2 Réyes 7 - Biblia en Guaraní - ?anderuete ?e’? Por? 2015

1Upémaramo Eliséo he’i ichupe: Ehendu Ñanderuete ñe’ẽ: “Ko’ẽ ramo ko hóra kóvape 6,7 lítro trigoku’i ojejoguáta 11,17 grámo pláta rehe ha 13,4 lítro cebáda ojejoguáta 11,17 grámo pláta rehe Samária plázape, opytáva táva rokẽguasu ypýpe”.

2Ha peteĩ mburuvicha, máva jyva rehe tetã ruvicha ojekóva, he’i Eliséope: Ñanderuete oipe’a ramo yvága rovetã, ndagueroviaichéne. Ha ha’e he’i: Eikuaa porãke, nde rehecháta nde resatee rupi opaite ko’ã mba’e, ág̃a katu ndere’umo’ãi mba’eve.

3Oikómi pe táva rokẽ oka gotýo irundy (4) kuimba’e iléprava, ha’ekuéra he’i ojupe: Mba’upéiko ñaiméta ápe ñamano meve.

4Jaike ramo táva ryepýpe, pe ñembyahyiguasu oĩva upépe katuete ñandejukáta ha japyta ramo ko’ápe ñamanótante avei. Jahána ko’ág̃a ha jahasa umi Siriaygua atyha gotýo; ha’ekuéra oheja ramo jaikove, jaikovéta; ha’ekuéra ñandejuka ramo, ñamanótamante.

5Ha opu’ã hikuái pytũmbypávo oho hag̃ua Siriaygua atyha gotýo; ha og̃uehẽvo umi Siriaygua atyha ñepyrũme ndaiporivéima avave.

6Ñanderuete ojapóra’e umi Siriaygua ohendu hag̃ua ijatyhápe cárro ryapueta, kavaju ryapueta ha peteĩ soldádo aty ndetuichaitéva ryapu; ha he’i ojupe hikuái: Péina ápe Israel retã ruvicha ojapyhy pirapire rehe Hetgua ruvicha ha Egípto ruvichakuéra oñorãirõ hag̃ua ñanendive.

7Upévare opu’ã hikuái ha okañy iñypytũmbávo, ha ohejapa hóga tymba pirekueguiguáva, ikavajukuéra, iburrokuéra, ha ambue mba’eita oĩva guive icampaméntope; ha okañy hikuái osalva hag̃uánte hekovekuéra.

8Ha umi iléprava og̃uahẽvo, oike hikuái peteĩ óga tymba pirekueguiguápe okaru ha hoy’u hag̃ua, ha ojapyhy upégui pláta, óro, aokuéra ha oho hikuái oñongatu hag̃ua ñemiháme; ha ou jevývo oike hikuái ambue óga tymba pirekueguiguápe ha upégui avei oguerahave oñongatu hag̃ua ñemiháme.

9Ha upéi he’i ojupe hikuái: Ndajajapo porãi ningo. Ko ára ningo mba’eporã ñamombe’u hag̃ua, ha ñande jaguerokirirĩ; ñaha’ãrõve ramo ko’ẽmba peve, ñande reko vai ñanderupitýne. Jaha katu ko’ág̃a voi jaike Samáriape ha ñamombe’u ko marandu iporãva tetã ruvicha rógape.

10Ou hikuái ha osapukái umi táva rokẽ rehe oñangarekóvape, ha omba’emombe’u ichupekuéra, he’ívo: Ore roho umi Siriaygua ijatyhápe, ha péina upépe ndaiporivéima avave, ndaipóri kuimba’e oñe’ẽva, kavaju ha búrro ñapytĩmbýmante, ha icampaménto ojeheja rei ojepoko’ỹre mba’evetére.

11Umi okẽ rehe oñangarekóva osapukái ha omoherakuã hyepy gotýo pe tetã ruvichaguasúpe.

12Ha tetã ruvicha opu’ã pe pyhare, ha he’i hembiguaikuérape: Che ha’éta peẽme mba’épa Siriayguakuéra ojapose ñanderehe. Ha’ekuéra oikuaa ñaneñembyahýimaha, ha osẽ hikuái hogakuéragui ha okañy hikuái ñu rehe, ñanembotavy hag̃ua he’ívo: Osẽvo Israelguakuéra itávagui, jaapresáta ichupekuéra hekove rehe ha jaikéta itávape.

13Upéramo peteĩ hembiguái he’i: Tojejapyhy 5 kavaju pe kavaju atymi hembýva apytégui gueteri ñande távape, ha omanombava’erãnte avei heta Israelgua omano haguéicha, ha ñamondo ha tojehecha mba’épa oiko.

14Upérõ ojapyhy mokõi cárro ikavajukuéra reheve, ha tetã ruvicha omondo Siriaygua atyhápe, he’ívo: Tapeho ha pehecha mba’épa oiko.

15Ha ha’ekuéra oho umi Siriayguakuéra rapykuéri ysyry Jordan peve; ha péina pe tape pukukue henyhẽ heta ao ha mba’e porãgui Siriayguakuéra omombova’ekue oho pya’esevégui, ha ou jevy umi tembiguái ha omombe’upa hetã ruvichápe.

16Upéramo tetãyguakuéra osẽ ha oipe’apa umi mba’e Siriaygua ohejava’ekue icampaméntope, ha oñeme’ẽ 6,7 lítro trígo ku’i iporãva 11,17 grámo pláta rehe, ha 13,4 lítro cebáda 11,17 grámo pláta rehe, Ñanderuete he’i haguéicha.

17Ha pe mburuvicha oñangarekóva pe plázare, pe tetã ruvicha ojekomiva’ekue hese; ha umi tetãyguakuéra oñanívo oity ichupe ha ohasa hi’ári, ha omano ha’e, Ñanderuete he’i haguéicha hembiguái rupi, pe tetã ruvicha oguejy ramoguare hendápe.

18Ha ojehupa Ñanderuete rembiguái he’i haguéicha tetã ruvichápe; 13,4 lítro cebáda oñeme’ẽta 11,17 grámo pláta rehe, ha 6,7 lítro trígo ku’i iporãva oñeme’ẽta avei 11,17 grámo pláta rehe, ko’ẽ ramo ko horaitépe, Samária rokẽme.

19Ha péva voi pe mburuvicha ombohovaiva’ekue he’ívo: Ñanderuete oipe’a ramo jepe yvága rovetã, ikatúnepa ojehu ko’ã mba’e. Ha Eliséo he’íkuri: Péina nde rehechapáta nde resatee rupi, ndere’umo’ãi katu ichugui mba’eve.

20Ha upeichaite ojehu tetãyguakuéra ohasávo hi’ári pe táva plázape, ha’e omano meve.