Deuteronómio 27 - Biblia en Guaraní - ?anderuete ?e’? Por? 2015

Tembiapoukapykuéra ojehaiva’erã ita rehe Ebal cérro

ári

1Moises ha umi Israel karai ancianokuéra he’i opaite hetãyguakuérape: Pejapova’erã mayma tembiapoukapy, ore ro’éva guive peẽme ko ára kóvape.

2Ha pehasa ramo pe ysyry Jordan peike hag̃ua pe yvýpe Ñanderuete ome’ẽtava peẽme, pemopu’ãva’erã itakuéra ndetuicháva, ha pemomorotĩva’erã cálpe (itatĩkáipe);

3ha pehaiva’erã hese ko’ã tembiapoukapy, pehasa vove pe y peike hag̃ua pe yvy Ñanderuete ome’ẽtava peẽme, yvy osyryhápe kamby ha eíra, Ñanderuete, ñande rukuéra Jára, he’i haguéicha ñandéve.

4Ág̃a pehasa vove pe Jordan ysyry pemopu’ãva’erã ko’ã ita che ha’éva peẽme ko’ág̃a, Ebal cérrope, ha pemomorotĩta cálpe;

5ha pemopu’ãva’erã upépe peteĩ kuave’ẽmby renda itaguiguáva Ñanderuetépe g̃uarã; ha ndapeiporuiva’erã hese tembiporu hierroguiguáva.

6Ita oñekytĩ’ỹvagui pemopu’ãva’erã Ñanderuete kuave’ẽmby renda, ha peikuave’ẽva’erã hi’ári kuave’ẽmby ojehapypáva Ñanderuete, Ñandejárape g̃uarã kuave’ẽmby py’aguapy reheguáva.

7Peikuave’ẽ hi’ári, peñemoĩ porã jevy hag̃ua; ha pekaruva’erã upépe, pevy’a hag̃ua Ñanderuete renondépe.

8Ha umi itáre pehaiva’erã ko’ã tembiapoukapy ojehecha porã hag̃uáicha.

9Moises ha umi pa’i Levigua oñe’ẽ opaite Israelguakuérape, ha he’i: Pekirirĩ ha pejapysaka porãke, ko árape oikóma pendehegui Ñanderuete retã.

10Pehenduva’erã Ñanderuete ñe’ẽ ha pejapova’erã hekoitépe iñe’ẽ ha hembiapoukapykuéra, ore ro’éva guive peẽme ko ára kóvape.

Maldicionkuéra

oje’étava Ebal cérrope

11Ha pe ára pévape Moises he’i hetãyguakuérape:

12Ág̃a pehasa vove pe ysyry Jordan: Simeon, Levi, Juda, Isacar, Jose ha Benjamin, ojupíta Gerizim cérro ári omoingo porã (ohovasa) hag̃ua hetãme.

13Ruben, Gad, Aser, Zabulon, Dan ha Neftali katu ojupíta Ebal cérro ári he’i hag̃ua pe maldicion (aviso pohýi ramo).

14Upérõ Leviguakuéra he’i hatãva’erã mayma Israel kuimba’ekuérape:

15 Maldicion ho’ava’erã upe kuimba’e ári ojapóva tete ra’ãnga térã ta’ãnga oñembohykupyréva, ikatupyrýva rembiapokue, omomba’eguasu hag̃ua (jára gua’úpe), ko’ã mba’e ombopochýgui Ñanderuetépe. Ha mayma tetãygua ombohovái ha he’iva’erã: Taupéicha (Amen).

16 Maldicion ho’ava’erã upe kuimba’e ári omboykéva (ha noipytyvõiva) itúva térã isýpe. Ha mayma tetãygua he’iva’erã: Taupéicha.

17 Maldicion ho’ava’erã upe kuimba’e ári omomichĩva hapicha yvy lóte. Ha mayma tetãygua he’iva’erã: Taupéicha.

18 Maldicion ho’ava’erã upe kuimba’e térã kuña ári ombojavyukáva hesatũva rape. Ha mayma tetãygua he’iva’erã: Taupéicha.

19 Maldicion ho’ava’erã upe kuimba’e térã kuña ári omboyke ramo tetã ambueyguáva, ityre’ỹva térã imenave’ỹva derécho. Ha mayma tetãygua he’iva’erã: Taupéicha.

20 Maldicion ho’ava’erã peteĩ kuimba’e ári oñenórõ itúva rembireko ndive, péicha omongy’águi itúva rupa. Ha mayma tetãygua he’iva’erã: Taupéicha.

21 Maldicion ho’ava’erã upe kuimba’e térã kuña ári oiporu ramo oime haichagua tymba oiko hag̃ua hendive. Ha mayma tetãygua he’iva’erã: Taupéicha.

22 Maldicion ho’ava’erã peteĩ kuimba’e ári oñenóva heindy ndive, itúva rajy ndive térã isy membykuña ndive. Ha mayma tetãygua he’iva’erã: Taupéicha.

23 Maldicion ho’ava’erã peteĩ kuimba’e ári oñenóva hembireko sy ndive. Ha mayma tetãygua he’iva’erã: Taupéicha.

24 Maldicion ho’ava’erã upe kuimba’e térã kuña ári oikutúva ñemiháme hapichápe. Ha mayma tetãygua he’iva’erã: Taupéicha.

25 Maldicion ho’ava’erã upe kuimba’e térã kuña ári orecebíva pirapire ojuka hag̃ua hapicha heko potĩvape. Ha mayma tetãygua he’iva’erã: Taupéicha.

26 Maldicion ho’ava’erã umi ndojapóiva hekópe ko’ã tembiapoukapy ko’ãva. Ha mayma tetãygua he’iva’erã: Taupéicha.