Salmokuéra 86 - Biblia en Guaraní - ?anderuete ?e’? Por? 2015

Ñembo’e ojeruréva Ñanderuete mborayhúre - David ñembo’e

1Emboykéna, che Ruete, nde apysa, cherendumi hag̃ua, ajepy’apy asýmagui ha aikotevẽ ningo nderehe.

2Eñangareko che ánga rehe, che ajeroviágui nderehe, chepytyvõmína Nde, che Ruete, ne rembiguái ojeroviaháre nderehe.

3Cheporiahuverekomína, Nde, che Ruete, ndéve amba’ejerure asy opaite árape.

4Embohory ne rembiguái ánga, ndéve g̃uarã, che Ruete, amopu’ã che ánga.

5Nde ningo yvága atykuéra Jára, nde py’a porã ha reiporiahuvereko opaite nerenóivape.

6Ehendumína, Nde, che Ruete, che ñembo’e, ha ejapysakami che mba’ejerure asy he’íva rehe.

7Che jepy’apy vaiha árape rohenói, ha Nde cherendu porã.

8Che Jára, ndeichagua ndaipóri ambue ha ne rembiapoichagua ndaipóri mamove.

9Opaite tetã ne rembiapokue voi ha oupava’erã oñesũ ha omomba’eguasu hag̃ua nde réra porãite.

10Mba’eguasuete ningo Nde, mba’e techapyrã apohára, Nde añoite ore Ruete.

11Nde, che Ruete, eikuaaukána chéve nde rape aguata hag̃ua ne ñe’ẽ añetegua he’i háicha, emopeteĩ che py’apýpe akyhyje hag̃ua ndehegui.

12Che py’aite guive romomba’eguasúta, Nde, che Ruete, che Jaratee, ha amboetéta nde réra opa peve che arakuéra.

13Tuichaiterei ningo nde poriahuvereko chendive g̃uarã, reguenohẽgui che ánga umi omanómava retãgui.

14Nde, che Ruete, umi oñembotuicháva opu’ãmbáma cherehe, ha umi oñemombaretéva oñemoĩma ñemiháme cherehe chejuka hag̃ua oikuaase’ỹre mba’eve ndehegui.

15Nde katu, che Ruete, che Jára oporoporiahuverekóva ha ipy’a porãva, nembegue ndepochy hag̃ua, ha nde poriahuvereko ha nde py’aporã katu ituichaite.

16Ema’ẽna cherehe ha cheporiahuverekomína, eme’ẽmína nde pu’aka ne rembiguáipe, eñangarekomína ne rembiguái membykuimba’e rehe.

17Ehechaukamína nde pu’aka che rekovépe, upéva ohecha hag̃ua cherayhu’ỹva, ha toñemotĩ joa hikuái, Nde ningo, che Ruete, chepytyvõva ha chemoangapyhýva.