Ezequiel 18 - Biblia en Guaraní - ?anderuete ?e’? Por? 2015

Upe ánga oñemohembiapo vaíva omanova’erã

1Ou chéve Ñanderuete ñe’ẽ ha he’i:

2Mba’érehepa peiporu ko ñe’ẽnga kóva Israel retãme: Umi túva ho’úkuri parral’a, hái, ha ita’ýra rãi ojehýi.

3Che rekovére, he’i pende Ruete, araka’evéma ndapeiporuveiva’erã ko ñe’ẽnga kóva Israel retãme.

4Peikuaa porãke, mayma yvyarigua ánga che mba’e voi; pe túva ánga che mba’e háicha, peichaite ita’ýra ánga che mba’e avei; upe ánga oñemohembiapo vaívante omanova’erã.

5Ha upe yvyarigua heko potĩva katuete ojapóva che ñe’ẽ ha che rembiapoukapy,

6upévare ha’e ndoikói umi cérro rehe ho’u hag̃ua kuave’ẽmby ro’o, ha’e nomomba’eguasúi ambue jarakuérape, ha’e ndohupíri hesa umi Israelgua jára gua’u ra’ãngakuéra rehe, ha’e norãirõi hapicha rembirekópe, ha’e ndoikói hembireko ndive ikuña mba’asy oguejy jave,

7ha’e ndojopy asýi avavépe, mba’eporukaharépe ha’e ome’ẽ jevy imba’erepy oiporuva’ekue, ha’e nomondái, ha’e ome’ẽ hembi’úgui iñembyahýivape ha omonde ijopívovape,

8ha’e nomba’eporukái ipirapire mba’erepy (interes) rehe, ha’e ndojapyhy reíri hapichágui imba’erepy; ha’e oipe’a ipo ñaña rekógui, ha’e ombojovake hekoitépe hapichakuérape,

9ha’e oiko Che aipota háicha, ojapógui hekoitépe che rembiapoukapy, añetehápe ko teko potĩ kóva oikovéta, he’i pende Ruete.

10Ko kuimba’e heko potĩva ra’y omonda ramo, térã oñohẽ ramo hapicha ruguy, térã ojapo ramo oimeraẽ mba’e vaiete,

11itúva ndojapoiva’ekue: Ita’ýra ho’u ramo kuave’ẽmby ro’o umi cérro ári, orãirõ ramo hapicha rembirekópe,

12ojopy asy ramo imboriahu ha ohasa asyitereívape, omonda ramo, nomyengoviavéi ramo mba’erepy oiporuva’ekue, ojesaupi ramo umi jára gua’u ra’ãnga rehe ha hembiapo vaiete ramo,

13omba’eporuka ramo ipirapire mba’erepy (interes) rehe ha oipe’a rei ramo hapichágui imba’erepy, ko tekove ñaña kóva oikovénepa. Ndoikovemo’ãi, ojapopaitégui ko’ã mba’evaiete, katuete omanova’erã, ha hembiapo vaikue ho’ava’erã hi’ári oñehundi peve.

14Ha oimerõ peteĩ kuimba’e ra’y ohecha ramo opaite itúva rembiapo vai ha’e ojapóva guive, ha ohechapa ramojepe ndojapói itúva ojapo háicha;

15ndo’úi kuave’ẽmby ro’o cerrokuéra ári, nomomba’eguasúi umi Israel jára gua’u ra’ãngakuérape, norãirõi hapicha rembirekópe,

16ha ndojopy asýi avavépe, ha’e noñemomba’éi hapicha mba’erepy rehe, nomondái, ome’ẽ hembi’úgui iñembyahýivape, ha omonde ijopívovape,

17ndojopýiri imboriahúvape ha nomba’eporukái ipirapire mba’erepy (interes) rehe ha ndojapyhýi reíri hapichágui imba’erepy, ha ojapóva añetehápe che ñe’ẽ ha che rembiapoukapy, ko kuimba’e kóva nomanoiva’erã itúva ñañangue rehe; ko tapicha kóva katuete oikoveva’erã.

18Itúva ojapógui mba’evaiete, mbaretépe omondágui ipehẽnguépe, ha ojapógui hetãyguakuéra apytépe mba’e iporã’ỹva, katuete ha’e omanóta iñañangue rupi voi.

19Ha peporandu ramo: Mba’éicha rupípa ita’ýra ndoguerahamo’ãi avei itúva rembiapo vai. Ita’ýra ojapógui che ñe’ẽ ha che rembiapoukapy oĩ háicha, upévagui añetehápe ha’e oikoveva’erã.

20Upe yvyarigua ánga oñemohembiapo vaívante omanova’erã. Ita’ýra ndoguerahamo’ãi ijehe itúva rembiapo vai, ni pe túva ndoguerahamo’ãi ijehe ita’ýra rembiapo vai; pe heko potĩva ohupityva’erã justícia ha oikoveva’erã, pe iñañáva katu heko ñañatee rupi omanova’erã.

Ñanderuete ombojovake yvyariguakuérape pe ára pahápe, ha’ekuéra oiko hagueichaite

21Heko vaíva opoi ramo opaite hembiapo vai ojapova’ekuégui, ha ojapo ramo opaite che rembiapoukapy ha che ñe’ẽ he’i háicha ha oiko ramo justícia rekópe, añetehápe oikoveva’erã ha nomanoiva’erã.

22Opaite mba’e vai ojapova’ekue rehe ndaiporimo’ãi mandu’a; oiko porãháre oikovéta katuete.

23Avy’ánepa omano ramo heko vaíva, he’i pende Ruete. Nahániri, ndavy’aichéne heko vaíva omano ramo, avy’a katu heko vaíva opoi ramo heko vaígui oikove hag̃ua.

24Ha pe heko potĩva opoi ramo heko potĩgui ha oñemoangaipahína, ha ojapo ramo umi heko vaíva ojapo háicha, oikovénepa ha’e. Nahániri, Che nachemandu’avéi heko potĩngue rehe, pe heko ñepu’ã rupi ha opyrũgui teko porã rehe; ha hembiapo vai rupi, katuete ha’e omanova’erã.

25Ha peẽ peje ramo: Naiporãi ore Ruete justícia; pejapysaka porãke ko’ág̃a, peẽ Israel retãygua; ndaheko potĩri piko che justícia ha pende justícia piko ndaiky’ái.

26Pe heko potĩva opoi ramo teko potĩ rapégui, ha oñemoangaipa ramo, ha’e omanova’erã hi’angaipa vai rupi; hembiapo vai rupi omanova’erã katuete ha’e.

27Ha pe heko vaíva opoi ramo hembiapo vaikuégui, ha oiko ramo che rembiapoukapy he’i háicha ha’e omoingovéta hi’ãnga.

28Ojesarekógui ha opoi haguére opaite mba’evai ojapova’ekuégui, añetehápe upéva oikoveva’erã ha nomanoiva’erã.

29Ha Israel retãyguakuéra he’i ramo gueteri: Naiporãi ore Ruete rape; ndaheko porãi piko che rape, Israel retã. Añetehápe, pende rapekuéra ndaheko porãi.

30Upévare Che pombojovakéta peteĩteĩvape pene rembiapo rupi, nde Israel retã, he’i pende Ruete. Peñembyasy añetehápe ha pepoi pene rembiapo vaígui ha pene ñaña rekógui ha napeñehundimo’ãi.

31Pepoi pene rembiapo vaígui ha peñemboheko pyahu ha peñembopytuporã pyahu. Mba’upéiko pemanose, peẽ Israelguakuéra.

32Chéve nachembovy’ái pe tekove ñaña omano ramo, he’i pende Ruete; upévagui pejevýna che rendápe peikove hag̃ua.