Jeremías 35 - Biblia en Guaraní - ?anderuete ?e’? Por? 2015

Umi Recabgua iñe’ẽrendu

1Ñanderuete ñe’ẽ ou Jeremíaspe, Joacim, Josías ra’y, Juda retã ruvicha árape, ha he’i:

2Tereho umi Recab ñemoñare rógape ha eñe’ẽ hendivekuéra ha emoinge ichupekuéra peteĩ Ñanderuete rogaguasu kotýpe, ha he’uka ichupekuéra víno.

3Upéramo amoinge Jaazanías, Jeremías ra’ýpe, Habasinías ra’yrépe ha ityke’yrakuérape, ha mayma ita’ýrape, ha mayma Recab rogayguakuérape;

4ha amoinge ichupekuéra Ñanderuete rogaguasúpe, Hanan, Igdalías ra’ykuéra kotýpe, péva oñemoĩmba Ñanderuete pópe, péva opyta umi mburuvicha koty ypýpe, ha Maasías, Salum ra’y koty ári, pe oñangarekóva pe okẽnguéra rehe.

5Ha amoĩ umi Recab ñemoñare renondépe peteĩ járro ha vasokuéra henyhẽva vínogui, ha ha’e ichupekuéra: Pe’úna víno.

6Ha’ekuéra katu he’i: Ndoro’umo’ãi víno; ore ru Jonadab, Recab ra’y, he’imava’ekue oréve: Peẽ ha pende ra’yrekuéra araka’eve ndape’uiva’erã víno,

7napemopu’ãiva’erã óga, napeñemitỹiva’erã ha ndapeguerekoiva’erã parralty, peikova’erã uvei óga rymba pirekueguiguápe, peikove puku hag̃ua Israel retãme tetã ambueygua ramo.

8Ha ore rojapopa ore ru Jonadab, Recab ra’y, he’iva’ekue guive oréve, upévare ore, ore rembirekokuéra, ore ra’y ha ore rajykuéra ndoro’úi araka’eve víno.

9Ha upévagui ore noromopu’ãi avei óga imbaretéva roiko hag̃ua ipype, ndoroguerekói parralty, kokue térã temitỹnguéra.

10Roikónte óga rymba pirekueguiguápe, ha oreñe’ẽrendu ha rojapo opaite mba’e ore ru Jonadab he’i haguéicha oréve.

11Ha Nabucodonosor, Babilónia retã ruvicha, ombyai ramo ore retã, ro’e: Jaha ñakañy Jerusalénpe umi Caldeaygua ha Síria soldadokuéragui; upévarente roju ropyta Jerusalénpe.

12Ha ou Ñanderuete ñe’ẽ Jeremíaspe, ha he’i:

13Péicha he’i Yvága Atykuéra Jára, Israel Jára: Tereho ha ere umi kuimba’e Juda ha Jerusalenguápe: Napeneñe’ẽrenduséi piko pejapo hag̃ua che ñe’ẽ.

14Jonadab, Recab ra’y, ñemoñarenguéra iñe’ẽrendu ha ndo’úi hikuái víno, ha ko ára kóva peve ndo’úi gueteri hikuái, hekoitépe ojapopa hikuái oje’e haguéicha ichupekuéra, Che katu añe’ẽ tapia peẽme ha peẽ nacheñe’ẽrenduséi.

15Ha tapia amondo peẽme che rembiguái profetakuérape, ha’euka hag̃ua peẽme: Pepia joaite pende rape vaígui, ha peñemohembiapo porã hag̃ua, ha ani pehótei ambue jára rapykuéri peiko hag̃ua hembiguái ramo, ha peikovéta ko yvy kóvape, ame’ẽva’ekue pende rukuérape, peẽ katu ndapecherendúi ha ndapeikuaaséi mba’eve chehegui.

16Añetehápe Jonadab, Recab ra’y, ñemoñarenguéra omoañete itúva he’iva’ekue guive; ha ko tetã kóva katu naiñe’ẽrenduséi chéve ko ára peve.

17Upévare pende Ruete, Israel Jára, Yvága Atykuéra jára he’i: Peikuaa porãke, Che aguerúta Juda ha Jerusalengua ári opaite mba’evai ha’eva’ekue guive; añe’ẽ porã hag̃ua ichupekuéra, ha’ekuéra nopenái katu cherehe.

18Ha Jeremías he’i Recabguakuérape: Péicha he’i Yvága Atykuéra Jára, Israel Jára: Pejapógui pende ru Jonadab ñe’ẽngue, ha opaite mba’e he’iva’ekue guive peẽme,

19upévare, Yvága Atykuéra Jára, Israel Jára he’iuka peẽme: Tapia oĩva’erã peteĩ ta’ýra Jonadab ñemoñarenguéra apytégui omba’apóva chéve g̃uarã.