Números 22 - Biblia en Guaraní - ?anderuete ?e’? Por? 2015

Balac ohenoiuka Balaámpe

1Oipykúi Israel ñemoñarenguéra, ha opyta hikuái Moab ñúme, Jordan ypýpe, Jerico rovái.

2Ha Balac, Zipor ra’y, ohéchavo opaite mba’e Israel ojapova’ekue Amorguakuéra rehe.

3Ha Moabguakuéra okyhyjeiterei Israélgui, hetaitereígui hikuái; ha Moab ojepy’apy Israel ñemoñarenguéragui.

4Ha Moab he’i Madian karai ancianokuérape: Ko tetã kóva omoperõmbáta pe yvy oĩva guive ijerekuévo, ku guéi omoperõ háicha kapi’i ñu megua. Ha Balac, Zipor ra’y, upérõ opyta Moab retã ruvicha ramo.

5Upéicha rupi Balac omondo ñe’ẽrerahahára Balaam, Beor ra’ýpe, Petor peve, opytáva Éufrates ysyry rembe’ýpe, ohenoiuka hag̃ua ichupe, he’ívo: Peteĩ tetã osẽma Egíptogui, ha péina ápe oñu’ã ko yvy ape, ha oiko hikuái che renondépe.

6Eju ko’ág̃a, ajerure ndéve, emaldeci hag̃ua chéve ko tetã kóvape, imbaretevégui chehegui; ikatu hag̃ua ambopoguy ha amosẽ ichupe che retãgui; che aikuaa porã upe nde rehovasáva ohupity jehovasa, ha upe nde remaldecíva oñehunditaha.

7Péicha oho Moab ha Madiangua karai ancianokuéra jopói reheve ipópe Balaam rendápe, ombohasa hag̃ua ichupe Balac ñe’ẽ.

8Ha Balaam he’i ichupekuéra: Pepytu’u ko’ápe ko pyhare pukukue, ha che ambohováita ko’ẽrõ pene ñe’ẽ, Ñanderuete oñe’ẽse háicha chéve. Péicha umi Moabgua ancianokuéra opyta Balaam rendápe.

9Ha Ñanderuete oñe’ẽ Balaámpe ha he’i ichupe: Mba’e apoha piko ko’ã kuimba’e nendive oĩva.

10Ha Balaam he’i Ñanderuetépe: Balac, Zipor ra’y, Moab retã ruvicha ombou umíape he’iuka hag̃ua chéve:

11Eikuaa porãke: Ko tetã osẽva’ekue Egíptogui oñu’ãmbamaha ko yvy ape; eju ko’ág̃a ha emaldeci ichupekuéra, upéicharamo ikatu ajeity hi’ári ha amosẽ ichupekuéra.

12Upéramo Ñanderuete he’i Balaámpe: Ani rehótei hendivekuéra, ha ani remaldeci pe tetã pévape Che voi aiporavóma ichupekuéra (oiko hag̃ua che retã ramo).

13Upérõ Balaam opu’ã pyhareve ha he’i Balac remimondokuérape: Tapeho jevy pene retãme, Ñanderuete ndoipotái aha penendive.

14Ha umi Moab remimondokuéra opu’ã ha ou Balac rendápe ha he’i: Balaam ndouséi orendive.

15Balac omondo jevy ambue mburuvichakuéra, herakuã porãvéva ambuekuéragui.

16Ha ou hikuái Balaam rendápe, ha he’i ichupe hikuái: Péicha he’i Balac, Zipor ra’y: Ajerure ndéve ejumína che rendápe;

17katuete che romomba’eguasúta, ha ajapóta opaite mba’e eréva guive chéve; ko’ág̃a eju katu ha emaldeci ko tetã kóvape.

18Ha Balaam he’i Balac rembiguaikuérape: Jepémo Balac ome’ẽ chéve hóga renyhẽngue pláta ha órogui, ndaikatumo’ãi amboyke Ñanderuete, che Jára ñe’ẽ, ajapo hag̃ua mba’e michĩ térã tuicháva hese’ỹ.

19Upévagui ajerure peẽme ko’ág̃a, pepyta ko’ápe ko pyhare, che aikuaa porã hag̃ua mba’épa Ñanderuete he’i jevýta chéve.

20Ha Ñanderuete ou Balaam rendápe pe pyharépe, ha he’i ichupe: Ko’ã kuimba’e oúgui nerenói hag̃ua, epu’ã ha tereho hendivekuéra; ejapo katu Che ha’éva guive ndéve.

Pe yvága rembiguái ha Balaam hymba búrro

kuña

21Péicha Balaam opu’ã pyhareve, omboape hymba búrro kuña ha oho Moabgua karai ancianokuéra ndive.

22Ha Ñanderuete ipochy hendive oho haguére; upévare Ñanderuete yvága rembiguái (ángel) oñemoĩ hese hapépe, ku hese ija’e’ỹva ramo. Ha’e oho jave hymba búrro kuña ári ha hendive mokõi hembiguái.

23Ha hymba búrro ohechávo pe yvága rembiguáipe oñembo’ýva tape mbytépe, ikyse puku nandi ipópe pe búrro kuña osẽ hapégui ha oho ñu rehe. Upéramo Balaam ipochy ha oinupã hymba búrro ojei haguére hapégui.

24Ha pe yvága rembiguái katu oñemoĩ jevy hese peteĩ parralty rapépe ha itápia jováivape.

25Ha Balaam rymba búrro ohechávo pe yvága rembiguáipe ojejopy pe tápia rehe, ha ojopy Balaam py tápia rehe; ha ha’e oinupã hatãve hymba búrrope.

26Ñanderuete yvága rembiguái ohasa henonderã gotyove, ha oñemoĩ jevy hese peteĩ tape ipo’ivehápe, oĩ’ỹháme tape oñemboyke hag̃ua ijakatúa gotýo ni ijasu gotýo.

27Ha hymba búrro ohechávo Ñanderuete rembiguáipe ojeity Balaam guýpe; ha Balaam ipochyve ohóvo ha oinupã vaive hymba búrro yvyra po’ípe.

28Upémaramo Ñanderuete ombojurupe’a hymba búrrope, ha pe búrro oñe’ẽ Balaámpe ha he’i: Mba’éiko ajapo nderehe, nde chenupã hag̃ua mbohapy jevýma.

29Ha Balaam he’i jevy hymba búrrope: Reñembohorýgui cherehe, areko rire kyse puku che pópe, ko’ág̃aite rojukava’erãmo’ã.

30Ha hymba búrro he’i Balaámpe: Chéiko ndaha’éi ne rymba búrro kuña, cheári reikóva cheguereko ypyha ára guive ko ára peve; ajepokuaa piko péicha ajapo hag̃ua nderehe. Ha ha’e he’i: Nahániri.

31Upévo Ñanderuete ohesape’a Balaámpe, ha ha’e ohecha Ñanderuete rembiguáipe oñembo’ýva henondépe ikyse puku nandi ipópe. Ha Balaam omomba’eguasu ichupe ha oñesũ tĩndyhápe.

32Ha pe yvága rembiguái he’i ichupe: Mba’érepa reinupã ne rymba búrrope mbohapy jevy. Eikuaa porãke, che asẽ rojokóvo, pya’eiterei nde reju ha reñemoĩ avei cherehe.

33Ne rymba búrro katu cherecháma, ha ojei che renondégui ko’ã mbohapy jevy, ha noñemboykéi rire chehegui che rojukava’erãmo’ã, ha ichupe ahejava’erãmo’ã oikove.

34Upémaramo Balaam he’i Ñanderuete yvága rembiguáipe: Añemoangaipa, ndaikuaáigui nde reñemoĩ hague che renonderãme ko tape kóvape; ha oime ramo ivai ndéve, che aha jevýta ko’ág̃aite che rógape.

35Pe yvága rembiguái he’i Balaámpe: Tereho umi kuimba’e ndive; ereva’erã katuete che ha’évante ndéve. Upéicha Balaam oho Balac remimondonguéra ndive.

36Ha Balac ohendúvo Balaam ouha; ha’e osẽ ohug̃uaitĩ hag̃ua Árpe, peteĩ táva oĩva Arnon ysyry rembe’ýpe, opytáva hetã rembe’ýpe.

37Ha Balac he’i Balaámpe: Norohenoiukáipara’e che. Mba’éguipa nderejúira’e che rendápe. Ndaikatúinepa che apaga porã ndéve.

38Balaam he’i jevy Balácpe: Péina ápe, che aju ne rendápe; ikatúnepa che añe’ẽ ko’ág̃a. Pe ñe’ẽ Ñanderuete omoĩva che jurúpe, upévante che ha’eva’erã.

39Ha Balaam oho Balac ndive ha ou hikuái Quiriat-huzótpe.

40Ha Balac ojukauka tóro ha ovecha, ha kavarakuéra oguerahauka hag̃ua Balaam, ha umi mburuvichakuéra oĩvape hendive.

Balaam ohovasa Israélpe

41Ambue árape, Balac ogueraha Balaámpe Bamot-baálpe ha upeguive ohechauka ichupe Israelgua rekoha rembe’y.