Salmokuéra 27 - Biblia en Guaraní - ?anderuete ?e’? Por? 2015

Ñandruete che sãmbyhyhára ha salvador - David purahéi

1Ñanderuete ningo che rekove resape ha che salvador, mávagui piko akyhyjéta. Ñanderuete che rekove mombaretehára, mávagui piko añemondýita.

2Umi iñañáva, umi chejopy asýva ha umi cherehe ija’e’ỹva oñemoag̃uíma ho’u hag̃uáicha che ro’o, ha’ekuéra katu oñepysãnga ha ho’apáta.

3Jepevémo peteĩ soldádo aty chemongora, ndakyhyjemo’ãi ichuguikuéra, ha jepevémo oñemopu’ã cherehe ñorãirõguasu, che aĩ jeroviapópe nderehe añoite.

4Peteĩ mba’e ajerure Ñanderuetépe, ha upéva ahekáta: Taiko Ñanderuete rogaguasúpe aikove aja pukukue ajepy’amongeta hag̃ua Ñanderuete rehe ha romomba’eguasu joáta ichupe.

5Ha’e oñangarekóta cherehe hogaguasúpe og̃uahẽ jave pe ára ivaipáva, Ha’e cheñu’ãta hekoha ijyvatehápe.

6Upéi Ñanderuete omopu’ãta che akã umi cherehe ija’e’ỹva ári, chembojerepa ramojepe, upéi che aikuave’ẽta vy’apópe hogaguasúpe che kuave’ẽmby, apurahéita ha amomba’eguasúta ichupe.

7Ehendumína Nde, che Ruete, che ñe’ẽmi amba’ejerure asy ramo ndéve, cheporiahuvereko ha chembohovaimína.

8Che py’apy ningo he’i voi: Peju Ñanderuete rendápe, peheka añetehápe ichupe.

9Ani reñomítei chehegui nde rova. Ani reñemboyke pochypópe ne rembiguáigui, Nde ningo che pytyvõhára. Aníkena cherejátei, Nde, che Ruete, Nde che salvador.

10Che ru ha che sy chereja ramojepe tyre’ỹ, Nde, che Ruete, nde reñangareko porãta cherehe.

11Nde, che Ruete, chembo’emína nde rapére, ha chesãmbyhymína tape porã rehe umi cherehe ija’e’ỹvakuéragui.

12Ani chemoĩtei umi cherehe ija’e’ỹva pópe, opu’ãgui cherehe techahare ijapúva, chejukauka hag̃ua.

13Toñemomba’eguasu Ñanderuetépe! Che aikuaa porã ahechataha Ñanderuete poriahuvereko umi oikovéva retãme.

14Che ánga, ejerovia Ñanderuete rehe, toñemokyre’ỹ ha toñemombarete che py’apy ojerovia porã hag̃ua Ñanderuete rehe.