Júdas 1 - Biblia en Guaraní - ?anderuete ?e’? Por? 2015

Ñemomaitei

1Che, Júdas, Jacóbo ryvy, Hesu Crísto rembiguái ahai ko kuatiañe’ẽ umi Ñandejára Ñanderuete ohenoiva’ekuépe, Ha’e ohayhúva ha oñeñongatúva Hesu Crístope g̃uarã.

2Jeporiahuvereko, py’aguapy ha mborayhu toñeme’ẽve ohóvo peẽme.

Mbo’epy japu ha mbo’ehára japu

3Che hermanokuéra ahayhuetéva, añeha’ãmbaite ningo ahai hag̃ua peẽme ñande salvacion rehe. Ha ko’ág̃a hi’ã chéve ahai peẽme poavisávo, peñeha’ã peñorãirõ porãve hag̃ua pende jerovia rehe oñeme’ẽmava’ekue heko potĩvape.

4Oikégui ñemiháme (pende apytépe) umi kuimba’e ojerovia’ỹva Ñanderuete rehe ha oiporu vaíva Ñanderuete py’aporã ha paciéncia oiko hag̃ua heko ky’a vaiete poguýpe, ha’ekuéra ombotove avei Ñandejára ha Sãmbyhyhára Hesu Crísto ha’eñoitévape.

5Che pomomandu’ase avei peikuaapa voi ramojepe: Ñanderuete voi osalva raẽ Israelguakuérape Egípto retãgui, upéi katu ohundi umi ojeroviase’ỹvape.

6Ha umi yvága rembiguaikuéra (angelkuéra) oiko’ỹva’ekue heko ypykuépe, ha opoi haguére heko ypykuégui Ha’e oñapytĩ ha oñongatu tapia g̃uarã pytũmbýpe (infiérnope) oñembojovake hag̃ua pe ára pahápe,

7upéicha avei Sodóma, Gomórra ha umi táva oĩva ijerekuévo ho’a teko ky’a vaietépe umi angelkuéraicha, ko’ã angelkuéra omboyke Ñanderuete rembipota, oiko hag̃ua avei tete iñambuéva rapykuéri, ko’ã mba’e ojehechauka ñandéve ñanembo’e hag̃ua, upévagui Ñanderuete oity ichupekuéra pe tataguasu tapia g̃uarãvape.

8Upéicha avei umi ombotuicháva ike pegua ha upéicha omongy’a hete hi’angaipa vaiete rupi, oñemoĩvo Ñanderuete rehe ha oñe’ẽ vai yvága rembiguaikuéra rehe.

9Miguel, pe yvága rembiguái ruvicha, oñorãirõ ramoguare Moises retekue rehe Satana ndive noñe’ẽvaíri ni nombojovakeséi ichupe, he’ínte: Ñanderuete tandeja’o.

10Ko’ã mbo’ehára japu ningo oñe’ẽvai mba’e oikuaa’ỹva rehe. Ha umi mba’e ha’ekuéra oikuaáva, ijyvyarigua rete rembipota vai, ha umíape oiko hikuái ku mymbáicha ha péva rupi oñehundiva’erã katuete.

11Angái ha’ekuéra, oguatáre Caín rape rehe, oñemohembiapo vai Balaam oñemohembiapo vai haguéicha, oikova’ekue pláta potávo, ha oñemoĩ hikuái Ñanderuete rehe, upévare oñehundíta Core oñehundi haguéicha.

12Ko’ã mbo’ehára japu og̃uahẽ gueteri pende karuguasúpe, oiko ramojepe hikuái peẽme g̃uarã peteĩ pelígro ramo, ku itaguasu yguy peguáicha ohundikuaáva pe barcoguasu; otĩ’ỹre okaru porãsénte hikuái, ojogua hikuái arai ndahi’ýivape, pe yvytu oguerovéva ágotyo pégotyo; ojogua ningo hikuái yvyra hi’a kúivape térã hi’a’ỹvape, ipirúva ha ojehapo’óvape.

13Ojogua hikuái y pochýpe (ypenu) ombohyjúiva imba’e ky’akuéra y rembe’ýpe, térã jasytata osẽva’ekue hapégui, vevépe oho hag̃ua tapia g̃uarã pytũmbýpe.

14Enoc, pe ñemoñare 7-ha (7 generaciónes) Adan guive oprofetizava’ekue hesekuéra he’ívo: Pema’ẽ porã, Ñandejára ouva’erã katuete heta 10.000-kuéra heko potĩva apytépe,

15ombojovake hag̃ua opaite tetãyguakuérape, ha ohavira hag̃ua opaite oñemoĩva’ekuépe Ñanderuete rehe hembiapo vai rupi ha opaite ñe’ẽvai he’iva’ekuére hese.

16Ko’ã mbo’ehára japu chi’õpópe oja’o Ñanderuetépe, ndoguerovy’áigui umi mba’e ojehúva guive hekovépe, ha’ekuéra oiko ijyvyarigua rete rembipota vai poguýpe, ijuruguasu hikuái, ha’ekuéra ombojuru he’ẽkuaa karaiguasukuérape ohupity peve hembipota, (provecho ijupe g̃uarã).

Pe aviso

paha

17Peẽ katu, che rayhupára peñemomandu’a umi ñe’ẽ rehe ymave Ñandejára Hesu Crísto apostolkuéra he’imava’ekue peẽme:

18Umi ára pahávo ningo oikóta umi oñembohorýva ha oikóva ijyvyarigua rete rembipota vai poguýpe.

19Ko’ã mbo’ehára japu omboja’o iglesiayguakuérape aty atýpe ha ndoguerekói pe Pytu Porãmbáva.

20Peẽ katu, che rayhupára, peheja pe Pytu Porãmbáva tomboguata pende rekove ha pende jerovia Hesu Crísto rehe, ha pe Pytu Porãmbáva tapenesãmbyhy pene ñembo’épe.

21Peñeñongatu Ñanderuete mborayhupype, peha’ãrõ Ñandejára Hesu Crísto ou jevy peve iporiahuvereko reheve peiko hag̃ua hendive tapia g̃uarã.

22Ha peiporiahuvereko ipy’a hetávape,

23peñeha’ãmba peguenohẽ hag̃ua ambuekuérape tatágui (añaretã poguýgui), ambuevekuérape katu peiporiahuvereko kyhyjepópe, anítei ijyvyarigua reko vai ao reheguáre jepe peñemongy’a avei peẽ.

Ñamomba’eguasu Hesu Crístope

24Ñanderuete toñangareko penderehe, ha tapeneñongatu opaite ñepysãngágui, Ha’émante penemoñembo’ykuaa heko jajaipáva renondépe, vy’apópe ha teko porãme,

25upévare ñamomba’eguasu ichupe, Ha’e ome’ẽ haguére ñanderehehápe ita’ýra Hesu Crísto, Ñandejárape, Ha’émante pe mburuvichaguasuetevéva, pe imbaretevéva, pe ipu’akapáva; Ha’e oikomava’ekue opaite ára atyguasukuéra ohasamava’ekuépe, Ha’e oikohína ko’ag̃aguápe ha Ha’e oikova’erãva opaite ára atyguasu oútavape, upévare ñamomba’eguasu ichupe, taupéicha (amen).