Salmokuéra 132 - Biblia en Guaraní - ?anderuete ?e’? Por? 2015

Ñanderuete ome’ẽ Davídpe iñe’ẽ

1Nde, ore Ruete, nemandu’amína David ha opaite ijepy’apy rehe.

2Mba’eichaitépa David ome’ẽ iñe’ẽ Ñanderuetépe, Jacóbo Járape he’ívo kóicha:

3Ndaikemo’ãi che róga aikohápe, ha ndajupimo’ãi che rupápe,

4che resakuéra name’ẽmo’ãi topehýi ha che ropepikuérape namongevymo’ãi,

5ajohu peve Ñanderuetépe g̃uarã hendag̃ua, Jacóbo Jára Ipu’akapávape oiko hag̃ua ipype.

6Peikuaa porãke, rohendu Efrátape oĩha pe karameg̃ua mbojoaju reheguáva, péva rojohu Quiriat-jearim ñúme, peteĩ ka’aguy pehẽnguépe.

7Jaike joa Ñanderuete rógape, ñañesũ joa ipyenda renondépe.

8Epu’ãmína, Nde, ore Ruete ha terehomína nde pytu’uha renda gotýo Nde ha ne karameg̃ua mbojoaju pu’aka peguáva.

9Nde pa’ikuéra toñemonde joa justíciape, ha tahory joaite heko potĩvakuéra ndive.

10Ne rembiguái David rayhupápe ani remboyke Nde reiporavóvape.

11Añetehápe Ñanderuete ome’ẽma iñe’ẽ Davídpe, Ha’e nopyrũi iñe’ẽre ome’ẽmava’ekue ichupe: Iñemoñare amoĩta iguapyhaguasu ári.

12Nde ra’ykuéra ojapo guive che ñe’ẽ ha che rembiapoukapy Che ambo’e haguéicha ichupekuéra, ita’yrarekuéra jepe oguapýta avei nde guapyhaguasu ári opaite árape.

13Ñanderuete oiporavógui Jerusalénpe, ha upépe Ha’e oikose.

14Kóa ha’ehína opaite ára che pytu’uha rendag̃ua; ápe aikóta, Che voi aipotágui péicha.

15Ahovasaitéta Sion hi’upyrã, ha mboriahukuérape amohyg̃uatãta pánpe.

16Ha upéicha ipa’ikuéra amondepáta tekoveteépe, ha heko potĩva ovy’aitereíta.

17Upépe ambohoky pyahu jevýta David pu’aka, ambosako’íta pe tesape che aiporavóvape g̃uarã.

18Umi hese ija’e’ỹva amondepáta ñemotĩme, ha David ra’yrã ári katu ipotýta iñakã jeguaka.