Números 28 - Biblia en Guaraní - ?anderuete ?e’? Por? 2015

Kuave’ẽmbynguéra meme ára pegua

1Ñanderuete oñe’ẽ Moiséspe, ha he’i:

2Ere Israel rogaguasukuérape: Toikuave’ẽ chéve kuave’ẽmby hendýva ha kuave’ẽmby tembi’u reheguáva hyakuã asy hag̃ua chéve, ha peikuave’ẽmbava’erã chéve hi’oraitépe ha hi’araitépe.

3Ha eréta ichupekuéra: Peikuave’ẽta kuave’ẽmby hendypáva pende Ruetépe g̃uarã meme árape mokõi ovecha ra’y mácho iporãitéva, hi’áño peteĩva.

4Peteĩ ovecha ra’yrusu peikuave’ẽta pyhareve, ha peteĩ ovecha ra’yrusu peikuave’ẽta ka’aru pytũme;

5ha 2,2 lítro trígo ku’i porã oñembojehe’áva 0,9 lítro acéite olívo ojejosopyrégui, kóva pene kuave’ẽmby tembi’u reheguáva.

6Péva hína pe kuave’ẽmby ojehapýva opaite árape, peñemoĩ porã jevy ha hyakuã porã hag̃ua pende Ruetépe omoñepyrũva’ekue Sinai cérrope.

7Ko kuave’ẽmby kóva reheve peikuave’ẽta avei 0,9 lítro víno, peteĩteĩva ovecha ra’yrusu reheve; ha ko kuave’ẽmby tembi’u reheguáva peikuaave’ẽta pe óga jojohuha renondépe, pemomba’eguasu hag̃ua pende Ruetépe.

8Ka’arupytũme peikuave’ẽta avei pe ovecha ra’yrusu mokõiha, kuave’ẽmby ojehapypáva ramo; pejapo haguéicha pe kuave’ẽmby pyhareve peguáicha, pejapo jevy ka’arúpe kuave’ẽmby tembi’u reheguáva víno reheve, mba’e ryakuã porãva ramo pende Ruetépe ha peñemoĩ porã hag̃ua hendive.

Kuave’ẽmby ojejapóva meme jasy pyahúpe ha pytu’uha árape

9Ha pe pytu’uha árape, peikuave’ẽta mokõi ovecha ra’yrusu iporãitéva, oguerekóva peteĩ áño, ha 4,4 lítro trígo ku’i porã acéite ha víno reheve.

10Péva hína pe kuave’ẽmby ojehapýva umi pytu’uha árape, umíva peikuave’ẽta meme pytu’uha árape, oñembojoapyva’erã ambue kuave’ẽmby ojehapýva ha víno reheguáva reheve, peikuave’ẽta avei meme árape.

11Meme jasy pyahúpe katu peikuave’ẽta kuave’ẽmby ojehapypáva pende Ruetépe: Mokõi tóro ra’yrusu, peteĩ ovecha mácho ha 7 ovecha ra’yrusu iporãitéva, hi’áño peteĩva,

12ha 6,6 lítro trígo ku’i porã oñembojehe’apyréva acéite reheve kuave’ẽmby ramo peteĩteĩva umi tóro ra’yrusu reheve; ha 4,4 lítro trígo ku’i porã oñembojehe’apyréva acéite reheve kuave’ẽmby ramo peteĩteĩva umi ovecha mácho reheve;

13ha 2,2 lítro trígo ku’i porã oñembojehe’apyréva acéite reheve, ko’ã mba’e oñekuave’ẽva’erã peteĩteĩva umi ovecha ra’yrusu reheve kuave’ẽmby ojehapypáva ramo hyakuã asy porã hag̃ua pende Ruetépe g̃uarã.

14Peteĩteĩva umi tóro ra’y reheve peikuave’ẽta 1,8 lítro víno, ha peteĩteĩva umi ovecha ra’yrusu reheve 1,2 lítro víno. Ko’ã kuave’ẽmby ojehapypáva peikuave’ẽva’erã jasy pyahúpe pe áño pukukue jave.

15Ha peteĩ kavara mácho peikuave’ẽta pende Ruetépe kuave’ẽmby angaipa reheguáva ramo, oñembojoapyva’erã ambue kuave’ẽmby ojehapypáva ha víno reheve, peikuave’ẽta avei meme árape.

Kuave’ẽmby páscua

reheguáva

16Pe jasy peteĩha, pe ára 14-hápe pemboaretéta pende Ruetépe g̃uarã pe páscua.

17Ko jasýpe pe ára 15-hápe oikóta areteguasu; 7 ára pukukue pe’uva’erã pan ojejapóva levadura’ỹre.

18Pe ñepyrũha árape oĩta atyguasu pe óga jojohuhápe, mba’eveichagua tembiapo ndapejapoiva’erã.

19Ha peikuave’ẽva’erã kuave’ẽmby ojehapýva pende Ruetépe g̃uarã: Mokõi tóro ra’yrusu, peteĩ ovecha mácho ha 7 ovecha ra’yrusu iporãitéva, hi’áño peteĩva.

20Hendive peikuave’ẽta avei trígo ku’i porã oñembojehe’apyréva acéite reheve; 6,6 lítro trígo ku’i porã peteĩteĩ tóro ra’yrusu reheve; ha 4,4 lítro trígo ku’i porãva peteĩteĩ umi ovecha mácho reheve;

21peteĩteĩ umi 7 ovecha ra’yrusu reheve peikuave’ẽta 2,2 lítro trígo ku’i porãva.

22Ha peikuave’ẽta avei peteĩ kavara mácho kuave’ẽmby angaipa reheguáva, peñemopotĩ jevy hag̃ua.

23Ko’ãva pembojoapýta pene kuave’ẽmby ojehapýva reheve, peikuave’ẽva meme pyharevekuépe.

24Ko’ã 7 ára pukukue peikuave’ẽta koichagua kuave’ẽmbynguéra mba’e ryakuã asýva ramo pende Ruetépe g̃uarã; oñekuave’ẽva’erã avei kuave’ẽmby ojehapypáva meme ára víno reheve.

25Ha pe ára 7-hápe oikóta pe atyguasu pe óga jojohuhápe; ko ára kóvape ndapejapoiva’erã mba’eveichagua tembiapo.

26Ha oñepyrũ ramo pe ñemono’õ arete, pe ára peteĩháme, oikóta avei peteĩ atyguasu peñemboykévo pende Ruetépe g̃uarã, ndapejapomo’ãi avei mba’eveichagua tembiapo.

27Peikuave’ẽta kuave’ẽmby ojehapypáva ramo, mokõi tóro ra’yrusu, peteĩ ovecha mácho, 7 ovecha ra’yrusu iporãitéva, hi’áño peteĩva.

28Umi kuave’ẽmby reheve peikuave’ẽta avei trígo ku’i porã oñembojehe’apyréva acéite reheve; 6,6 lítro trígo ku’i porã peteĩteĩva umi tóro ra’yrusu reheve, ha 4,4 lítro trígo ku’i pe ovecha mácho reheve,

29ha peteĩteĩva umi 7 ovecha ra’yrusu reheve 2,2 lítro trígo ku’i.

30Ha peteĩ kavara mácho pehupity hag̃ua perdon pene angaipa.

31Ko’ã kuave’ẽmby ko’ãva peikuave’ẽta, ha apárte peikuave’ẽvéta avei ambue kuave’ẽmby ojehapypáva ha tembi’u reheguáva peikuave’ẽtava meme árape, peiporavova’erã tymba iporãitévante, ha avei pene kuave’ẽmby víno reheguáva.