1Ovy’áta pe yvy perõ ha pe yvy nandi; ha horyetéta pe ñu ipoty jevýgui ku yvotytýicha.
2Ipotypa, ovy’a ha opurahéita torypápe; pe Líbano porãngue oñeme’ẽmbáta ichupe. Carmel ha Saron porãngue ohecháta Ñanderuete pu’aka ha heko jajaipa.
3Pemombarete pende po ikane’õva, ha pemohatã pene retyma ikangýva.
4Peje ipy’a kangývape: Peñembopy’aguasu, ani pekyhyjétei, pende Jára oútama omyengovia hag̃ua penderehe ija’e’ỹva rembiapo vaikue, Ñanderuete voi oúta, ha peneguenohẽta pende jejopy vaígui.
5Upérõ umi yvyarigua resa ohecha’ỹva ohecháta, ha umi apysa ohendu’ỹva ohendúta avei.
6Upérõ pe ikarẽva opopo jevýta guasúicha, ha iñe’ẽngúva juru opurahéi jevýta; osẽta y yvy perõme ha osyrýta yvy heñoi’ỹva’ekuépe.
7Pe yvy ikãvagui oikóta yrenda, ha pe yvy perõvape osẽta heta yvu osyry porãva; umi jagua hesaite oiko haguépe heñóita kapi’i ha pirity.
8Ha upépe oĩta peteĩ tape, ha pe tape péva Ñanderuete oiporavóma, upérupi hembiapo vaíva ndohasamo’ãi, hapére heko potĩvante oguatáta, upe oikóva ko tape kóva rehe, ipytũve ramojepe, ndojavymo’ãi haperã.
9Upépe ndaiporimo’ãi leõ, ni mymba saite iñarõva ndoikomo’ãi; Ñanderuete ra’ykuérante ojejohúta pe tape pévape.
10Ha umi Ñanderuete omosãsomava’ekue oupa jevýta ha vy’apópe oúta hikuái Siónpe; ha vy’a tapia g̃uarãva oĩta ipy’apýpe; tory ha vy’apópe oikóta hikuái, ha vy’a’ỹ ha pyahẽ asy oñemomombyrýta ichuguikuéra.
Who We AreWhat We EelieveWhat We Do
2025 by iamachristian.org,Inc All rights reserved.
