Levítico 16 - Biblia en Guaraní - ?anderuete ?e’? Por? 2015

Pe arete oñemoĩ porã jevy hag̃ua Ñanderuete ndive

1Ñanderuete oñe’ẽ jevy Moises ndive, omano rire mokõi Aaron ra’y, oñemboja haguére hekope’ỹ Ijára renondépe, upévagui omano hikuái.

2Ha Ñanderuete he’i Moiséspe: Ere nde ryke’y Aarónpe, ha’e ndikatúi oike pe kotyguasu oñemboykéva pende Ruetépe ha pa’iguasúpe g̃uarã ha’e oipota háicha, pe aosãingo pererĩ kupépe, pe karameg̃ua renondépe pende Ruete reko jajaipa oĩháme, ani hag̃uátei omano ha’e avei; Che ajehechaukahápe arai rupi pe karameg̃ua ape ári.

3Aaron oikéta pe kotyguasu pévape oikuave’ẽ rire peteĩ tóro ra’yrusu kuave’ẽmby angaipa reheguáva ramo, ha peteĩ ovecha mácho kuave’ẽmby ojehapypa reheguáva ramo,

4omonde rire ijehe pe póncho puku, ha pe calzoncíllo líno inimboguiguáva, ha ojeku’akua avei ku’a jopyha líno inimboguiguávape, ha omoĩ rire iñakãre peteĩ víncha (akã rague jokoha) ojejapova’ekue líno inimbógui, ko’ãva ningo hína ao oñemboykéva pende Ruetépe g̃uarã.

5Ha’e orecebíta Israel ñemoñarenguéragui mokõi kavara mácho kuave’ẽmby angaipa reheguáva ramo ha peteĩ ovecha mácho kuave’ẽmby ojehapypa reheguáva.

6Ha Aaron ogueruva’erã pe tóro ra’yrusu kuave’ẽmby angaipa reheguáva ramo imba’eteéva, ha’e ha hogayguakuéra oñemoĩ porã jevy hag̃ua (pende Ruete ndive).

7Upéi ogueruva’erã ko’ã mokõi kavara mácho pende Ruete renondépe, pe óga jojohuha rokẽme.

8Ha Aaron oitýta po’a oiporavo hag̃ua mokõive kavara mácho apytégui; peteĩ pende Ruetépe g̃uarã ha ambue Azazélpe g̃uarã (mba’epochýpe g̃uarã).

9Ha pe kavara mácho ojeporavóva po’a reity rupi pende Ruetépe g̃uarã, Aaron oikuave’ẽva’erã kuave’ẽmby angaipa reheguáva ramo.

10Ha pe kavara mácho ojeporavóva po’a reity rupi Azazélpe g̃uarã, ojegueruva’erã pende Ruete renondépe oñemoĩ porã jevy hag̃ua ha upéi oñemosẽta Azazélpe g̃uarã desiértope.

11Ha Aaron oguerukava’erã pe tóro ra’yrusu kuave’ẽmby angaipa reheguáva ramo oñemoĩ porã jevy hag̃ua ha’e ha hogayguakuérape, ha upéi oajúra kytĩva’erã pe tóro ra’yrusu imba’éva kuave’ẽmby ñemoĩ porã reheguáva ramo.

12Upéi ojapyhyva’erã peteĩ mba’yru ñemohatatĩha henyhẽva tatapỹigui pe kuave’ẽmby rendágui, ha ipo renyhẽ pe mba’e ryakuã iku’ipyrévagui, oike hag̃ua pe kotyguasúpe oñemboykéva pa’iguasúpe g̃uarã, oĩva pe aosãingo kupépe.

13Ha omoĩta pe mba’e ryakuã porãva tata ári pende Ruete renondépe, ha pe arai omopu’ãva pe mba’e ryakuã porãgui oñu’ãmbáta pe karameg̃ua ape oĩva umi 10 tembiapoukapy ári, hekoitépe ojapopava’erã, ani hag̃ua ha’e omano.

14Upéi ojapyhýta pe tóro ra’yrusu ruguykuégui ha ohypýita ikuãme pe karameg̃ua apére kuarahyresẽ gotýo; huguykuépe ohypyiva’erã ikuãme 7 jevy pe karameg̃ua ape rehe.

15Upéi oajúra kytĩva’erã pe kavara mácho kuave’ẽmby angaipa reheguáva ramo hetãyguakuéra rehe, ha ogueraháta huguykue kotyguasúpe oñemboykéva Ñanderuetépe ha pa’iguasúpe g̃uarã, oĩva aosãingo kupépe, ha ojapóta pe huguykuégui ojapo haguéicha pe tóro ra’yrusu ruguykue reheve, ha ohypýita pe karameg̃ua ape ári ha henonde gotýo.

16Péicha omopotĩta pe tenda péva, Israel ñemoñarenguéra reko vaígui ha mayma iñangaipakuéragui; peichaite avei ojapova’erã pe óga jojohuha rehe, oñemopu’ãva pende rekoha mbytépe oñemongy’áma avei tetãyguakuéra rembiapo vai rupi.

17Aaron oike guive osẽ jevy peve mba’eveichagua kuimba’e noĩriva’erã pe óga jojohuhápe ha’e oikuave’ẽ jave, omoĩ porã jevy hag̃ua pe tenda péva, hekove, hogayguakuéra ha Israel ñemoñarenguéra rekove rehe.

18Ha osẽ rire ohóta pe kuave’ẽmby rendápe, oĩva pende Ruete renondépe, omopotĩ jevy hag̃ua avei pe kuave’ẽmby renda ha omoĩta pe tóro ra’yrusu ruguykue ha kavara mácho ruguykue pe kuave’ẽmby renda ratĩ jerekue rehe.

19Ikuãme ohypýita hi’ári pe huguykue 7 jevy, omopotĩ hag̃ua Israel ñemoñarenguérape hembiapo vai ha omboyke jevy hag̃ua ichupekuéra pende Ruetépe g̃uarã.

20Omopotĩ porãmba rire pe tenda pévape, pe óga jojohuha ha pe kuave’ẽmby renda, oguerukáta pe kavara mácho oikovéva;

21ha Aaron omoĩ mbareteva’erã ipo mokõivéva kavara mácho akã ári, ha omombe’úta opaite Israel ñemoñarenguéra rembiapo vai, opaite iñepu’ãse ha opaite iñangaipakuéra; upéicha omoĩmbáta umía pe kavara mácho akã ári, ha peteĩ kuimba’e ogueraháta pe kavara mácho desiértope.

22Ha pe kavara mácho oguerahapáta ijehe tetãyguakuéra rembiapo vai ñu desiértope, avave oiko’ỹháme; upépe ojepoíta ichugui.

23Upéi Aaron oike jevýta pe óga jojohuhápe oipe’a hag̃ua ijehegui pe ao líno inimboguiguáva omondeva’ekue oike hag̃ua pe koty oñemboykéva Ñanderuetépe ha pa’iguasúpe g̃uarãnte, ha upépe ohejáta ipa’iguasu ao.

24Upéi ojahuva’erã, pe tenda oñemboykéva Ñanderuetépe g̃uarã, ha omonde jevy rire pe ao ambuéva osẽta oikuave’ẽ hag̃ua kuave’ẽmby ojehapypáva ijehe ha hetãyguakuéra rehe, oiko porã jevy hag̃ua ha’e ha hetãyguakuéra Ñanderuete ndive.

25Ha ohapyva’erã kuave’ẽmby renda ári pe kuave’ẽmby angaipa rehegua kyrakue.

26Ha upe oguerahava’ekue pe kavara mácho Azazélpe, ojoheiva’erã ijao, ojahuva’erã avei, ha uperire ikatu oike jevy pe tekohápe.

27Ha oguenohẽva’erã hekohágui pe tóro ra’yrusu ha pe kavara mácho ojejukava’ekue angaipa rehe, huguykue ojererahava’ekue pe tenda oñemboykéva Ñanderuetépe g̃uarã, oñemoĩ porã jevy hag̃ua hendive; ha okápe ohapyva’erã ipirekue, ho’okue ha hepotikue.

28Ha ohapy rire ha’e ojoheiva’erã ijaokuéra, ojahuva’erã avei ha upéi ikatu oike jevy pe tekohápe.

29Peñongatu porã ko’ã ñe’ẽ pejapopa hag̃ua hekoitépe opaite ára: Pe jasy 7-ha jave ha pe ára 10-hápe peñemomirĩ, ha pekaru’ỹre ha ndapejapoiva’erã mba’eveichagua tembiapo peẽ Israelgua térã tetã ambueygua oikóva pende apytépe.

30Ko árape oñeperdona haguére pene angaipa ha peñemopotĩ haguére opaite pene rembiapo vaígui pende Ruete renondépe.

31Ko ára kóva jepytu’uha ára peẽme g̃uarã, peñemomirĩ pekaru’ỹvo pende Jára renondépe, kóva hína peteĩ tembiapoukapy opaite árape g̃uarã.

32Pe pa’i ojeporavóva ha oñemonamava’ekue pa’i ramo itúva rendaguépe ojapova’erã pe kuave’ẽmby ñemoĩ porã reheguáva; ha’e omondeva’erã ijehe pe ao líno inimboguiguáva, umi óga jojohuha ao.

33Ha’e omopotĩva’erã kuave’ẽmby ñemoĩ porã rupi pe tenda péva ha pe óga jojohuha; oikuave’ẽva’erã avei ko kuave’ẽmby ñemoĩ porã reheguáva pe kuave’ẽmby renda rehe, pa’ikuéra rehe ha mayma tetãygua ijatýva guive rehe.

34Kóva opytáta tembiapoukapy ramo tapia g̃uarã, ha meme áñope peteĩ jevýnte oñekuave’ẽta ko kuave’ẽmby kóva omopotĩ hag̃ua Israel ñemoñarenguéra iñangaipágui. Ha Moises ojapopa Ñanderuete he’i haguéicha ichupe.