Eclesiástes 1 - Biblia en Guaraní - ?anderuete ?e’? Por? 2015

Yvyariguakuéra oñeha’ãmba ramojepe ndohupitymo’ãi umi mba’e oha’ãrõva

1Pe ñemoñe’ẽhára (Salomon), David ra’y, tetã ruvicha Jerusalénpe he’iva’ekue ko’ã ñe’ẽ:

2Teko nandi, he’i pe ñemoñe’ẽhára, teko nandi, opaite mba’e teko nandi.

3Mba’épa yvyariguakuéra oguenohẽ hembiapoita ojapóvagui yvy apére.

4Oime ningo heta onacéva ha heta omanóva, ko yvy katu opytava’erã.

5Osẽ pe kuarahy, ha oike pe kuarahy, ha pya’e pya’e oho osẽ jevy haguépe.

6Yvy gotýo pe yvytu oipeju, ha ojere yvate gotýo, ojere tapiaite oikóvo, ha ojerejere jevy ohóvo pe yvytu.

7Opaite ysyrykuéra oho yguasúpe ha upeichavérõ jepe nahenyhẽi; umi ysyry osẽ haguépe, upépe ohopa jevy osyry pyahuete jevy hag̃ua.

8Opaite mba’e oporomokane’õ, yvyariguakuéra ñe’ẽ katu ndaikatúi ohechakuaa porã, pe tesa ningo araka’eve ndaikueráiri ohecha hague ni pe apysa ohendu hague.

9Umi mba’e ojehumava’ekue, ojehu jevymanteva’erã. Umi mba’e ojejapova’ekue, ojejapo jevyva’erã; ha ndaipóri mba’eve ipyahúva yvy apére.

10Oime ramo peteĩ mba’e ikatúva rehe ja’e ipyahuha, katuete ko mba’e kóva oikomava’ekue avei umi ára atyguasukuéra ohasava’ekuépe.

11Ndaipóri mandu’a umi mba’e ojehumava’ekuére, ha umi mba’e ojehútavare avei ndaiporimo’ãi mandu’a uperire.

Pe ñemoñe’ẽhára jehasa asy

12Che ningo pe ñemoñe’ẽhára, Israel retã ruvicha, Jerusalénpe aikóva.

13Ha amoĩ che py’apýpe aitypeka ha aheka hag̃ua arandupópe opaite mba’e ojehúva guive ko yvy apére; ko tembiapo pohyiete Ñanderuete ome’ẽva’ekue yvyariguakuérape hembiaporã ramo.

14Ama’ẽ opaichagua tembiapo rehe ojejapóva guive ko yvy apére ha péina ápe, opaite mba’e opa rei, ha’eténte ku yvytu ohasávaicha.

15Umi ikarẽva ndaikatúi ojepyso porã, ha umi oĩmba’ỹva ndikatúi ojerereko oĩmbáva ramo.

16Añe’ẽ che py’apýpe, ha’évo: Péina ápe che añembotuicha, ha añemoaranduve opaite yvyariguakuéra che mboyve oikova’ekuégui Jerusalénpe; ha oĩ ningo che pytúpe heta arandu ha akãguapy.

17Ha amoĩ che py’apy aikuaa hag̃ua arandu, tarova reko ha avei akã vai reko, ahecha jevy hag̃uánte péva avei yvytu jejoko reiha.

18Añetehápe aranduguasu ogueru heta angekõi, ha upe ombojo’avéva arandu ombojo’ave avei ijepy’apyrã.