Job 34 - Biblia en Guaraní - ?anderuete ?e’? Por? 2015

Eliu oñe’ẽ porã Ñanderuete rehe

1Ha Eliu oñe’ẽve, ha he’i:

2Peẽ penearandúva pehendu che ñe’ẽ ha peẽ iñakã porãva pejapysaka porã cherehe.

3Ñande apysa oha’ã umi ñe’ẽ ñahendúva guive, ñane apekũ oha’ã háicha umi mba’e ja’úva guive.

4Jaiporavóna ñandejupe g̃uarã umi mba’e hekoite peguáva, jaipyguara ñande apytépe umi mba’e iporãva.

5Job, nde erékuri: Che reko iporã, Ñanderuete katu ndohechakuaái péva,

6che ndaja’yveréi ramojepe, he’i hikuái cherehe chejapuha, ha Ñanderuete hu’y chejapíma reiete.

7Oiménepa ambue kuimba’e ndeichagua, ýicha hoy’úva ñembohory,

8omoirũva umi iñañávape ha oikóva hendivekuéra.

9Nde ningo ere: Mba’evete ndohupitýi kuimba’e térã kuña oiko ramo jepe Ñanderuete rapére,

10upévarehe kuimba’ekuéra, peẽ penearandúva guivépe, cherendumi ha anítei peimo’ã Ñanderuete ombojovake vai hague térã Ñanderuete reko iky’aha.

11Ñanderuete omyengovia yvyarigua rembiapo hekoitépe, ha Ha’e ohepyme’ẽ ichupe hembiapokuéra ojerure háicha.

12Añetehápe Ñanderuete ndojapomo’ãi heko pegua’ỹva ha pe Ipu’akapáva ndojavýi Ha’e ombojovake jave.

13Máva piko ome’ẽ ichupe ko yvy oñangareko hag̃ua térã máva piko omoĩ porã ko yvy.

14Ñanderuete ha’éntese ramo, ha Ha’e oipe’a jevy ramo kuimba’e ha kuña ánga ha pytu,

15opavavete katuete omanova’erã ha ñandehegui oiko jevyva’erã yvy timbo.

16Ha nde neakãporã ramo, ejapysaka ko’ã mba’e che juru he’ívare:

17Ikatu piko peteĩ mburuvicha oisãmbyhy porãmba ombojovake ramo hekope’ỹ, mba’éicha piko nde rejahéita Ñanderuete justícia rehe.

18Ñanderuete voi he’i tetã ruvichakuérape iñañaha ha imburuvichakuéra reko ivaiha.

19Ñanderuete ndohayhuvéi tetã ruvichápe, omboyke hag̃ua tembiguaikuérape; Ha’e nomomba’eguasuvéi ipirapire hetávape, imboriahúvagui; mayma yvyarigua ningo ipo rembiapokue voi.

20Sapy’aitépe mokõivéva omano; pyhare pytépe Ha’e ohundi peteĩ tetãme, ha Ha’e ojuka imbaretévape omopu’ã’ỹre ipo.

21Ñanderuete resa oma’ẽ tetãyguakuéra rape rehe, ha Ha’e ohecha porã mba’éichapa oguata hikuái.

22Umi hembiapo vaíva ndojohumo’ãi peteĩ yvy pehẽngue iñypytũetéva térã kuarahy’ã mamo okañykuaa hag̃uáme.

23Ñanderuete natekotevẽi oma’ẽ puku kuimba’e térã kuña rehe oikuaa hag̃ua hembiapo iporãha térãpa ivaiha.

24Ha’e oity umi imbaretévape noikotevẽi oporandu hembiapokue vai rehe, ha hendaguépe omoĩ ambue hapichápe.

25Ha’e oikuaágui voi hembiapo vaívape, Ha’e oity ichupekuéra pyharekuépe oñehundi hag̃ua.

26Ha’e ohaviráta ichupekuéra opavave renondépe iñaña haguére.

27Péva ojehu ichupekuéra oñemomombyry haguére Ñanderuete ha hembiapoukapykuéragui.

28Ñanderuete ohendu porã imboriahúva pyahẽ asy, Ha’e ojapysaka porã umi ojejopy vaíva mba’e jerure asýre.

29Ñanderuete okirirĩ ramo mávapa ikatu oñe’ẽvai hese, ha oñomi ramo hova, mávapa oma’ẽkuaa hese, ko’ã mba’e Ñanderuete ojapo peteĩ kuimba’e térã peteĩ tetã rehe.

30Upéicha Ñanderuete ojapo, ani hag̃ua peteĩ kuimba’e iñañáva oisãmbyhy hetãme ombohasa asy hag̃ua hetãyguakuérape.

31Hi’ã porã piko ndéve, Ñanderuete he’i ramo: Añemoĩ reíma nderehe, ajavy nendive, ndajapomo’ãvéima ko’ã mba’e,

32ehechaukamína chéve umi mba’e Che ahecha’ỹva, ndéna cherekombo’e, ha ajapo vai rire ndajapomo’ãvéima,

33ambojovake ha amyengoviáta che renonderãme hi’ã porã háicha ndéve, ha nde reiporavóta mba’épa ojejapóta.

34Yvyarigua iñarandúva ha iñakãguapýva cherendúva guive he’iva’erã chendive:

35Job oñe’ẽ arandu’ỹre ha akãguapy’ỹre.

36Che katu aipota oñembojovake porã Job rekove ha iñe’ẽ, ipohyiete umi mba’e ha’e he’íva guive.

37Job hembiapo vai ha oñemoĩ Ñanderuete rehe, oñe’ẽ rei hese ha oñembohory avei orerehe.