Ezequiel 26 - Biblia en Guaraní - ?anderuete ?e’? Por? 2015

Marandu Tírope g̃uarã

1Ojehu pe áño 11-hápe, pe ára peteĩháme, Ñanderuete ñe’ẽ ou chéve, ha he’i:

2Kuimba’e ra’y, umi Tiroygua opuka haguére Jerusalen rehe he’ívo: Pe ojehúva ichupe iporãiterei; Jerusalen, tetãnguéra rokẽ opẽma, upévagui tetãnguéra ou joáta ore rendápe ha ore rombohetáta tetãnguéra mba’erepy ore táva ryepýpe, Jerusalen oñembotaperégui.

3Upévagui, péicha he’i pende Ruete: Eikuaa porãke, Che apu’ãta nderehe Tíro ha amboúta ndeári heta tetã, ku yguasu pochy opu’ã háicha.

4Ha’ekuéra oitypáta Tíro korapy jere yvate ha nde róga yvatekuéra oñemombaretepyréva, ha aitypeíta ichugui ijyvy timbokue jepeve, ha ahejáta hendaguépe ita perõ ha yvy nandi.

5Tíro opytáta yguasu mbytépe, hendaguépe pira kutuhára omyasãita ired ikã hag̃ua, opaite ko’ã mba’e oikóta Che ha’émagui, he’i Yvága Atykuéra Jára; ha umi tetã omondapáta ichupe.

6Ambue táva, ijerekuévo oĩva, ojukapáta kyse pukúpe imemby kuñakuérape, oikuaa hag̃ua hikuái Che ha’eha pe Oikovéva tapia g̃uarã.

7Péicha he’ígui pende Ruete: Ema’ẽ porãke, nórteguio Che aguerúta Nabucodonosórpe, Babilónia retã ruvicha, ha’e ningo pe tetã ruvicha tuichavéva oútava ojeity hag̃ua Tíro ári ikavajukuéra, icarroita, ikavaju ariguáva ha isoldádo aty ndetuicháva reheve.

8Ojukáta kyse pukúpe ne memby kuñakuéra ñúme oikóvape, ha nemongora hag̃ua omopu’ãta nde jerekue rehe óga yvate, oñemo’ã hag̃ua nde hu’ykuéragui, ha oitýta yvy aty ndetuicháva nde táva kora renondépe ohasa hag̃ua hi’ári.

9Ha nde táva jere rehe oĩva pe kora yvate rehe ojeitýta hi’ári, iñorãirõ rembiporu reheve, ha umi óga yvate oñemongu’i ha oñemosarambipáta.

10Babiloniaygua kavaju arigua heta itereígui omopu’ãta yvy timbo neñu’ã meve; icarrokuéra ha ikavaju arigua aty ryapu rupi oryrýita nde táva korakuéra ohasa vove nde táva rokẽnguéra rupi, ojehu háicha oñembopoguy ramo peteĩ távape.

11Ikavajukuéra pysãpẽ ombyaipáta nde táva rapekuéra, ojukáta ne retãyguakuérape kyse puku rãimbépe, ha nde jára gua’u ra’ãngakuéra oitýta yvýre.

12Ha’ekuéra omondapáta ne mba’erepyeta ha ne rembi’ueta, ombyaipáta nde táva korajere ha nde róga iporãitéva; ha oitypáta y mbytépe umi mba’e hembýva pende rógagui.

13Upéicha amokirirĩta nde puraheikuéra, ha noñehendumo’ãvéima nde árpa pu mamove gotýo.

14Ha ajapóta ndehegui peteĩ itaguasu iperõva, ne rendaguépe pira kutuhára omyasãita iredkuéra, ha araka’eve nereñemyatyrõmo’ãvéi. Che, pe Oikove tapia g̃uarãva ha’epáma ko’ã mba’e.

15Péicha he’i pende Ruete Tírore: Ndoryryichénepa umi tetã oikóva y rembe’ýpe ohendu ramo pe tyapu re’a jave ha osapukaipa ramo umi ojekutúva oiko jave ndepype pe jejukaguasu.

16Upe ára upévape mayma mburuvicha yguasu rupigua oguejy joáta iguapyhaguasúgui, ha oipe’áta ijahojakuéra porãitéva, ha omboíta ijehegui ijao ojeguapáva; ha oñemondyietereígui oguapýta hikuái yvýpe ha oñemondéta ao vosakuépe ha oryrýi py’ỹi py’ỹita, ha oñemondýi joáta nderecháva guive.

17Ha oikóta purahéi jahe’o, ha he’íta ndéve g̃uarã: Mba’éicha piko reju reñehundi, nde reikóva yguasu rembe’ýpe, táva oñemomba’eguasuetéva, imbaretetéva, ha umi ipype oikóva omongyhyjeva’ekue opaite ambue tetãyguakuéra ijere rehe oikóvape.

18Ko’ág̃a oryryipáta umi tetã oikóva yguasu ypýpe nde re’a jave, upéicha avei umi yvyarigua oikóva yguasu mbytépe (íslape) oñemondyipáta avei.

19Péicha he’i pende Ruete: Che ajapóta ndehegui táva itaperéva, peteĩ táva ojeiko’ỹva ipype; ha amboúta nde ári y ituichaitéva ha yeta neñu’ãta.

20Ha roitýta tyvýpe, umi omanova’ekue oĩháme, ha ahechaukáta ne rendag̃ua pe yvykua pypukuetépe, ha nde táva ojoguáta umi sarambiguasúpe oĩva’ekue yvy apére, umi oguejymava’ekue ymaguare ityvýpe (isepultúrape), araka’eve anive hag̃ua ojeikove ndepype; upéicha Che ahechaukáta che pu’aka umi oikovévape ko yvy apére.

21Upe ohendúva guive ne ñehundi oñemondyiva’erã ha amboguéta ne retã yvy ape árigui; rejehekava’erã, ha araka’eve nderejejohumo’ãvéi, he’i pende Ruete.