Deuteronómio 12 - Biblia en Guaraní - ?anderuete ?e’? Por? 2015

Pe yvy oñemboykéva Ñanderuetépe

1Ko’ãva hína umi mbo’epy ha tembiapoukapykuéra, peñangareko ha pejapova’erãva hekoitépe peikove aja pukukue upe yvy upévape.

2Peẽ pehundipaiteva’erã umi yvy pehẽngue Canaan retãyguakuéra omomba’eguasu haguépe ijarakuérape, opytáva cérro ári, térã cérro yke rupi, térã umi yvyra kakuaaitéva guýpe.

3Peitypaiteva’erã ikuave’ẽmby rendakuéra ha pejokapaiteva’erã ijára ra’ãngakuéra ha ijaséra ra’ãnga pehapypava’erã, opaite mba’e ha’ekuéra omomba’eguasúva guive pembyaipava’erã, avave imandu’ave’ỹ hag̃ua umi yvy pehẽngue réra rehe jepe.

4Anítei pemomba’eguasu Ñanderuetépe, ambue tetãnguéra omomba’eguasu háicha ijarakuérape.

5Pe yvy pehẽngue Jahve, pende Ruete, oiporavóma oñemomba’eguasu hag̃ua héra porãite, upépente peẽ pehóta pemomba’eguasu hag̃ua ichupe.

6Ha upépente peguerahava’erã pene kuave’ẽmby ojehapypáva, pene diézmo, pene kuave’ẽmby ñemyengovia reheguáva, pene kuave’ẽmby ojehapypáva, ha pene me’ẽmby pendejeheguiete peikuave’ẽséva, ha pende tóro, pende ovecha ha kavara tenondeguáva;

7upépe pekarúta Jahve, pende Ruete renondépe, ha pevy’áta peẽ pende rogayguakuéra ndive opaite mba’eporãme Jahve, pende Ruete, ome’ẽtava peẽme ijehovasa rupi.

8Canaan retãme pemomba’eguasu Ñanderuetépe Ha’e oipota háicha ha Ha’e he’i haguéicha peẽme, ndaikatuvéima peteĩteĩ omomba’eguasu Ñanderuetépe ha’e voi oimo’ã ha oipota háichante.

9Ne’ĩra gueteri peike pe pytu’uha yvýpe Jahve, pende Ruete, ome’ẽtava peẽme.

10Pehasa rire pe Jordan peikéta pe yvýpe Jahve, pende Ruete ome’ẽtava peẽme pene mba’eteerã; Ha’e penemombytu’úta opaite penderehe ija’e’ỹvagui, oikóva guive pende jerekuévo, ha peikóta kyhyje’ỹme pene retãrãme.

11Ha pe yvy pehẽngue Ñanderuete oiporãvóma omopu’ã hag̃ua hóga jojohuha, upépe peguerahava’erã opaite mba’e che ha’éva guive peẽme: Pene kuave’ẽmby ojehapypáva, pene diézmo, pene kuave’ẽmby ñemyengovia reheguáva ha opaite pene me’ẽmby peme’ẽséva guive pendejehegui Ñanderuetépe g̃uarã.

12Ha upépe pevy’a joava’erã pende Ruete renondépe, peẽ, pende ra’ykuéra, pende rajykuéra, pene rembiguái kuimba’e ha kuñakuéra ha umi Levigua oikóva pende apytépe; ha’ekuéra ndoguerekomo’ãigui penendive ilotekuéra, imba’eteerã.

13Peñangarekóke ani peikuave’ẽ pene kuave’ẽmby ojehapypáva mamo peẽ voi peiporavosehápe.

14Pe yvy pehẽngue Ñanderuete oiporavo haguépente, peteĩ pende tríbu apytégui, upépe peikuave’ẽva’erã pene kuave’ẽmby ojehapypáva ha upépe pejapova’erã opaite mba’e Ñanderuete he’íva guive peẽme.

15Ha upéicha ramojepe, ikatu pejuka ha pe’u so’o opaite táva peikoha rupi, pe’use hag̃uáicha, ha Jahve, Ñandejára penepytyvõ haguéicha; taha’e kuimba’e térã kuña, ipotĩ’ỹva ha ipotĩva ikatu ho’u guasu ro’o ramoguáicha.

16Tuguy añoiténte ndape’uiva’erã, ýicha peñohẽva’erã yvy apére.

17Pe táva peikohápe ndape’uiva’erã pe diézmo pene mba’e ra’ỹinguégui, térã pene vínogui, térã pende acéitegui térã pende tóro, térã ovecha, térã pende kavara tenonde peguágui, térã umi me’ẽmby peñe’ẽme’ẽ haguégui, térã kuave’ẽmby pendejehegui peikuave’ẽsévagui, térã umi kuave’ẽmby ñemyengovia reheguávagui.

18Ñanderuete, pende Jára renondépe, pe yvy pehẽngue Ha’e oiporavomahápe, upépente pekaruva’erã peẽ, pende ra’y, pende rajy ha pene rembiguái kuimba’e ha kuñáva, ha avei umi Levigua oikóva pende apytépe; pevy’a hag̃ua Ñanderuete renondépe, opaite mba’e Ha’e ome’ẽmava reheve ndéve nde po rembiapo rupi.

19Peñangarekóke pendejehe ani pemotyre’ỹtei pendejehegui Leviguakuérape peikove aja pukukue ko yvy apére.

20Ág̃a Ñanderuete ombotuichavévo pene retã, Ha’e he’i haguéicha peẽme, ha peje ramo: Ro’use so’o ro’use háicha, upérõ pe’ukuaa pe’use háicha.

21Ha mombyry ramo pendehegui pe yvy pehẽngue Ñanderuete oiporavótava omopu’ã hag̃ua hóga jojohuha upéramo ikatu pejuka pende vaka ha ovecha atýgui Ñanderuete ome’ẽtava peẽme, ha pende rógape pe’u haichaite.

22Oje’u háicha guasu ro’o, péicha pe’ukuaa; pe kuimba’e térã kuña, ipotĩ’ỹva ha ipotĩva, ho’ukuaa ichugui.

23Peñeñangarekóke ani hag̃ua pe’u tuguy, tuguýpe ningo oĩ pe tekove, upévare ndape’uiva’erã pe tekove (ánga) ho’o reheve.

24Ndape’uiva’erã tuguy, yvýpe peñohẽva’erã ýicha.

25Ndape’uiva’erã tuguy, oho porãmba hag̃ua peẽme ha pene ñemoñarenguérape g̃uarã, pejapopávo hekoitépe Ñanderuete oipota háicha.

26Umi me’ẽmby reme’ẽséva Ñanderuetépe ha pene kuave’ẽmbynguéra katu pegueruva’erã pe yvy pehẽngue Ñanderuete oiporavomahápe.

27Pegueru pene kuave’ẽmby ojehapypáva, ho’o ha huguy reheve, Ñanderuete kuave’ẽmby rendápe; pe tymba ruguykue katu oñeñohẽva’erã Ñanderuete kuave’ẽmby renda ári, ha ho’ógui pe’ukuaa.

28Pehendu ha pejapopa hekoitépe Che ha’éva guive peẽme, pende Jára resa renondépe oho porãmba hag̃ua opaite árape peẽme ha pene ñemoñarenguérape g̃uarã.

Ñemomarandu ani hag̃ua oñemomba’eguasu ambue járape

29Ág̃a Ñanderuete ohundipáma ramo umi tetã pene renondépe oĩva, peñemomba’e hag̃ua ijyvýre pene mba’etee ramo ha peiko ramo ipype,

30peñangarekóke pendejehe ani hag̃ua peñepysãnga peikuaaségui avei mba’éichapa ha’ekuéra omomba’eguasúra’e ijarakuérape ha upéi peẽ peje: Umi tetãyguakuéra omomba’eguasu haguéicha ijarakuérape, peichaite ore romomba’eguasuse avei (ambue járape).

31Péicha ndapejapoiva’erã Jahve, pende Jára renondépe. Heta mba’e ivaíva Ñanderuete ndohayhúi, ha’ekuéra ojapova’ekue ijarakuérape: Ohapy hikuái ita’yrakuéra ha itajyrakuéra jepeve ijarakuérape g̃uarã.

32Peñangarekóke pejapo hag̃ua hekoitépe opaite mba’e Ñanderuete he’imava’ekue guive peẽme; napemoĩveiva’erã ni ndapeipe’aveiva’erã mba’eve iñe’ẽgui.