Filipoyguakuérape 4 - Biblia en Guaraní - ?anderuete ?e’? Por? 2015

1Upévare, che hermanokuéra ahayhuetéva ha ahecha nga’úva, peẽ ningo pechembovy’a ha che coróna, peñembo’y hatãkena Hesu Crísto rupi.

Pevy’a Ñanderuete ndive ha peñembopy’apeteĩ Hesu Crísto ndive

2Che ajerurese Evódiape ha Síntiquepe toiko porã oñondive Hesu Crísto poguýpe.

3Che ajerure avei ndéve, che irũetéva (Sícigo), eipytyvõ ichupekuéra, ha’ekuéra ningo omba’apo porãva’ekue chendive omyasãi hag̃ua Ñanderuete ñe’ẽ porãite, upéicha avei Cleménte ha ambuekuérape; herakuéra ningo ojehai tekove rehegua kuatiañe’ẽme.

4Pevy’a tapia Hesu Cristopype, ha ha’e jevy: Pevy’ákena.

5Pende py’aporã tojekuaauka opavavépe, Hesu Crísto jeju hi’ag̃uíma.

6Anítei pejepy’apy mba’eve rehe, pemombe’u uvei opaite mba’e pene ñembo’e rupi Ñanderuetépe, pembohasa ichupe g̃uarã pene rembijerure pene agradecimiénto reheve.

7Ha Ñanderuete py’aguapy, ituichaitevéva opaite yvyarigua arandúgui, ha ko py’aguapy kóva oñangarekóta pene remiandu ha pene pensamientokuéra rehe Hesu Cristopype.

8Che hermanokuéra pepensa avei opaite añetegua rehe, opaite mba’e oñemomba’eguasukuaáva rehe, opaite heko peguáva rehe, opaite justícia rehe, opaite ipotĩva rehe, opaite ipy’a porãva rehe, opaite ñe’ẽ ñemyasãi porã rehe, opaite heko porãva rehe, opaite ñemboete rehe.

9Ha pejapo opaite mba’e che pohekombo’eva’ekue ha pehenduva’ekue chehegui, ha pejapo opaite mba’e pehechava’ekue che ajapova’aína. Ha pe py’aguapy Jára (Hesu Crísto) oĩhína katuete penendive.

10Avy’aite Hesu Cristopype, peẽ penemandu’a jevy haguére cherehe, tapia peẽ voi penemandu’ámiva cherehe, ndaijáinte peẽme chepytyvõ hag̃ua.

11Nda’éi ko’ã mba’e ajejopy vaígui, che voi ajepokuaáguima, añecontenta hag̃ua arekomíva rehevénte.

12Che ahasa asykuaa ha areko hetakuaa, che ryg̃uatãkuaa ha cheñembyahyikuaa, che ajepokuaáma hemby ramo térã opa ramo che pirapire.

13Opaite mba’e ikatu chéve g̃uarã, Ha’e chemombaretégui.

14Peẽ pejapo porã katu chepytyvõvo che jehasa asýpe.

15Peẽ Filipoygua peikuaa voi ningo Ñanderuete ñe’ẽ og̃uahẽ guive pene rendápe ha che aha rire Macedóniape, ndaiporiha ambue iglésia chepytyvõva peẽ añómante, ha peẽmente che amombe’u porã mboy pirapirépa peẽ peme’ẽmava’ekue chéve ha mboýpa che aiporúma, (agasta).

16Tesalónica peve jepe pemondo chéve mbohapy jevy pene pytyvõ (pirapire).

17Ndahekái ningo jopói, ahekánte uvei pe yva, hi’a porãva pende rekovépe ha oñembohetavéva ohóvo pene rembiapo porã rupi ha upéicha pene ganáncia (pene mba’e) peguerekóva Ñanderuete cuéntape oñembohetave ohóvo avei.

18Oñeme’ẽmbáma chéve peẽ peguerukava’ekue Epafrodíto rupi, arekóma hetave aikotevẽgui, hemby porã chéve opaite mba’e. Pene rembiapo porã peteĩ kuave’ẽmby hyakuã porãva Ñanderuetépe g̃uarã ha ombovy’áva ichupe.

19Ñanderuete voi omoĩmbava’erã imba’eitágui opaite peikotevẽva guive, Hesu Crísto reko jajaipa rupi.

20Toñemomba’eguasu Ñanderuete, Ñandejárape, ára atyguasu guive ára atyguasu peve.

21Pemomaitei opaite heko potĩvape Hesu Cristopype. Opaite umi hermáno oĩva guive chendive penemomaiteiuka avei.

22Opaite ambue Hesu Crísto reheguáva oĩva ko’ápe, ha hetave umi oikóva tetã ruvichaguasu rógape, penemomaiteiuka avei.

23Ñanderuete jopói iporãmba jepéva (igrácia) toĩ pende pytu porã ndive.