1 Corintoyguakuérape 11 - Biblia en Guaraní - ?anderuete ?e’? Por? 2015

Mba’éichapa Hesu Crísto reheguáva oikova’erã iglésiape

1Che hermanokuéra peñeha’ã peiko hag̃ua che aiko háicha, che añeha’ãgui aiko hag̃ua Hesu Crísto oiko haguéicha ko yvy apére.

2Che hermanokuéra, che avy’a peẽ penemandu’a haguére cherehe ha peikove pehóvo che pombo’e haguéicha.

3Aipota katu peikuaa porã Hesu Crísto ha’eha opaite kuimba’e akã, ha kuimba’e ningo kuña akã, ha Ñanderuete katu Hesu Crísto akã.

4Oimeraẽ kuimba’e oñembo’e térã oprofetiza jave ojaho’i ramo iñakã, omotĩ iñakãme (Hesu Crístope).

5Ha opaite kuña oñembo’e térã oprofetiza jave ndojaho’íri ramo iñakã omotĩ avei iñakãme (iménape), oiko ku oñemoakã perõvaicha.

6Peteĩ kuña noñeakãho’íri ramo, toikytĩuka iñakã rague avei; ha otĩta ramo oikytĩ hag̃ua iñakã rague, upéicha ramo toñeakãho’ínte.

7Kuimba’e ndojaho’iriva’erã iñakã, ha’e ningo Ñanderuete joguaha ha ohechauka Ñanderuete reko jajaipa, pe kuña katu pe kuimba’e reko mimbi.

8Pe kuimba’e noñemoingoiva’ekue iñepyrũme kuñágui, pe kuña katu oñemoingova’ekue kuimba’égui.

9Pe kuimba’e ndojejapoiva’ekue kuña rehehápe, pe kuña katu ojejapova’ekue kuimba’e rehehápe.

10Upévare pe kuña oiporuva’erã angelkuéra rehehápe iñakã jaho’iha (ohechauka hag̃ua ha’e oikoha iména poguýpe) (Génesis 6,12).

11Opáichavo Ñanderuete renondépe kuña ndojejapói kuimba’e’ỹre, ni pe kuimba’e ndojejapói kuña’ỹre, (mokõivévagui oiko peteĩ teténte, Génesis 1,27; Génesis 2,24).

12Pe kuña ojejapo haguéicha kuimba’égui, péicha avei pe kuimba’e oiko kuña rupi; mokõivéva katu ou Ñanderuetégui.

13Pembojovake voi peẽ: Oiko piko hekópe pe kuña oñembo’e jave Ñanderuetépe ndoiporúi ramo iñakã jaho’iha.

14Pendejehegui voínte piko ndapeikuaái pe kuimba’e oñemotĩtaha oiko ramo hi’áva vuku reheve.

15Pe kuñáme g̃uarã katu opyta porã iñakã rague ipuku ramo, oñu’ã hag̃ua iñakã.

16Opáichavo oime ramo oñe’ẽjoapiséva upévare, toikuaa porã ore ndorojepokuaaiha péicha, ni Hesu Crísto iglesiayguakuéra.

Pe céna

Hesu Crísto reheguáva

17Ko’ã mba’e che ha’eukáva peẽme, ndapoguerohorymo’ãi: Peẽ peñembyaty ramo peiko vaipa oñondive, peiko porã rãngue.

18Ahendúma oĩha pende iglésiape umi oñemboja’óva ojuavýgui hikuái, ha arovia ningo pe che ahendúmava.

19Pe jejuavy rupi ojekuaáta umi oiko porãva ha hekopeguáva pende apytépe, ha umi oiko vaíva avei.

20Peẽ peñembyaty oñondive, peẽ ndape’uvéima hekoitépe Hesu Crísto céna,

21peẽ pemboja’o joja rãngue pe tembi’u pegueruva’ekue, oimeraẽva ho’únte imba’eteéva, upéicha oĩ umi iñembyahýiva gueteri, ambuekuéra katu oka’úma.

22E’a, ndapeguerekói piko pende róga pekaru ha pey’u hag̃ua. Térãpa ndapejapói mba’evéramo Ñanderuete iglesiayguakuérape ha pemotĩ umi oguereko’ỹvape mba’eve. Mba’épa ha’éta peẽme. Poguerohorýta piko ko mba’e kóvare, che ndaikatúi poguerohory.

23Umi tekombo’e che ahupitýva Ñandejára Hesu Crístogui umía ambohasava’ekue peẽme: Upe pyharépe oñeme’ẽ hague Hesu Crístope hese ija’e’ỹva pópe (Juda rupi), Ha’e ojapyhy pe pan;

24ha iñembo’épe oagradece rire omboja’o ha he’i (hemimbo’ekuérape): Kóva ningo che rete oñepehe’ãva penderehehápe. Pe’u jave ko pan kóva peñemomandu’a cherehe.

25Ho’u rire pe pan, peichaite ohupi avei pe váso, ha he’i: Ko váso ningo pe ñembopy’apeteĩ pyahu che ruguy rupi. Opaite ára pe’u jave ko váso kóvagui peñemomandu’a cherehe.

26Opaite ára pe’u jave pe pan ha pe’u jave ko vásogui pemoherakuã pende Jára ñemano Ha’e ou jevy peve.

27Péicha avei oimeraẽ ho’úva hekope’ỹ pe pan ha pe vásogui, oñemboheko vai Ñandejára rete ha huguy rehe.

28Oimeraẽva toipyguara (toheka) porã raẽ ipy’apyetépe (oñemohembiapo vai ramo) ha uperire katu to’u pe pan ha to’u pe vásogui.

29Upe ho’úva hekope’ỹ pe pan ha pe vásogui ho’u ha hoy’u jehavira ijupe g̃uarã, ndohecha porãigui Ñandejára Hesu Crísto reteha.

30Upévare oĩ avei pende apytépe heta hasýva ha ikangýva, ha heta okémava avei.

31Ñande voi ñañembojovake porã rire, Ñanderuete nañanembojovakeveimava’erãmo’ã.

32Ñanderuete ñandehavira ani hag̃ua ñañehundi ambue yvyariguakuéra ndive.

33Upévarehe, che hermanokuéra, peñembyatýrõ pe’u hag̃ua Hesu Crísto céna, peha’ãrõ og̃uahẽmba pevehermanokuéra (pejoservi hag̃ua).

34Oime ramo iñembyahýiva, tokaru raẽ hógape, ani hag̃ua (Ñanderuete) pendehavira. Ha umi ambue mba’e hembýva gueteri amoĩta hekópe ag̃uahẽ rire pene rendápe.