1Umi ára umívape Ezequías hasyete omano hag̃uáicha. Ha ou hendápe pe proféta Isaías, Amos ra’y, ha he’i ichupe: Péicha he’i Ñanderuete ndéve: Embosako’ipa nde rógape remano hag̃ua, nderekueramo’ãvéi.
2Upémaramo Ezequías ombojere hova tápia gotýo, ha oñembo’e Ñanderuetépe,
3ha he’i: Che Ruete, ajerure ndéve nemandu’ami che añeha’ãmba hague aiko porã hag̃ua ne renondépe, ha ajapómi ne rembiapoukapy nde resa renondépe nembohory hag̃ua. Ha Ezequías ojahe’o soro.
4Upéramo Ñanderuete ñe’ẽ ou jevy Isaíaspe, ha he’i ichupe:
5Tereho ha ere Ezequíaspe: Pende Ruete, nde ru David Jára, péicha he’iuka ndéve: Ahendúkuri ne ñembo’e, ha ahecha nde resaykuéra, péina Che ambojoapyvéta 15 áño nde rekove pukukue.
6Roipytyvõta ndéve, ha avei ko táva kóvape, poguenohẽta Asíria retã ruvicha pógui; ha añangarekóta ko táva kóva rehe.
7Ha kóva taha’e ndéve g̃uarã techaukaha ramo nde Ruetéguio. Che katuete ajapopátava ko’ã mba’e ha’éva guive ndéve:
8Pema’ẽ porãke Che amboguevíta 10 grádo pe reloj kuarahy pegua Acaz ojapoukava’ekue. Ha pe kuarahy oguevi jevy 10 grádo, ha ojehu ha’e he’iuka hagueichaite.
9Kóa ningo pe purahéi Ezequías, Juda retã ruvicha, ohaimava’ekue okuera rire imba’asýgui:
10Che ha’e chejupe: Che rekove ára mbyte rupi ahava’erã omanóva retã rokẽ rupi; ojehekýima chehegui umi áño hembýtava.
11Ha che ha’ékuri: Ndahechamo’ãvéima Ñanderuete oikovéva retãme; ha ndahechamo’ãvéima che rapichakuérape ko yvy apére oikóva.
12Ko che rete ojepe’áta chehegui, ku ovecha rerekua tapỹicha ojepe’áva ova vove térã ku inimbo oñekytĩ háicha ojepyaha aja, upéicha oñekytĩmo’ã che rekove mba’asy rupi; che arakuéra oñehundimo’ã og̃uahẽ mboyve pe pyhare.
13Mba’asýpe che ko’ẽ. Ha’e omongu’i che kanguekuéra ku leõicha ha péva chembohasa asy ára ha pyharépe.
14Ku guyra grúlla ha mbyjuícha cherasẽ asy, pykasúicha chepyahẽ, ajesaupi yvate gotýo. Che Ruete chemombareténa, ahasa asýgui.
15Mba’épa che ha’éta ichupe. Ha’e voi oipota ojehu ko’ã mba’e. Añemomirĩta aikove aja pukukue, che ánga ohasava’ekue ñembyasy rupi.
16Che Ruete, ko’ã mba’e ko’ãva rupi yvyariguakuéra oikovehína, ha umi mba’e rupi che pytu porã oikove jevy; Nde voi chemonguera jevýma, ha reheja taikoveve.
17Añetehápe ko jehasa asy rupi ahupity tekove pyahu porã ha Nde cheguenohẽ che jejopy vaietégui ha reitypa avei nde rapykue gotýo che rembiapo vaikuerakue.
18Pe omanóva retãygua nanemomba’eguasumo’ãi, ha pe ñemano nandererohorymo’ãi; ha umi oñeñotỹmava noha’ãrõmo’ãvéi ne ñepytyvõ.
19Pe oikovévante ikatu nemomba’eguasu, che romomba’eguasu háicha ko ára kóvape; pe túva oikuaauka ita’yrakuérape ne añetegua.
20Ñanderuete chesalváma; upévare japurahéi joa ha ñambopu pe árpa Ñanderuete rogaguasúpe jaikove aja pukukue.
21Ha Isaías he’ive: Pejapyhy hígo ku’i mboykupyre ha pemoĩ ijai rehe, okuera porã hag̃ua.
22Ha Ezequías oporandu avei: Mba’éichagua techaukapýpa areko ajupi jevy hag̃ua Ñanderuete rogaguasúpe.
Who We AreWhat We EelieveWhat We Do
2025 by iamachristian.org,Inc All rights reserved.
