1Ko’ã mba’e rire ama’ẽ ha ahecha peteĩ okẽ jepe’apyréva yvágape, ha pe ñe’ẽvopu ahendu tenonderãme turúicha oñe’ẽva’ekue chendive he’ívo: Ejupi ko’ápe ha ahechaukáta ndéve umi mba’e ojehútava uperire.
2Upevovete che aĩ che pytu porãme ha ahecha oñemohenda peteĩ guapyhaguasu yvágape ha hi’ári oĩ peteĩ Oguapyvahína.
3Ha pe Oguapýva pe guapyhaguasúpe ojogua peteĩ ita vera sakã hovy kangy ha pytãũvape ha pe guapyhaguasu jerekuévo oĩ pe árco de Noe (jy’y) omimbíva ita vera hovy kangývaicha.
4Ha pe guapyhaguasu jerekuévo oĩ ambue 24 guapyha, ha hi’ári oguapy 24 karai ancianokuéra oñemondéva ao morotĩme, ha iñakãnguéra rehe oĩ akã jeguaka (coróna) oroguiguáva.
5Ha pe guapyhaguasúgui osẽ aratiri, ñe’ẽpu ha arasunu; ha 7 tataindy ohesape pe guapyhaguasu renondépe, umíva ha’e umi 7 Ñanderuete Pytu Porãite.
6Ha pe guapyhaguasu renondépe oĩ yguasu vidrioichagua, hesakãva ita veráicha, ha pe guapyha mbytépe ha ijerekuévo oĩ irundy tekove oikovéva henyhẽva teságui henonde ha hapykuévo.
7Pe tenondegua ojogua leõme, pe mokõiha ojogua torora’yrusúpe, pe mbohapyha hova kuimba’éicha ha irundyha ojogua ñapykani ovevévape.
8Ha umi irundy tekove oikovéva peteĩteĩ 6 ipepo, ijerekuévo henyhẽ teságui okávo ha hyepývo, ha ndopytu’úi ára ni pyhare, he’ívo: Heko porã, heko porã, heko porã Ñanderuete, pe Karaiguasuetéva, pe Ipu’akapáva, pe Ha’eva’ekue, pe Ha’éva ha pe Ouva’erãva.
9Ha umi tekove oikovéva omomba’eguasu, omboete ha oagradece pe Oguapývape iguapyhaguasúpe, ha oikovéva ára atyguasukuéra guive umi ára atyguasurãme g̃uarã,
10upevovete umi 24 karai ancianokuéra ojeity ovapývo pe Oguapýva renondépe ha Oikovéva ára atyguasukuéra guive umi ára atyguasurãme g̃uarã ha oity hikuái iñakã jeguaka pe guapyha renondépe ha he’i:
11Ore Jára ha ore Ruete, ndéve añoite ija opaite ñemboete, ñembotuicha ha ñemomba’eguasu, Nde remoingo haguére opaite mba’e, ha ne rembipota rupi oikopaitégui, ha nde pu’aka rupi oñemoingopa haguére.
Who We AreWhat We EelieveWhat We Do
2025 by iamachristian.org,Inc All rights reserved.
