Apocalípsis 2 - Biblia en Guaraní - ?anderuete ?e’? Por? 2015

Ñe’ẽ umi 7 iglésiape

g̃uarãPe ñe’ẽ Efésope g̃uarã

1Ehai Eféso iglésia rembijokuáipe g̃uarã: Péicha he’i pe ojokóva umi 7 jasytata ipo akatúape, ha pe oikóva umi 7 tataindyenda oroguiguáva apytépe.

2Aikuaa porã ningo nde py’apýpe oĩva, ne rembiapokue ha nde paciéncia, ha aikuaa avei nde ndaikatuiha reaguanta iñañávape, ha reñeha’ãmba reikuaa porã hag̃ua umi og̃uahẽvape ne rendápe Ñanderuete remimbou añeteguápa térã gua’unteha, ha remboyke hague umi ijapúva ha ndaha’éiva Che remimbou.

3Nde rejerovia porã cherehe, rehasa asy ramojepe, ha heta remba’apova’ekue cherehehápe nekane’õ’ỹre.

4Opáichavo Che ambyasy nde repoi haguére ne mborayhu ñepyrũmbyguarégui.

5Nemandu’áke mamóguipa re’ára’e ha eñembyasy, rejapo vai haguére, ha ejapo jevy umi tembiapo ñepyrũguaréva, upeicha’ỹrõ ajúta ne rendápe ha aipe’áta ne rataindyenda hendágui, ne rembyasýirõ rejapo vai haguére.

6Chembovy’a katu nde nderehayhuiha umi Nicolaygua rembiapo, umíape Che ndahayhúi avei.

7Pe ijapysáva tohendu pe Pytu Porãmbáva he’íva ijiglésiape: Pe ombopoguýva mba’evai che voi ame’ẽta ichupe pe tekove yvyra’a oĩva Ñanderuete yvyraty hi’a porãitéva mbytépe.

Pe ñe’ẽ Esmírnape g̃uarã

8Ehai Esmírna iglésia rembijokuáipe g̃uarã: Péicha he’i pe Iñepyrũha ha pe Ipaháva, pe ojejukava’ekue ha oikove jevýva.

9Che ningo aikuaa porã ne rembiapokue, nde jehasa asy ha ne mboriahukue (ne mba’eita ramojepe) ha umi Judayguakuéra oñe’ẽvaiha nderehe, ndaha’éi ramojepe Judaygua añeteguáva, Satana iglesiaygua uvei katu.

10Anítei rekyhyje rehasa asyvétavagui. Eikuaa porãke, Satana oitýta cárcelpe hermanokuéra pende apytégui ohasa asy hag̃ua 10 ára (día) pukukue pendepy’ara’ã hag̃ua. Ejeroviaite, remano meve ha Che ame’ẽta ndéve pe tekove rehegua akã jeguaka.

11Pe ijapysáva tohendu, pe Pytu Porãmbáva he’íva ijiglesiakuérape. Upe ombopoguýva mba’evai natekotevẽi okyhyje pe ñemano mokõihágui.

Pe ñe’ẽ Pérgamope g̃uarã

12Ehai Pérgamo iglésia rembijokuáipe g̃uarã: Péicha he’i pe oguerekóva pe kyse akua pukuete ha hãimbe jováiva ipópe:

13Che aikuaapa nde rejapóva guive ha nde róga oĩha Satana oisãmbyhyhápe, nde katu rejerovia porã cherehe ha nderepoíri chehegui ojejuka ramojepe umi árape Antípas, che rechahare heko peguáva.

14Areko jepe peteĩ mba’e Che ahayhu’ỹva: Oĩ ningo pende apytépe ohayhúva umi mba’e Balaam ombo’eva’ekue, ha’e he’i ramoguare Balácpe mba’éichapa omoñepysãngava’erã Israel ra’ykuérape ho’ukávo ichupekuéra so’o oñekuave’ẽmbyréva jára gua’ukuérape ha oiko hag̃ua ambue kuñakuéra ndive.

15Upéicha ningo rereko avei nendive umi ohayhúva umi mba’e Nicolas ombo’eva’ekue.

16Upévare eñembyasýke, ha epoi ne angaipágui, upeicha’ỹ ramo, pya’e ajúta ne rendápe ha añorãirõta hendivekuéra che kyse pukuete reheve osẽva che jurúgui.

17Pe ijapysáva tohendu pe Pytu Porãmbáva he’íva ijiglesiakuérape: Pe ombopoguýva pe mba’evai, Che ame’ẽta ichupe pe mana ñemimby ha ame’ẽta avei ichupe peteĩ ita morotĩ ojehaihápe héra pyahu avave oikuaa’ỹva, pe ohupitývamante.

Pe ñe’ẽ Tiatírape g̃uarã

18Ehai Tiatíra iglésia rembijokuáipe g̃uarã: Péicha he’i Ñanderuete Ra’y, hesa hendýva tata rendýicha ha ipy ojoguáva bróncepe:

19Che aikuaa porã ne rembiapokue, ne mborayhu, nde jerovia, ha reporopytyvõha, reha’ãrõkuaaha ha ko’ág̃a remba’apoveha rejerovia ñepyrũ ramoguarégui.

20Ndahayhúi katu Jezabel rembiapo, he’íva ijehe oñe’ẽha pende Ruete rérape, ha reheja ichupe ombo’e hag̃ua che rembiguaikuérape oiko hag̃ua ambue kuña ndive ha ho’u hag̃ua so’o oñekuave’ẽmava’ekue ambue jarakuérape.

21Heta aha’ãrõ oñembyasy hag̃ua, ha’e katu ndopoiséi heko vaígui.

22Eikuaa porãke, Che aitýta ichupe tupápe ha ambohasa asyetéta ichupe ha avei umi oñemongy’ava’ekuépe hendive, opoi’ỹ ramo hembiapo vaígui.

23Imembykuéra ajukapáta. Upéicha opaite iglésia oikuaáta Che voi aikuaaha opaite mba’e oĩva guive yvyarigua akãme térã ipy’apýpe, ha Che amyengoviáta peteĩteĩme hembiapokue.

24Che katu ha’e peẽ ambuekuérape, peẽ peiméva Tiatírape, ha nomokõiva ko Satana mbo’epy ipypukuetéva, he’i háicha hikuái. Ndaitymo’ãi pende’ári ambue mba’e ipohýiva.

25Umi mba’e peguerekóva katu peñongatu porãke pende py’apýpe Che aju jey peve.

26Oimeraẽ ombopoguýva pe mba’evai ha ojapóva Che rembipota ipaha peve, Che ame’ẽta ichupe pu’aka oisãmbyhy hag̃ua umi tetãygua ojerovia’ỹvape.

27Ha ha’e oisãmbyhýta ichupekuéra varílla hierroguiguávape ha ojokáta ichupekuéra, ojeka háicha kambuchi ñay’ũguiguáva.

28Che ahupitypa haguéicha ko pu’aka kóva che Rúgui, upéicha Che ame’ẽ jevýta ichupekuéra ha hi’ári ame’ẽta ichupekuéra pe jasytata ko’ẽju megua.

29Pe ijapysáva tohendu pe Pytu Porãmbáva he’íva ijiglesiakuérape.