1 Samuel 23 - Biblia en Guaraní - ?anderuete ?e’? Por? 2015

David oiko desiértope

1Oñemombe’u Davídpe Filisteayguakuéra ojeityha Keila ári, ha omondapaha iñemitỹnguéra.

2Ha David omba’eporandu Ñanderuetépe he’ívo: Ahátapa ajeity hag̃ua Filisteayguakuéra ári. Ha Ñanderuete he’i ichupe: Tereho ha ejeity Filisteayguakuéra ári ha eguenohẽ Keilayguakuérape ipoguikuéra.

3Ha umi David ndive oĩva he’i joa ichupe: Ko Juda departaméntope roime kyhyjepópe. Mba’eichaitevétapa jaha ramo Keilápe, ñañemoĩvo Filisteaygua soldádo atyguasu rehe.

4Upémaramo David omba’eporandu jevy Ñanderuetépe. Ha Ñanderuete he’i jevy ichupe: Epu’ã katu, eguejy Keilápe, Che voi amoĩta Filisteayguakuérape nde pópe.

5Upémaramo David ha iñirũnguéra oho Keilápe, ha ojeity Filisteayguakuéra ári, ha ogueraha Filisteaygua rymbakuéra, ha oguenohẽ avei Keilayguápe hesekuéra ija’e’ỹva pógui.

6Ha Abiatar, Ahimélec ra’y, okañy ramoguare oho hag̃ua David rendápe Keilápe; ogueraha ipa’i ao jeguaka ipópe.

7Ha Saúlpe oñemombe’u David ou hague Keilápe. Upémaramo Saul he’i: Ñanderuete omoĩma ichupe che pópe, ha’e oike ha oñemboty haguére Keila távape.

8Ha Saul ombyatyukapa mayma hetãyguakuérape ojeity hag̃ua Keila ári, ha omongora hag̃ua upépe David ha iñirũnguérape.

9David oikuaa Saul ojaposeha ivaíva hese, he’i pa’i Abiatárpe: Egueru nde pa’i ao jeguaka.

10Ha David he’i: Ñanderuete, Israel Jára, ne rembiguái oikuaa Saul outaha Keilápe ohundi hag̃ua ko táva kóva cherehehápe.

11Ko’ã Keilaygua piko chembohasáta Saul pópe ha oguejýtapa Saul ko távape ne rembiguái ohendu haguéicha. Ñanderuete, Israel Jára, ajerure ndéve emyesakã hag̃ua ne rembiguáipe. Ha Ñanderuete he’i: Añete oguejýta.

12Upéi David he’i: Keilayguakuéra chembohasátapa chéve ha che irũnguérape Saul pópe. Ha Ñanderuete he’i: Ha’ekuéra penembohasáta ipópe.

13Upémaramo David opu’ã iñirũnguéra ndive, oiméne 600 kuimba’e rupi ha osẽ hikuái Keilágui, ha oiko rei upérupi. Ha oñemombe’u Saúlpe, David okañýma hague Keilágui, upémaramo Saul nomuñasevéi ichupekuéra.

14Ha David oho opyta hag̃ua peteĩ cérrope oĩva Zif desiértope; ha Saul oheka rei ichupe, Ñanderuete nome’ẽigui ichupe ipópe.

15David ohecháma ramo Saul osẽ hague hekove rekávo, opytánte Horéspe, Zif desiértope.

16Upéramo Jonatan, Saul ra’y, opu’ã ha ou Horéspe, David rendápe, omoangapyhy ha omokyre’ỹ hag̃ua ichupe Ñanderuete oĩgui katuete hendive.


17Ha he’i ichupe ani rekyhyjétei, Saul, che ru, nandejohumo’ãi ha nanderupitymo’ãi, ha nde ningo Israel retã ruvicharã, ha che aikóta nde rire mokõihápema, péva che ru Saul oikuaáma voi.

18Ha mokõivéva oñoñe’ẽme’ẽ jevy ojupe Ñanderuete renondépe, ha David opyta Horéspe, ha Jonatan oho jevy hógape.

19Upéi umi Zifgua ojupi Gibéape, Saul rendápe he’i hag̃ua ichupe: David oĩ kañyháme ore yvýpe Hores itaguasu ypýpe, Haquila cérro rembe’ýpe, oĩva desiértope sur gotýo.

20Upévare tetã ruvicha toho pya’e hapykuéri, nde reipota ramo, ore voi romoĩta ichupe nde pópe.

21Ha Saul he’i: Ñanderuete jehovasa tapenderupity, peẽ cheporiahuvereko haguére.

22Tapeho ko’ágã, ha peikuaa porãve ha pehecha mamoitépa ikañyha renda, ha mávapa ohechava’ekue ichupe upérupi; oje’égui chéve ha’e ikatupyry etereiha.

23Pehecha porãke, ha peikuaa porãke ikañyha renda, ha peikuaa porã rire peju che rendápe, ha che aháta penendive; ha ha’e oĩ ramo ñane retãme che ahekáta ichupe mayma 1000 Judaygua apytépe.

24Ha ha’ekuéra opu’ã oho Zífpe, Saul renonderãme. Ha David ha iñirũnguéra oĩhína Maon desiértope, Arabápe; pe desiérto péva opyta sur gotýo.

25Ha Saul oho ohekávo ichupe iñirũnguéra ndive; ha oñemombe’u Davídpe, upévare oho hikuái cérrope opyta Maon desiértope. Ha Saul oikuaávo péva, oho David rapykuéri Maon desiértope.

26Ha Saul oho cérro yke peteĩ gotýo ha David ha iñirũnguéra ambue yke gotýo; ha David pya’e pya’e oho okañy hag̃ua Saúlgui; Saul ha iñirũnguéra omongoraitéma David ha iñirũnguérape.

27Upejavete ou peteĩ ñe’ẽ reruhára Saul rendápe, he’ívo: Ejúke pya’e, oiméko Filisteayguakuéra ojasurúma tetãpy rehe.

28Upévagui Saul ojevy ha nomuñavéi Davídpe, ha oipykúi Filisteayguakuéra gotýo. Péicha rupi pe yvy péva oñehenói Sela-hamalecot (he’iséva itaguasu oporomopa’ũndýva).

29Upémaramo David ojupi upégui ha oho Engadípe ha oiko pe yvy ijyvateveha rupi.