Salmokuéra 88 - Biblia en Guaraní - ?anderuete ?e’? Por? 2015

Mba’ejerure asy oguenohẽ hag̃ua ñemanógui - Core ra’ykuérape g̃uarã

1Nde, che Ruete, che Jára, che pytyvõhára, ára ha pyharekuépe amba’ejerure asy ne renondépe.

2Tog̃uahẽmi che ñembo’e nde ypýpe, ejapysakamína che mba’ejerure asy rehe.

3Che ánga hyg̃uatãma mba’evaietágui, ha che rekove hi’ag̃uíma omanóva retãgui.

4Aikóma peteĩ omanombotávaicha, aikóma ku kuimba’e imbareteve’ỹvaicha.

5Che rupa oĩtama omanóva apytépe, ojekutuva’ekuéicha kyse pukúpe ha ojepyso joávaicha ityvýpe, (sepultúrape) umívare Nde nanemandu’avéima, ha ojepe’áma nde pógui.

6Nde chereity yvykua ruguápe, ipypuku ha iñypytũháme Nde chemombova’ekue.

7Cheári ho’a nde pochy ha opaite nde jepy’ara’ã rupi chepy’apy asy. Selah

8Remomombyrypa chehegui che irũnguéra, ojeguaru ningo hikuái chehegui aikoháre ñeñapytĩmbýpe cárcelpe ha ndaikatuvéi asẽ.

9Che resakuéra hasypa ajepy’apyetereígui, rohenói jepi, Nde, che Ruete, ko’ẽ ko’ẽ rehe che añembo’e’aína ndéve.

10Rehechaukánepa nde pu’aka umi omanova’ekuépe térãpa opu’ã jevýnepa umi omanova’ekue nemomba’eguasu hag̃ua. Selah

11Oñemombe’u piko tyvy ryepýpe nde poriahuvereko, térã oñeñe’ẽnepa ne mborayhu rehe umi omanóva oĩháme.

12Oñemombe’únepa iñypytũháme ne mba’e techapyrãva, térã oñeñe’ẽnepa nde justícia rehe umi omanóva oĩháme.

13Che katu amba’ejerure asy’aína ndéve, che Ruete, ha che ñembo’e og̃uahẽ (meme) pyharevekuépe ne renondépe.

14Mba’érehe piko, Nde, che Ruete, remboyke che ánga. Mba’érehe piko reñomi chehegui nde rova.

15Cherasy ha ajepy’apyeterei, che mitãrusu guive akyhyje ndehegui ha aiko ñemondyihápe.

16Nde reity che ári nde pochy, ha nde jehavira chejopy asy.

17Umía ýicha tapiaite ojerepa cherehe cheñu’ãmba hag̃ua.

18Remomombyrypa chehegui che irũnguéra ha cherayhúva ojeíma chehegui, pe pytũmante opyta che irũ ramo.