katuete.

28Ha umi mbovymi okañýtava kyse pukúgui oho jevýta Egípto retãgui Juda retãme, ha umi Judaygua hembýva Egípto retãme oikuaa porãta máva ñe’ẽpa oikóta; che ñe’ẽ térãpa iñe’ẽnguéra.

29Ha ko’ã mba’e peguerekóta techaukaha ramo, he’i pende Ruete, ko tetã kóvape Che ahaviráta, peikuaa hag̃ua oikotaha añetehápe mba’evairã, Che ha’e haguéicha peẽme.

30Péicha he’i pende Ruete: Peikuaa porãke, Che ame’ẽta faraon Hofra, Egípto retã ruvichápe, umi hese ija’e’ỹva pópe, ha ijukahára poguýpe, ame’ẽ haguéicha Sedequías, Juda retã ruvicha Nabucodonosor, Babilónia retã ruvicha pópe, hese ija’e’ỹva ha oporojukáva pópe.