Provérbios 25 - Biblia en Guaraní - ?anderuete ?e’? Por? 2015

Ñemopotĩ ha teko potĩ rehegua mbo’epy

1Ko’ãva avei Salomon ñe’ẽ arandukuéra, Ezequías, Juda retã ruvicha poguy pegua kuimba’ekuéra ohaiva’ekue peteĩ kuatiañe’ẽme.

2Ñanderuete reko jajaipa oñomi heta mba’e, tetã ruvicha rembiapo katu oitypeka umi mba’e.

3Hasyete ojekuaapa hag̃ua pe yvága yvatekue térã pe yvy pypukukue, péicha avei hasy jaikuaa hag̃ua tetã ruvicha py’apy ojepy’amongetáva (opensáva) rehe.

4Ojepe’a rire pe óro morotĩ ky’akue pe kuimba’e ikatupyrýva ojapokuaa jeguaka iporãva.

5Oñemboyke rire iñaña rekóva tetã ruvicha ypýgui, iguapyhaguasu oñemoĩ hatãta ha’e ombojovake ramo hekópe.

6Ani reñemomba’eguasu tetã ruvicha renondépe, ha ani reñemoĩ umi ipoguasúva rendaguépe.

7Iporãve oje’e ramo ndéve: Ejupi ko’ápe, reñemotĩ rãngue mburuvichakuéra renondépe, oje’e rãngue ndéve: Eñemomombyry.

8Aníke pya’ete reike ñe’ẽ juavýpe (pléitope), ani amo ipahápe ndereikuaái mba’épa rejapóta, nde rapicha nemotĩ rire (omombe’u haguére pe añetegua nde reñomiva’ekue).

9Eñeha’ã eñemoĩ porã nde rapicha ndive ha ani reikuaaukátei nde rapicha mba’e ñemiha meguáva.

10Ani hag̃ua umi nerendúva guive nemoherakuã vai opárupi, ha ipahápe ne rerakuã vai ndaikatuvéima oñemyatyrõ.

11Peteĩ ñe’ẽ hekoitépe oje’éva, hi’oraitépe, ojogua manzána oroguiguávape, oñeme’ẽva peteĩ ña’ẽmbe óro morotĩme.

12Iñe’ẽrendúvape g̃uarã pe tekombo’e iñarandúva jurúgui osẽva, ojogua pe kuãirũ ha namichãi oroguiguápe.

13Ku y ro’ysã porãicha ñemono’õha árape, upéicha hína pe temimondo katupyrýva ombovy’a imburuvichápe.

14Pe kuimba’e ojejapo gua’u reíva hembiapo porã rupi ojogua pe yvytu’atã ha arai hũvape ogueru’ỹva ama.

15Heta paciéncia rupi oñembopochy poi mbojovakehárape, ha ñe’ẽ vevúi asýva kangue jepe omopẽkuaa.

16Rejohu ramojepe eíra, he’u ikatumiha pevénte, ani nembyaju peve ha upéi reg̃ue’ẽmba (rembojevy jey).

17Nde rapicha rógape sapy’a py’ánte tereho, ani ikuerái ndehegui ndaija’evéi peve nderehe.

18Pe techahare japu ñe’ẽ he’i reíva hapicha rehe, ojogua yvyra, martíllo, kyse ha hu’y hakuávape.

19Pe angirũ (amígo) ndoikuaasevéima mba’eve ndehegui nde jejopy vaiha árape, ojogua peteĩ tãi ikuapávape ha py ikarẽvape.

20Pe opurahéiva umi ikorasõ jejopývape, ojogua ku omboívape ijao araro’ýpe, térã pe oñohẽvape juky aíre.

21Upe nderehe ija’e’ỹva iñembyahýi ramo, he’uka ichupe pan, ha ijy’uhéi ramo, emboy’u ichupe.

22Tatapỹi hendypyrévaicha remoĩta iñakã ári ne rembiapo porã rupi, ha Ñanderuete omyengoviáta ndéve.

23Pe yvytu yvatéguio oipejúva ogueru ama (Israel retãme) ha upéicha avei pe ñe’ẽ guata rei ogueru tova puku ha pochy rei.

24Iporãiteve jaiko ramo cárpa guýpe, ñaime rãngue kuña iñorãirõ katúva ndive peteĩ ogaguasúpe.

25Ku y ro’ysã ijy’uhéivape g̃uarã, péicha avei peteĩ marandu porã pyahu oúva tetã mombyrýgui.

26Ku ykua ityaívaicha ha yvu iky’ávaicha ningo pe heko potĩva ikangy ramo iñañáva renondépe.

27Pe eíra je’u hetaiterei naiporãi, upévare ani rembojuruhe’ẽiterei nde rapichápe.

28Ku táva ojeitypava’ekuéicha térã ikorapyjere’ỹvaicha pe tapicha ojejokokuaa’ỹva.