Juéces 3 - Biblia en Guaraní - ?anderuete ?e’? Por? 2015

Tetãnguéra ojehejava’ekue Canaánpe, opyta oipy’ara’ã hag̃ua Israélpe

1Ñanderuete oheja ko’ã tetã oipy’ara’ã hag̃ua Israelguakuérape, noñorãirõi ha nombopoguypái haguére Canaanguakuérape.

2Ikatu hag̃uáicha Israel ñemoñarenguéra ndoikuaáiva gueteri pe ñorãirõ rembiapo oikuaa avei.

3Umi 5 Filisteaygua ruvicha, hembýva Canaangua yvýpe, umi Sidongua ha umi Hevgua, oikóva Líbano cérrope Baalhermon cérro guive Hamat peve,

4umía opytákuri oipy’ara’ã hag̃ua Israélpe, ohechauka hag̃ua Israelguakuéra iñe’ẽrendúpa térã nahániri Ñanderuete rembiapoukapy, Ha’e ome’ẽmava’ekue ituvakuérape Moises po rupi.

5Upévare Israel ñemoñarenguéra oiko Canaangua, Hetgua, Amorgua, Ferezgua, Hevgua ha Jebusguakuéra apytépe.

6Israelguakuéra katu omenda Canaangua rajykuéra rehe, ha Israelguakuéra ome’ẽ avei itajyrakuéra Canaan ra’ykuérape, ha Israelguakuéra omomba’eguasu avei ambue tetã jarakuérape.

Otoniel oguenohẽ Israélpe Cusan-risatáim poguýgui

7Ha Israel ñemoñarenguéra oñemoangaipa Ñanderuete resa renondépe, ha hesarái hikuái Ñanderuete, Ijaraitégui, ha omomba’eguasu hikuái umi Baal ha Asera ra’ãngápe.

8Ha Ñanderuete ipochy Israelguakuéra ndive, ha ome’ẽ Cusan-risatáim, Mesopotámia retã ruvicha pópe; ha Israel ñemoñarenguéra oiko hembiguái ramo 8 áño pukukue.

9Ha Israel ñemoñarenguéra omba’ejerure asy Ñanderuetépe; ha Ñanderuete omopu’ã peteĩ pytyvõhára Israel ñemoñarenguérape g̃uarã osalva hag̃ua ichupekuéra; kóva ningo Otoniel, Cenez ra’y, Caleb ryvy imitãvéva.

10Ha Ñanderuete Pytu Porãitéva ou hi’ári, ha ha’e ombojovake aja Israélpe, osẽ oñorãirõ hag̃ua Cusan-risatáim, Mesopotámia retã ruvicha ndive, ha ipu’aka hese.

11Ha Israel opytu’u 40 áño, Otoniel, Cenaz ra’y, oikove aja pukukue.

Eud oguenohẽ Israélpe Moab poguýgui

12Israel ñemoñarenguéra ojapo jevy ivaíva Ñanderuete resa renondépe; upévare Ñanderuete omombarete Eglon, Moab retã ruvichápe opu’ã hag̃ua Israel rehe, ojapógui hikuái ivaíva Ñanderuete resa renondépe.

13Kóva oñembyaty Amon ha Amalecguakuéra ndive, ha oike hikuái Israel retãme, ha omoĩ pe táva Jerico ipoguýpe.

14Ha Israel ñemoñarenguéra oiko Eglon, Moabguakuéra retã ruvicha poguýpe 18 áño pukukue.

15Ha Israel ñemoñarenguéra omba’ejerure asýgui Ñanderuetépe, Ha’e omopu’ã ichupekuéra g̃uarã peteĩ pytyvõhára, Eud, Gera ra’ýpe, Benjamin tríbugui, péva ningo peteĩ kuimba’e ijasúva. Ha Israel ñemoñarenguéra oguerahauka Eud rupi umi impuésto Eglon, Moab retã ruvichápe.

16Ha Eud ojapouka peteĩ kyse puku hãimbe jováiva, ipuku hãimete médio métro; ha omoĩ iku’áre, ijao guýpe, ijakatúa gotýo.

17Ha ome’ẽ Moab retã ruvichápe pe impuésto; Eglon peteĩ kuimba’e ikyraitereíva.

18Ha ome’ẽmba riréma umi impuésto, omondo hapichakuérape oguerahava’ekue pe impuésto.

19Ha Eud ojevy umi jára ra’ãnga pegua ypýgui, ha he’i: Tetã ruvicha aguereko peteĩ ñe’ẽ ñemiha megua ha’eva’erãva ndéve, upéramo Eglon he’i: Ekirirĩ. Ha omosẽmba henondégui mayma oĩva guivépe hendive.

20Ha Eud oñemboja Eglon rehe oguapy jave pe koty ipiro’yvehápe, ha’e oiporúva arahaku jave. Ha Eud he’i: Aguereko Ñanderuete ñe’ẽ ndéve g̃uarã, upéramo Eglon opu’ã iguapyhágui.

21Upévo Eud oipyso ipo ijasu pegua, ha ojapyhy ikyse iku’a akatúvagui ha ombyasuru Eglon rye rehe,

22ha ikyse ýva jepeve oike hye rehe ha pe kyse ýva okañy ikyrakue apytépe, noguenohẽvéi pe kyse puku hyégui.

23Upéi Eud omboty porã pe okẽ hyepýguio ha okañy hovetã rupi.

24Upéi og̃uahẽ tetã ruvicha rembiguaikuéra, ha ohechávo pe koty rokẽ oñemboty porãha, he’i hikuái: Oiméne ojapo hemikotevẽ (oho báñope) pe koty ipiro’yvehápe.

25Ha oha’ãrõ puku rire hikuái, ha Eglon ndoipe’áimarõ ikoty rokẽ, hembiguaikuéra ogueru peteĩ lláve oipe’a hag̃ua pe okẽ ñembotyha; ha ojohu ijára re’õnguéma ojepysóva yvýpe.

26Ha ojere jere aja hikuái, Eud oñani ha ohasa umi jára ta’ãnga renda ha okañy ohóvo Seirátpe.

27Ha og̃uahẽvo Israel retãme ombopu turu Efrain cérrope, ha Israel ñemoñarenguéra oguejy joa hendive cérrogui ha ha’e oho henonderãme.

28Ha he’i ichupekuéra: Peju chendive, Ñanderuete omoĩma pende pópe, umi Moabgua, penderehe ija’e’ỹva. Ha oguejy joa hikuái hapykuéri, ha oñemoĩ hikuái pe Jordan ysyry ojehasahápe (páso) Moab retãme, ha ndohejái avavépe ohasa.

29Upéramo Israelguakuéra ojuka oiméne 10.000 kuimba’e rupi, kuimba’e ipy’aguasúva ha kuimba’e oñorãirõkuaávape; ha avave nokañýi Israelguakuéragui.

30Péicha pe ára péva guive Moab ho’a Israel poguýpe; ha Israelguakuéra opytu’u 80 áño pukukue.

Samgar og̃uenohẽ Israélpe Filisteayguakuéra poguýgui

31Eud rire Samgar, Anat ra’y, ombojovake Israelguakuérape; ha’e añoite ojuka peteĩ jevýpe 600 Filisteaygua kuimba’épe peteĩ yvyra akua gueikuéra ojekutuhápe, ha osalva Israelguakuérape.