1Ha Mardoquéo oikuaapáma ramo pe ojehumava’ekue, omondoro ijaokuéra, ha oñemonde ao vosakuépe, ha oity tanimbu iñakã rehe ha oho pe tavapy rehe ojahe’o asy osapukaihápe.
2Ha ou tetã ruvicha róga rokẽ meve, ndojehejái katu ojeike pe tetã ruvicha rokẽ rupi hyepy gotýo ao vosakue reheve.
3Opaite tetãnguérape ha opaite tekoha og̃uahẽha rupi tetã ruvicha ñe’ẽ ha hembiapoukapy, umi Judaygua oñembyasyeterei, ha ohasa okaru’ỹre, ñembyasy ha jahe’ópe, ha ao vosakuépe oñeno tanimbu apytépe.
4Ha Ester rembiguái kuñataĩnguéra ou omombe’u hag̃ua ichupe, Mardoquéo ojahe’o asyha. Ha tetã ruvicha rembireko ombyasyeterei, ha oguerahauka Mardoquéope ao oñemonde hag̃ua, ha oipe’a hag̃ua pe ao vosakue, Mardoquéo katu ndoipotái.
5Upéramo Ester ohenói hembiguái Hatácpe, Asuéro omoĩva’ekue Ester poguýpe, ha omondo ichupe Mardoquéo rendápe, oikuaa hag̃ua mba’épa ojehu, ha mba’érehepa péicha oikohína.
6Ha osẽ Hatac ohecha hag̃ua Mardoquéope pe táva plázape, opytáva pe tetã ruvicha rokẽ rovái.
7Ha Mardoquéo omombe’u ichupe opaite mba’e ojehuva’ekue, ha oikuaauka avei Hatácpe Aman ome’ẽseha óro morotĩ omboheta hag̃ua tetã ruvicha Asuéro mba’erepyeta ohundiukapa ramo Judayguakuérape.
8Ha ome’ẽ avei ichupe pe kuatiañe’ẽ rembiapoukapy reheguáva oñemyasãiva’ekue Súsa táva rehe oñehundipataha Judayguakuérape, ha péva ha’e ohechaukava’erã Estérpe ha’e oho hag̃ua tetã ruvicha rendápe ojerure asy ichupe oheja rei hag̃ua ko tembiapoukapy kóva.
9Hatac ou Ester rendápe ha omombe’upa ichupe Mardoquéo he’iva’ekue.
10Upémaramo Ester he’i Hatácpe oho jevy hag̃ua Mardoquéo rendápe ha he’i hag̃ua ichupe ko’ã ñe’ẽ:
11Opaite Pérsia retãguasu yvýpe ojekuaa porã avave ndikatuiha oike reiha tetã ruvicha korapy rokẽ rupi, oñemboja hag̃ua tetã ruvicha rehe oñehenoi’ỹre ichupe; pe kuimba’e térã kuña oike reíva oñehenoi’ỹre katuete omanova’erã. Oime ramo katu tetã ruvicha oipyso ijyvyra po’i oroguiguáva upe oñemoag̃uíva gotýo, upéva añónte oikovéta, ha ohasáma 30 ára tetã ruvicha nacherenoiveiha.
12Hatac ombohasa opaite Ester ñe’ẽ Mardoquéope.
13Upémaramo Mardoquéo he’iuka Estérpe: Aníke reimo’ã rejesalvataha reikógui tetã ruvicha rógape, ambue Judayguakuéra apytégui.
14Rekirirĩete mba’e ramo ko ára kóvape ñepytyvõ ha salvacion ouva’erã ambue hendágui Judayguakuérape g̃uarã; nde ha nde ru rogaygua katu pemanombava’erã. Ha mávapa oikuaa ndaha’éipa ko hórape g̃uarã oikóra’e ndehegui tetã ruvicha rembireko.
15Ha Ester he’iuka Mardoquéope:
16Tereho ha embyatypaite Judayguakuéra Súsape oikóva guive, ha peiko karu’ỹme cherehehápe, ani pekaru ha ani pey’útei mbohapy ára ha pyhare pukukue, ha che, che kuñataĩkuéra ndive aikóta avei karu’ỹme, ha uperire aikéta ahecha hag̃ua tetã ruvichápe amboyke ramojepe pe tembiapoukapy péva ha amano ramo, tove tamano.
17Upéramo Mardoquéo oho, ha ojapo Ester he’iuka hagueichaite ichupe.
Who We AreWhat We EelieveWhat We Do
2025 by iamachristian.org,Inc All rights reserved.
