Jeremías 4 - Biblia en Guaraní - ?anderuete ?e’? Por? 2015

Umi oñembyasyetéva ojapo vai haguére oñeperdonáta

1Nde, Israel, rejevy ramo, he’iuka ndéve Ñanderuete, rejevykuaa hendápe, repoi ramo nde jára ambuégui rejukuaa jevy nde Ruete rendápe.

2Ha reme’ẽ ramo añetehápe, hekoitépe ha tekojojápe ne ñe’ẽ Ñanderuetépe, upérõ umi ambue tetãnguéra oiporúta nde réra ojohovasa ha oñombovy’a hag̃ua.

3Péicha he’i Ñanderuete mayma kuimba’e Juda ha Jerusalenguápe: Peñotỹ yvy potĩháme, anítei peñotỹ ñuatĩndýpe, (Matéo 13,7.22).

4Peẽ kuimba’e Juda pegua ha opaite peikóva guive Jerusalénpe, peñemboheko potĩ Ñanderuetépe g̃uarã, peñemopotĩ ha peity pende py’apy pegua mba’e ky’a, anítei che pochy osẽ ku aratirícha, ha hendy jeperõ ndaiporivéima avave ombogueva’erãva. Ko’ã mba’e ojehúta, ndapepoíri ramo pene rembiapo vaígui.

Juda ojeapresapotaite

5Pemoherakuã Judápe, peguerosapukái Jerusalénpe ha peje: Pembopu turu tetãpy rehe; pesapukái ha peje: Peñembyaty ha jaike umi táva oñemombarete porãvape.

6Pehupi yvate pende poyviveve Siónpe, peñani ha ani pepyta pytátei. Cháke, nórteguio Che amboúta mba’evai ha jepy’apy ndetuichaitéva.

7Pe leõ ouhína ikehágui isoldádo aty reheve ha umi tetã hundihára og̃uahẽtama, osẽma oikohágui ombotapere hag̃ua nde yvy; nde tavakuéra itaperepáta ha avave ndoikomo’ãvéima ipype.

8Upévarehe peñemonde ao vosakuépe, pejahe’o ha peguahu; Ñanderuete pochy noñemboykevéima ñandehegui.

9Upe ára upévape he’i Ñanderuete: Tetã ruvicha ha mburuvichakuéra py’a omanombáta, pa’ikuéra ipy’andyipáta ha profetakuéra oñemondyipáta.

10Che katu ha’e ichupe: Angái, angái, che Ruete, che Jára, Nde reheja oñembotavy ko tetã kóvape ha avei Jerusalénpe, oñemyasãi haguére: Peẽ pendepy’aguapy, pe kyse puku katu ojekutumahína ore ánga rehe.

11Umi ára umívape oje’éta ko tetã ha Jerusalenguápe: Yvytu aku oipeju hatã desiértogui che retã rapére, ndaha’éi omboyvytu ni omopotĩ hag̃ua kóga’a.

12Yvytu hatãitereíva Che amboúta; Che voi ambojovakéta ichupekuéra.

13Péina ápe ku arai vaícha opu’ãta ñanderehe ija’e’ỹva, ha icárro yvytu’atãicha oúta, henda kavajukuéra reheve ipya’etevéva ñapykanígui. Angái, angái oréve, ha’ekuéra orehundipáta katuete.

14Nde py’apýgui ejohéi ne mba’e ky’a, nde Jerusalen, resẽ jevy hag̃ua nde jehasa asýgui. Araka’e pevépa rejepy’amongetáta ivaíva rehe.

15Peteĩ marandu vai ou Dángui, ha ambue Efrain cérrogui.

16Pemombe’u tetãnguérape ha pembohasa avei Jerusalénpe: Mondahakuéra ou tetã mombyryetégui, ha umi Juda távape oñehendu apañuái ñorãirõ rehegua.

17Ha’ekuéra omongoráta Jerusalénpe ku ovecha rerekua omongora háicha ijovechakuérape ñúme, he’i pende Ruete.

18Ne aña reko ha ne rembiapo vaikue ogueru ko jejopy vai kóva; ne ñaña reko ndekutúta nde py’aitépe.

19Che py’a, che py’apy oryryipa, che ajepy’apyeterei che py’a operere asy; ndachepy’aguapyvéi, ahendúgui turu pu, sapukaiguasu ñorãirõ megua.

20Jepy’apy asy ha jepy’apy asyve oñemyasãita; oñembyaipáta ko tetã tuichakue; peteĩ sapy’aitépe oñembyaipa che róga aoguigua, ha che ao sãingokuéra.

21Araka’e pevépa ahecháta yvate pe poyviveve (bandéra) ha ahendúta turu pu ñorãirõ megua.

22Ko che retã ningo itavy, ha’ekuéra ndachekuaái he’i pende Ruete; ita’yrakuéra itavy ha naiñakã porãi; ivale ojapo hag̃ua mba’evai, ndojapokuaái katu mba’eporã.

23Ama’ẽ ningo yvy rehe, ha péina itapere ha inandipa; ha ama’ẽ ára rehe, ha ndaiporivéima pe tesape.

24Ama’ẽ umi cerrorusu rehe, ha péina oryryipa joaite, ha mayma cérro oñembyaipa.

25Ama’ẽ ha ndaiporivéima yvyariguakuéra ha umi guyra ára rehe ovevéva okañymba.

26Ama’ẽ ha ahecha umi ñu iporãitévagui oiko yvy perõ ha mayma umi táva itaperepa, Ñanderuete pochy ojapopa ko’ã mba’e.

27Péicha he’i pende Ruete: Ko tetã itaperéta, ág̃a nahundipamo’ãi katu,

28ko’ã mba’e rupi pe yvy oñembyasyete, ha pe ára yvate iñypytũta. Che ajepy’amongetáma, añe’ẽma ha nañembyasymo’ãi che rembiaporã rehe ha ndaguevimo’ãi ko’ã mba’égui.

29Umi tavaygua okañymba ohendúvo umi kavaju árigua ha umi hu’y poihára oikepa ka’aguy mbytépe, ha ojupi hikuái umi cerrorusu rehe; pe táva ojehejareipa, ha avave ndopytái ipype.

30Ha nde, táva, reñembyaipátava, mba’épa rejapóta, jepevémo reñemonde ao pytãme, ha reñembojeguaka órope, jepevémo remohũ nde resakua, reñemoporã rei, ha’ekuéra nandeapomo’ãi mba’eve ramo, nde rayhuhára voi ndejukáta.

31Ahendu ningo peteĩ ñe’ẽpu ha’etéva kuña imembymbotáva; py’ahẽ asy ha’etéva kuña imembýtava imemby peteĩha, upéva ha’e Sion rajy, hasẽvo oipyso ipo ha he’i: Angái, angái chejukátama, umi porojukahára chejukátama.