Nehemías 9 - Biblia en Guaraní - ?anderuete ?e’? Por? 2015

Israelguakuéra oñembyasyete hembiapo vai haguére

1Pe jasy pévape, pe ára 24-hápe oñombyaty Israel ra’ykuéra karu’ỹ rehe, ao vosakue reheve ha omboja iñakã yvy rehe.

2Ha Israel ñemoñarenguéra oñemboykepáma opaite tetã ambueyguágui; ha ñembo’yhápe omombe’u hikuái hembiapo vaikue, ha ituvakuéra rembiapo vaikue.

3Ha ñembo’yhápe, omoñe’ẽ hikuái 3 hóra Ñanderuete, Ijára rembiapoukapy, ha upéi 3 hóra pukukue oñemombe’u joa hembiapo vaikuére ha oñesũ hikuái Ñanderuete, Ijára renondépe.

4Upéi umi Levigua ojupi pe pyrenda ári, Jesúa, Bani, Cadmiel, Sebanías, Buni, Serebías, Bani ha Quenani, ha hatã oñembo’e Ñanderuete, Ijárape.

5Ha he’íkuri umi Levigua, Jesúa, Cadmiel, Bani, Hasabnías, Serebías, Hodías, Sebanías ha Petaías: Pepu’ã joaite ha pemomba’eguasu Ñanderuete, pende Járape, ára atyguasu guive ambue ára atyguasukuéra peve, pemomba’eguasu héra ituichaitevéva opaichagua ambue terakuã porãgui.

6Nde añoite ningo ore Ruete, Nde rejapova’ekue yvagakuéra, ha pe yvága ijyvatevéva opaite imba’eita hyepy pegua reheve; yvy ha opaite mba’e ipy peguáva guive, umi yguasu ha opaite mba’e ipype oĩva guive ha Nde remoingovereína opaite ko’ã mba’e, ha ángel aty yvagakuéra pegua omomba’eguasu joa nde réra.

7Nde ningo ore Ruete, pe Jára oiporavova’ekue Abrámpe ha oguenohẽva’ekue ichupe Ur, Caldéa.

8Ha rejohúkuri ha’e ipy’aite guive ojeroviaha nderehe ha reme’ẽma ichupe pe ñe’ẽ reme’ẽtaha Canaangua yvy, Hetgua yvy, Amorgua yvy, Ferezgua yvy, Jebusgua yvy ha Gergesgua yvy, opaite ko’ã yvy reme’ãtaha ichupe ha iñemoñarenguérape; ha rejapókuri pe mba’e eremava’ekue, nendive oĩgui pe añetegua.

9Ha rema’ẽva’ekue ore rukuéra jepy’apy asy rehe Egíptope, ha rehenduva’ekue ijerure asy pe Yguasu Pytãme (Mar Rójope).

10Ha rejapókuri techaukaha (señal) ha tembiapo techapyrãva faraon rehe ha opaite hembiguaikuéra rehe, ha opaite hetãyguakuéra rehe reikuaa porãgui oñembotuichaha; ha upéicha rembotuicha ne rerakuã, oĩ háicha ko ára kóva peve.

11Remboja’o pe yguasu henondepekuéra, ha ohasa hikuái imbyte rupi yvy ikãha rupi; ha umi imuñahárape reityva’ekue pe y ipypukuvehápe, ho’apava’ekue ku itáicha pe y ipypukuvehápe.

12Arai reheve reisãmbyhy ichupekuéra arakuépe ha arai tata reheguávare pyharekuépe, ohesape hag̃ua ichupekuéra hape henonderãme.

13Ha reguejyva’ekue pe Sinai cérro ári, ha reñe’ẽ hendivekuéra yvága guive, ha rehekombo’e ichupekuéra pe heko peguáva ha ne rembiapoukapy iporãitéva rehe.

14Nde remoĩ ichupekuéra pe pytu’uha ára omboarete hag̃ua ndéve g̃uarã, ha Moises ne rembiguái po rupi reme’ẽ ichupekuéra ne kuatiañe’e ojehaihápe ne rembiapoukapykuéra.

15Iñembyahýi ramo reme’ẽ ichupekuéra pan yvagaguiguáva, ha ijy’uhéi ramo reguenohẽ ichupekuéra y itaguasúgui; ha ereva’ekue ichupekuéra oike hag̃ua Canaan retãme oñemomba’e hag̃ua pe yvy rehe, upévare Nde rehupiva’ekue nde po rehechauka hag̃ua añetehápe rejapotaha avei opaite mba’e Nde reprometeva’ekue.

16Ha’ekuéra ha ore rukuéra avei oñembotuicha, ha ojetu’u, ha ndojapói hikuái ne rembiapoukapykuéra.

17Nohenduséi hikuái, ha naimandu’avéi umi tembiapo techapyrãva rehe rejapova’ekue hesehapekuéra; upévare ojetu’u hikuái, ha oñemoĩ nderehe jepe, imburuvicha ojevyse oiko hag̃ua tembiguái ramo Egípto retãme. Ha Nde ningo peteĩ Jára operdonáva, ipy’a porãva ha oporoporiahuverekóva, hasy ndepochy hag̃ua, ha nde py’a porãitereígui, reperdona jevy jey ichupekuéra.

18Ha avei ojapo ramoguare hikuái pe torora’y ra’ãnga mba’eykupyrégui ha he’i ramoguare hikuái: Kóa ha’e ore jára ore renohẽva’ekue Egíptogui; ha’ekuéra ojapo mba’evaietereirasáva ne renondépe,

19upeichavéramo jepe, Nde reiporiahuverekoite ichupekuéra ha reperdona ichupekuéra pe desiértope. Nde arai ndojeíri ijypyguikuéra arakuépe, oisãmbyhy hag̃ua ichupekuéra haperã rehe, ha pyharekuépe pe arai tata reheguáva ohesape, ohecha hag̃ua haperã.

20Nde rembou nde Pytu Porãitéva ombo’e hag̃ua ichupekuéra, ha ndereipe’ái ijuruguikuéra ne mana (tembi’u) ha reme’ẽ ichupekuéra y ombogue hag̃ua ijy’uhéi.

21Remongaru ichupekuéra 40 áño pukukue pe desiértope; mba’evete ningo noikotevẽi hikuái; ijaokuéra jepe ndaitujái ha ndairurúi ipykuéra.

22Ha reme’ẽ ichupekuéra yvy tuichaitéva ambue tetãnguéra mba’ekue, ha remboja’opa ichupekuéra ijyvykue imba’erã ramo: Sehon yvy, Hesbon retã ruvicha yvy, ha avei Og, Basan retã ruvicha yvy.

23Rembohetaiterei ita’yrakuéra ku mbyjakuéra árare oĩváicha, ha regueraha ichupekuéra pe yvýpe Nde ereva’ekuére ituvakuérape oikeva’erãha ipype oñemomba’e hag̃ua hese.

24Ha ita’yrakuéra og̃uahẽvo oñemomba’e pe yvy rehe, ha Nde rembopoguy henondepekuéra umi Canaan retãnguérape hetã ruvichakuéra ndive, ojapo hag̃ua hikuái ichuguikuéra ojaposéva guive.

25Ha ombopoguy hikuái itavakuéra oñemo’ã porãva ha kokue yvy iporãitéva, ha opytákuri ichupekuéra ogaita henyhẽtéva mba’e porãitágui, yendakuéra ojejapopapyréva, parralty ha olivoty, ha heta yvyra hi’a porãva, ha ipy’a rory hikuái opaite ne mba’e porãita reheve rembosako’iva’ekue ichupekuéra g̃uarã.

26Upéi katu oñemoĩ, ha opu’ã nderehe, ha ne rembiapoukapykuéra omombo hikuái ijatukupe gotýo, ha ojuka hikuái nde profetakuéra oikóva guivépe ijapytepekuéra ha oguatava’ekue hekoitépe nde rapykuéri, ha upéicha oñemohembiapo vaive ohóvo ne renondépe.

27Upémaramo remoĩ ichupekuéra hese ija’e’ỹva poguýpe, ha umíva oipy’apy asy ichupekuéra. Ha hi’angekõi vaieteha árape osapukái asy hikuái ndéve, ha Nde rehendu jevy ichupekuéra yvága guive; ha ituichaitégui nde poriahuvereko rembou peteĩ oguenohẽva’erãva ichupekuéra hese ija’e’ỹvakuéra poguýgui.

28Ha’ekuéra oiko ramo py’aguapýpe, ojapo jevy jey ivaíva ne renondépe, ha upévare reheja ichupekuéra ho’a hag̃ua hese ija’e’ỹvakuéra poguýpe; ha ojere osapukái asy jevy ndéve hikuái, ha Nde, yvága guive, rehendu jevy ichupekuéra ha nde poriahuvereko rupi heta jevy resalva ichupekuéra.

29Nde heta jevy remomandu’auka porã ichupekuéra ojevy hag̃ua nde rapére, ha’ekuéra katu hetaiterei ojererovu rei, ha nohendúi ne ñe’ẽ, oñemohembiapo vai uvei hikuái omboykévo ne rembiapoukapy. Nde ereva’ekue Israelguakuérape ojapo ramo ne rembipota oikoveva’erãha, ha’ekuéra katu opu’ã, ojetu’u ha naiñe’ẽrenduvéi.

30Heta áño pukukue regueropu’aka ichupekuéra, ha reñe’ẽ ichupekuéra nde Pytu Porãiteva rupi ha nde profetakuéra rupi, ha nohenduséi hikuái, ha upévare Nde remoĩ ichupekuéra ko yvy ape arigua tetãnguéra poguýpe.

31Ha nde poriahuvereko ituichaitereígui nerehundíri ichupekuéra, ha nderepoíri ichuguikuéra; Nde ningo peteĩ Jára ipy’a porãitéva ha oporoporiahuverekóva.

32Ha ko’ág̃a, ore Jaratee, ore Ruete tuichaitéva, imbaretéva, kyhyjepýva, rejapóva katuete opaite mba’e reprometeva’ekue ha reiporiahuverekóva, ehechakuaa ore retã ruvichakuéra ha ore mburuvichakuéra jehasa asy, ore pa’ikuéra ha ore profetakuéra jepy’apy, ore rukuéra ha ore retãyguakuéra jehasa asy, umi Asíria retã ruvicha ára guive ko ára kóva peve.

33Nde reiko hekoitépe orendive ha opaite mba’e ojehúva guive oréve rejapo porã, ore katu roñemboheko vaiete ne renondépe.

34Ore retã ruvichakuéra, ore mburuvichakuéra, ore pa’ikuéra ha ore rukuéra ndojapói ne rembiapoukapy ha ndojapysakáikuri ne ñe’ẽnguéra rehe, ha Nde reavisa porã ramojepe ichupekuéra ha’ekuéra nemboykete.

35Nde reipytyvõ ore retã ruvichakuérape ha reme’ẽ heta mba’eporãite ore rukuérape, ha pe yvy tuichaite ha iporãitéva remoĩ henondepekuéra imba’erã ramo, upeichavéramo jepe ndoikoséi ne rembiguái ramo, ndopoiséigui hikuái heko vaígui.

36Ha ko’ág̃a ore roiko tembiguái ramo ko ára kóvape, ko yvy Nde reme’ẽva’ekuépe ore rukuérape ho’u hag̃ua hikuái hi’a porãngue ha mba’e porã ipypeguágui.

37Opaite mba’eporã reme’ẽva’ekue oréve opytapa ko’ág̃a umi tetã ruvichápe g̃uarã Nde remoĩva’ekue ore ári ore roñemohembiapo vaígui, ha umíva oñemomba’e orerehe ha ore rymbakuéra rehe, ha’ekuéra oipota haichaite, ha upévagui roime jepy’apy vaiguasuetépe ko’ág̃a.

Judayguakuéra ome’ẽ iñe’ẽ ojapotaha Ñanderuete rembiapoukapy

38Ha opaite ko’ã mba’e rupi, añetehápe ore rome’ẽse ore ñe’ẽ rojapotaha ore Ruete rembiapoukapy ha upévare ore rohai peteĩ kuatiañe’ẽ ore Ruete renondépe, ha ore mburuvichakuéra, ore Leviguakuéra ha ore pa’ikuéra omoĩ héra ko kuatiañe’ẽme.