Provérbios 8 - Biblia en Guaraní - ?anderuete ?e’? Por? 2015

Pe arandu iporã ha tapia oikova’erã

1Pejapysaka porãke, pe arandu penerenóima ha pe akãguapy porã ñe’ẽ oñehendúma.

2Pe tape yke ijyvatehápe, umi tape po’i ojoasahápe oñembo’y ha’e,

3umi okẽ oĩháme pe táva ojeikehápe, umi okẽ ojeikehápe osapukái:

4Peẽ kuimba’ekuéra, peẽme asapukái asy ha amondo che ñe’ẽ kuimba’e ra’ykuérape,

5peikuaákena pe arandu peẽ pendevýrova gueteri, ha peẽ itavýva pejapyhy akãguapy porã,

6pehendúkena, ha’étava guive mba’e iporãmba jepéva, ha ajejurupe’átava mba’e hekoite peguáva ha’e hag̃ua,

7che juru he’íta pe añetegua, ha che rembekuéra omboyke pe ñaña reko,

8che juru he’íva guive mba’e hekoite peguáva; ndaipóri ipype tie’ỹ ñaña ni mba’e ikarẽva,

9ha’éva guive hekoite pegua umi oikuaasévape g̃uarã, ha mba’e hekoite pegua meme umi arandu ojohuva’ekuépe g̃uarã,

10pejejapyhy che rekombo’e rehe ha ani pirapire rehe; pejejapyhy arandu rehe óro potĩ rãngue rehe,

11pe arandu ningo iporãve ita vera hepyvévagui; ha mba’eve ndaikatúi oñembojoja hese.

12Che, pe arandu, aiko pe akãguapy ndive, ha che jepy’amongeta ikatupyry,

13upe okyhyjéva Ñanderuetégui ojahéi ñaña reko rehe: Ñembotuicha ha teko jejapo rehe, pe tape vai ha pe juru tie’ỹ ñaña rehe (he’i Ñanderuete).

14Chendive oĩ tekombo’e ha akãguapy porã; che ha’ehína pe arandu, ha ajaposéva guive ajapo avei.

15Che aisãmbyhy tetã ruvichakuérape, ha amohenda porã mburuvicha rembiapoukapykuéra.

16Chérupi oñeme’ẽ mburuvichakuérape pu’aka ha chérupi opaite tetã sãmbyhyhára ombojovake porã tetãnguérape,

17che ahayhu umi cherayhúvape, ha umi cherekáva chejohúta avei katuete,

18mba’erepyeta ha terakuã porã oĩ chendive, mba’erepyeta oikuaa’ỹva ha ñembojovake oĩ chendive avei,

19upe hi’áva chehegui iporãve óro ipotĩetévagui ha che amono’õva iporãve óro morotĩ poravopyrégui.

20Che aguata’aína teko potĩ rape po’i rehe, ha añemongu’e akãguapy reko rape mbyte rehe,

21ikatu hag̃uáicha umi cherayhúva oguereko imba’erã ha che amyenyhẽ hag̃ua imba’e repyeta ryru.

22Ymaite guive Ñanderuete cheapova’ekue hape ñepyrũme, che ningo hembiapo tenondegua,

23oñepyrũ mboyve umi ára aty guasu Ha’e cheapo, pe yvy oiko mboyve che aĩma,

24umi yguasuete arai pegua mboyve añemoheñoimava’ekue; umi yeta ykua pegua mboyve che aikomava’ekue,

25umi cérro rusu ojejapo mbove umi cérro mboyve, che añemoheñoimava’ekue,

26upérõ Ha’e ne’ĩra gueteri ojapókuri pe yvy, ni ñunguéra, ha ne’ĩra gueteri oĩ pe yvy timbo jepe,

27ojapo ramoguare umi yvága, upépe aĩma che; Ha’e omboja’o ramo pe yvy ha pe yguasuete aĩma che avei,

28Ñanderuete omohenda ramoguare umi arai ára rehe ha omohenda ramoguare umi yvu tenondegua aikóma che avei,

29omohembe’y ramoguare yguasu, ani hag̃ua umi yeta ohasa hembe’y Ha’e omoĩma ramoguare ko yvy ropyta (horcon).

30Hendive aĩma che, amohendapa hag̃ua opaite mba’e, ko’ẽ ko’ẽ rehe chepy’arory Ñanderuete ndive aguerekóvo py’aguapy ijypýpe opaite ára,

31chepy’aroryete yvy apére, ha avy’aite umi yvyarigua ra’ykuéra ndive,

32ko’ág̃akena ta’yrakuéra pecherendumi, ovy’aite umi oñeha’ãva oiko hag̃ua che rape rehe,

33pejapysaka porãke che rekombo’e rehe peẽ penearandu hag̃ua, ha ani peha’arõtei,

34ovy’aite pe kuimba’e cherendúva, ha oha’arõva che rokẽme ko’ẽ ko’ẽ rehe, ha oñangarekóvo che rokẽ horcon rehe,

35upe chejohúva ningo, ojohúma pe tekove, ha ohupityva’erã Ñanderuete py’aporã,

36ha upe opiáva che rapégui, katuete ombyaipáta hi’ánga; umi chemboykéva omanoséguinte péicha oiko.