1Ko’ág̃a, nde Jacóbo, pende Ruete rembiapo, nde apohare he’iuka ndéve: Ani rekyhyjétei, Che roperdonáma; Che rohenói nde réra rupi, nde ningo che mba’énteva voi.
2Rehasa ramojepe hi’y hetaite rupi, Che aĩta nendive, ha ysyry ndetuicháva nderupity ramojepe nanembojahogamo’ãi. Rehasa ramojepe tata mbyte rupi, nderekaimo’ãi, ha pe tata rendy nanderapymo’ãi.
3Che, nde Ruete, Che voi ningo nde Jára, Israel Jára, Che roipytyvõta; ne rendaguépe Che ame’ẽma Egípto, Etiopía ha Sebápe (Círo pópe).
4Re’a porãitereígui che resa renondépe, cherakate’ỹ nderehe, ha Che rohayhu; upévagui ame’ẽta kuimba’ekuéra ha tetãnguéra nde rekove rehe.
5Ani rekyhyjétei, Che aĩgui nendive; kuarahyresẽguio aguerúta ne ñemoñarenguérape, ha kuarahyreikéguio ambyatýta ichupekuéra.
6Ha’éta nórtepe: Eme’ẽ jevy; ha súrpe ha’éta: Aníke rejoko avavépe, eru jevýke che ra’ykuéra mombyry guive ha che rajykuéra yvy apýra guive.
7Oimeraẽ oñembohérava che réra rupi (agueruka jevýta Israel retãme). Umía ajapo ypyva’ekue che rerakuã porã rehehápe, umía toupaite chemomba’eguasu pyahu hag̃ua.
8Peguenohẽ jevy pe tetã ohecha’ỹva, hesa ramojepe, ha pegueru umi ohendu’ỹva, ijapysa ramojepe.
9Oñembyatypáma tetãnguéra, ha oñemboja hikuái peteĩ atyguasuetépe. Máva piko ijapytépe ikatu omombe’u ko’ã mba’e, ha mávapa ikatu ohenduka ñandéve umi mba’e tenondeve g̃uarãva. Togueru hikuái hechaharekuéra ohechauka hag̃ua heko porãha ha ambuekuéra ohendupa rire he’ikuaa: Añete ningo pe Ha’e he’íva.
10Peẽ ningo che rechahare, he’i pende Ruete, ha che rembiguaikuéra, Che aiporavomava’ekue. Peẽ chekuaa ha pejerovia cherehe, ha peikuaa porã ndaiporiha ambue Jára; Che mboyve ndojejapói ambue jára, ha Che aikota’aína opa rire umi jára gua’u paha.
11Chénte pende Jára ha che’ỹre ndaipóri avave ikatúva peneguenohẽ pende jehasa asýgui.
12Che amombe’uka ha poikuaaukava’ekue che réra, ha Che poipytyvõva’ekue oĩ mboyve ambue jára pende apytépe. Peẽ voi che rechahare, he’i yvága Jára, Chénte apytava’erã tapia g̃uarã yvága ha yvy Jára ramo.
13Ko ára kóva ha’e jevy: Ndaipóri avave ikatúva ohekýi peteĩ mba’e che pógui. Ha umi mba’e ajaposéva, katuete ajapóta avei, ha ndaipóri avave ikatúva chejoko.
14Péicha he’i yvága Jára, Israel Jára Porã, Chémante posalváta: Penderehehápe amondova’ekue ichupe Babilóniape, omokañy hag̃ua ichupekuéra, ha umi Caldeaygua okañy avei ibarcoguasukuérape, umía rupi oñembotuichava’ekue.
15Che voi ningo pende Ruete, pe Heko jajaipáva, Israel apohare, pene retã ruvichaguasu.
16Péicha he’i pende Ruete, penembohapéva yguasu rupi ha ombosako’iva’ekue pe tape po’i y ipochyveha rupi.
17Che voi aheja osẽ hag̃ua icárro, ikavaju, isoldádo aty ipu’aka reheve, aity hag̃ua ha ho’a opu’ãve’ỹ hag̃uáicha; oguepa hag̃ua hikuái, ku tataindy ogue háicha.
18Ani peñemomandu’átei umi mba’e ohasamava’ekue rehe, ha ani peguerútei pene akãme umi mba’e ymaveguare.
19Pema’ẽ porãke, Che ajapo mba’e ipyahúva; pya’ete ojekuaáta, ndapehechakuaái piko. Ambohape jevýta tape yvy perõ rupi ha ysyry, heñoi’ỹháme mba’eve.
20Umi mymba saite ñu rupigua, umi jagua saite ha umi ñandu guasura’y; chemomba’eguasúta amoĩ haguére desiértope ha ysyry heñoi’ỹháme mba’eve, che retã aiporavomava’ekue hoy’u hag̃ua avei.
21Ko tetã amoheñoiva’ekue omyasãiva’erã umi mba’eguasu ajapomava’ekue.
22Nde, Jacóbo, katu nacherenóiri, nde Israel nderejeroviái cherehe.
23Ndereikuave’ẽi chéve nde ovechara’y ha nde nachemomba’eguasúi ne kuave’ẽmbynguéra rupi; ndajeruréikuri ne kuave’ẽmby, ha Che noromyangekõi ajerurévo ndéve mba’e ryakuã porãvare reikuave’ẽ hag̃ua chéve.
24Nderejoguái chéve g̃uarã mba’e hyakuã asýva, ha nachembovy’ái ne kuave’ẽmby kyrakuépe, remoĩ uvei che ári ne rembiapo vaieta ha ne aña reko chemokane’õva.
25Che voi ambogue’aína ne rembiapo vai che réra rayhupápe ha nachemomandu’avéi ne aña reko rehe.
26Nde chemomandu’a ñañombojovake hag̃ua, eñe’ẽ katu reñembohekojoja hag̃ua.
27Nde ru tenondegua oñemohembiapo vai ha nde ypykuéra oñemoĩva’ekue avei cherehe.
28Upévare Che ame’ẽ ichupe hese ija’e’ỹva pópe ha ahundiuka oñembohory haguére cherehe.
Who We AreWhat We EelieveWhat We Do
2025 by iamachristian.org,Inc All rights reserved.
