Jeremías 50 - Biblia en Guaraní - ?anderuete ?e’? Por? 2015

Marandu Babilónia rehe

1Ko ñe’ẽ kóva Ñanderuete he’iva’ekue proféta Jeremíaspe Babilónia rehe, umi Caldeayguakuéra yvy rehe.

2Pemyasãi ha peikuaauka ko ñe’ẽ tetãnguéra apytépe ha pemopu’ã avei poyviveve, ha ani peñomítei mba’eve; pemyasãi Babilónia oñembopoguýma, ijára Bel ipy’atarova, ha ijára Merodac ipy’amano; ijára gua’u ra’ãnga opyta toryja ramo ha oñehundi.

3Oúgui hi’ári peteĩ tetã yvatéguio, ha’ekuéra ombotaperéta ijyvy, ha ndaiporimo’ãvéi hetãygua térã mymba ipype oikovétava; okañy ha ohopágui hikuái.

4Umi ára umívape, he’i Ñanderuete, umi Israelgua ha Judaygua oñondivepa oúta jahe’ópe Ijaratee rekávo.

5Oporandúta hikuái Sion rape rehe, ha Jerusalen gotýo oguatáta ohóvo, ha he’íta hikuái: Peju joaite, Ñanderuete rendápe, ñañembopy’apeteĩ opaite árape ha araka’evéma nañanderesaraimo’ãvéi iñe’ẽme’ẽgui.

6Israel ojogua peteĩ ovecha aty oñedesatinávape herekua ojavyuka hetãnguérape, omboguata vai ichupekuéra umi cérrore; oguata rei umi cérro ru’ã rehe, ha hesarái hikuái ijovecha korapýgui.

7Ha’ekuéra omokõ oimeraẽ ojohúva guivépe, ha umi hesekuéra ija’e’ỹva he’i gueteri: Noroñemohembiapo vaíri, ha’ekuéra voi oiko vaígui Ñanderuete renondépe ha opoi ijustíciagui, ituvakuérante ojeroviava’ekue Ñanderuete rehe.

8Pekañy Babilónia retãgui, ha pesẽ umi Caldeaygua yvýgui, peñemotenonde, umi ovecha mácho oñemotenonde háicha ijatýpe.

9Pema’ẽ porãke, Che voi amopu’ãta ha aguerúta Babilónia retãme ambue tetãnguéra aty ndetuicháva oúva yvatéguio; ha upe guive ha’ekuéra oñembosako’íta ojeity hag̃ua hi’arikuéra, ha ojapyhypáta iguyrapa opoi hag̃ua ihu’y ojapi porãtava.

10Ha Babilónia retã mba’erepy ojeguerahapáta; imondahára hyg̃uatãmbáta, he’i pende Ruete.

11Pevy’aite ha pendepy’arory asy haguére pembyai jave che retã Israel ha peñemohyg̃uatã haguére ha pepopo ku vaka pyahúvaicha omba’apo jave, ha pendeayvu cojúdo mbaretéicha.

12Pende sy oñemotĩta imembykuéra rehe, peikuaa porã katu, tetãnguéra apytépe, pene retã Babilónia ojeapo’ivéta ha itaperéta, pende yvy iperõta ha mba’eveichagua tekove noĩmo’ãvéi ipype.

13Ñanderuete ipochýgui, avave ndoikomo’ãvéi ipype, itaperepaitéta uvei; mayma yvyarigua ohasáva guive Babilónia rupi ipy’andýita, ha oñembohorýta umi mba’evai ojehuva’ekue rehe ichupe.

14Peñemohenda joaitéke Babilónia jerekue rehe, mayma peẽ peipysokuaáva guyrapa pepoi pende hu’y hesekuéra, ani penerakate’ỹtei pende hu’ykuéra rehe, oñemoangaipágui hikuái Ñanderuete ndive, oñeme’ẽma hese ichupe ija’e’ỹva pópe.

15Opáguio peguerosapukái ñorãirõ sapukái, pejévo: Oñembopoguýma Babilónia, ho’áma hóga yvatekuéra, ojeitýma itáva korapyjere, Ñanderuete omyengoviágui hembiapo vaikue. Pejehepyme’ẽke hese; pejapo hese ha’e ojapo haguéicha penderehe.

16Pehundíke opaite kuimba’e oñotỹséva térã omono’õséva Babilónia retã ryepýpe; pe kyse puku oporohundipáva renondégui, mayma tetã ambueygua ombojeréta hova hetãtee gotýo, ha peteĩteĩva okañýta ijyvyteépe.

17Israel ojogua ovecha aty okañývape ha peteĩ leõ omuñávape ichupe; Asíria retã ruvicha omokõ raẽ Israélpe ha ág̃a ipahápe Nabucodonosor, Babilónia retã ruvicha oñapi’ũ ikanguekuéra.

18Upévare Yvága Atykuéra Jára ha Israel Jára he’i: Che ahaviráta Babilónia retã ruvichápe ha hetãme, ku Asíria retã ruvichápe ahavira haguéicha.

19Ha agueru jevýta Israélpe oiko haguépe, okaru hag̃ua Carmel ha Basan yvýpe ha hi’ánga oñemohyg̃uatãta Efrain cérrope ha Galaad ñúme.

20Umi ára umívape, he’i Ñanderuete, ojehekava’erã Israel ñañangue, ha ndojohumo’ãvéi, ndaiporimo’ãvéigui; ni Juda rembiapo vai jepe ndojejohumo’ãvéi; Che aperdonátagui umi Che amohembyva’ekuépe.

21Pejupi ha pendyry Merataim retã ha pe táva Pecod rehe; pehundi ha pejuka, he’i pende Ruete, ha pejapo pe Che ha’e haguéicha peẽme pejapo hag̃ua.

22Ñorãirõ ryapu ningo oñehendúma tetãpy rehe, ha oikóma jepy’apy tuichaitéva.

23Mba’eichaitépa opẽ ha ojejokára’e umi tetãnguéra martíllope; tetãnguéra oñemondyipa ohechávo umi mba’e ojehúva Babilónia retãme.

24Che voi amoĩma pe ñuhã, nde Babilónia, re’a hag̃ua ipype ha nde nereñandúi mba’eve, Che voi añemoĩ nderehe ha rojokua, reñemoĩ haguére cherehe.

25Ñanderuete oipe’a hóga oñongatuhápe iñorãirõ rembiporu ha oguenohẽ okápe iguyrapa ha hu’ykuéra Ha’e ipochýgui; Ñanderuete, Yvága Atykuéra Járape, g̃uarã ningo oĩ tembiapo Caldeayguakuéra retãme.

26Peju hi’ári yvy apýra paha guive; peipe’a umi óga oñeñongatuhápe hembi’urã, peñembyatypa pembyai hag̃ua opyta’ỹre mba’eve ipype.

27Pejukapaitékeitóro ra’yrusukuéra; toho joaitéke ojejuka hag̃uáme. Angái, angái, og̃uahẽma hi’ára ojehavira hag̃ua.

28Oñehendúma ñe’ẽpu umi okañýva Babilónia retãgui ha og̃uahẽvo Siónpe omombe’u porã mba’éichapa Ñanderuete, Ñandejára, ohepyme’ẽ hembiapo vaikuére, ha’ekuéra ombyai haguére Ñanderuete rogaguasu Jerusalénpe.

29Peñemoĩmba Babilónia rehe, opaite umi oipysokuaáva iguyrapa opoi hag̃ua hu’ykuéra ani hag̃ua avave okañy ichugui; pehepyme’ẽ Babilóniape ha’e voi ojapo haguéicha, peichaite pejapo jevy hese; Babilónia oñemoĩgui Ñanderuetére, pe Heko porãitéva rehe.

30Upévare ikaria’ykuéra ho’áta itáva callekuérape ha upe ára upévape oñehundipáta isoldadokuérape, he’i pende Ruete.

31Ema’ẽ porãke, ápe Che apu’ã nderehe nde reñemoĩ haguére cherehe, he’i pende Ruete, Yvága Atykuéra Jára; og̃uahẽmagui nde ára Che rohavira hag̃ua.

32Ha umi itĩ pu’ãva oñepysãngáta ha ho’áta, ha avave nomopu’ãmo’ãi ichupekuéra; ha ajatapýta itavakuéra rehe, ha okaipáta ijerekuévo oĩva guive.

33Péicha he’i Ñanderuete, Yvága Atykuéra Jára: Israel ha Juda ñemoñarenguéra ohasa asy; ha umi Babiloniaygua ojopy ichupekuéra ha ndopoisevéi ichuguikuéra.

34Ñanderuete voi ipytyvõhára mbarete, hérava Yvága Atykuéra Jára; añetehápe Ha’e oguerúta ijustícia hetãyguakuérape g̃uarã opytu’u hag̃ua, upéramo Ha’e omyangekõita Babiloniayguakuérape.

35Kyse puku toñemoĩ Caldeayguakuéra rehe, Babiloniayguakuéra rehe, imburuvicha ha iñaranduvakuéra rehe.

36Kyse puku to’a umi imba’ekuaáva rehe itarova peve, kyse puku tou ipy’aguasuetéva rehe iñangekõipa peve.

37Kyse puku to’a ikavaju rehe, icárro rehe, ha mayma tetãygua rehe ijapytépe oikóvape ha tojogua kuñakuérape; kyse puku tog̃uahẽ imba’erepyeta rehe oñemondapa hag̃ua.

38Tahypa hi’ykuéra; ha’ekuéra ningo peteĩ tetã omomba’eguasuetereíva ijára gua’u ra’ãngakuérape ha upévagui itarovapa hikuái.

39Hendaguépe oikóta mymba ñarõ, aguaraguasu ha ijapytépe oĩta avei ñanduguasu ra’ykuéra; ha araka’evéma avave ndoikoveimava’erã ipype, ita’yrakuéra guive iñemoñarenguéra peve.

40Ko ñehundi ojogua pe ñehundi Ñanderuete ojapo haguéicha Sodóma, Gomórra ha ambue tavakuéra ijerekuévo oĩva’ekue rehe, upéicha ipype ndoikomo’ãvéi kuimba’e, ni mba’eveichagua yvyarigua ñemoñare jepe, he’i pende Ruete.

41Pema’ẽ porãke og̃uahẽta peteĩ tetã yvatéguio, peteĩ tetã ndetuicháva ha heta tetã ruvichakuéra opu’ãta hendive hese, yvy apýra paha guive.

42Guyrapa ha yvyra puku akua oiporúta hikuái; ha’ekuéra ipy’a hatã ha ndoiporiahuverekomo’ãi avavépe; ijayvu hyapúta yguasu pochýicha, ha’ekuéra oikóta kavaju ári; ha oñembosako’ihína iñorãirõ rembiporu ojeity hag̃ua Babilónia retã rehe.

43Umi Babilónia retã ruvichakuéra ohendu vove ko’ã mba’e ipo ikangypáta; ojapyhýta ichupe jepy’apy vai ha mba’asy ku kuña imembypotávaicha.

44Cháke, ku leõ osẽ háicha ysyry Jordan ka’aguýgui ñu porãme, peichaite peteĩ sapy’aitépe, Che amosẽta ichupekuéra upégui, pe Che aiporavomava’ekue opytáta oisãmbyhy hag̃ua; ha máva piko ikatu chembojoja, ha máva piko ikatu oiko che mbojovakehára ramo térã mba’eichagua mburuvicha piko ikatu oñembo’y che renondépe.

45Upévare, pehendu porãke, mba’épa pende Ruete ojapose Babilónia retã rehe, ha umi mba’e Che ha’eva’ekue Caldeaygua retã rehe katuete oikóta avei. Añetehápe hymba rerekua imichĩvéva ombotyryrýta ichupekuéra ha ombyaíta hekohakuéra.

46Babilónia ho’a vove ojesapukái hatã itereíta, pe yvy oryrýi peve, ha isapukái oñehendúta ambue tetãnguéra rupi jepeve.