Ester 1 - Biblia en Guaraní - ?anderuete ?e’? Por? 2015

Pe tetã ruvicha rembireko Vásti ombopochy iména Asuérope

1Ojehuva’ekue Pérsia retãguasúpe, Asuéro oisãmbyhy aja Índia guive Etiopía peve omboja’óvo umi tetã 127 departamentokuérape.

2Umi ára umívape tetã ruvicha Asuéro oñemoĩ hatã riréma hetãguasu guapyhápe oĩva itavaguasu Súsape,

3ha mbohapy áño oisãmbyhyhápe ha’e ojapo peteĩ karuguasu opaite mburuvichakuéra ha hembiguaiguasukuérape g̃uarã; upéicha oñembyatypa hogaguasu pegua, Pérsia ha Mediaygua ipy’aguasuvéva, mburuvichakuéra ha umi tetã sãmbyhyharakuéra.

4Asuéro ohechaukase ichupekuéra imba’erepyeta ha hetãguasu verapy, ha ohechauka hag̃ua ipu’aka ojapo karuguasu ichupekuéra g̃uarã 180 ára pukukue.

5Ha ohasa rire ko’ã ára, pe tetã ruvicha ojapo jevy ambue karuguasu 7 ára pukukue opaite tetã ruvicha rogaguasu oikóvape térã omba’apóva ichupe g̃uarã, ituichavéva guive imichĩvéva peve.

6Omyasãi umi aosãingo morotĩ, hovy kangy (vérde) ha hovy, inimbo pytãitévagui ohasáva plataguigua kuãirũ kua rupi ha oñeñapytĩ horcon ita marmolguiguávare; umi aramboha oñeno haguépe hikuái ojejapo ao porãitégui ha ijapytépe oĩ avei inimbo pláta ha oroguiguávagui, ha pe píso ojejapo ita jegua hovy, morotĩ, sa’yju ha hũ overávagui.

7Ha pe víno ho’uka váso oroguiguápe, ha opaite vasokuéra apytépe ndaipóri mokõinte jepe ojojoguáva, ha pe tetã ruvicha víno oñeme’ẽ oje’use háicha, ohechauka hag̃ua tetã ruvicha ipy’a porãha hendivekuéra.

8Asuéro he’iuka voi hembiguaiguasukuérape: Oimeraẽva ho’ukuaa víno ha’e ho’use háicha peve.

9Upeaja tetã ruvicha rembireko Vásti ojapo avei peteĩ karuguasu kuñakuérape g̃uarã, iména Asuéro rogaguasu ykére.

10Pe ára 7-hápe, pe víno ombopy’a rorýma ramo tetã ruvicha Asuérope, ha’e ohenói umi hembiguaiguasu ojeroviavévare: Mehuman, Bizta, Harbona, Bigta, Abagta, Zetar ha Carcáspe, omba’apóva tetã ruvicha Asuéro renondépe, ha he’i ichupekuéra,

11oho hag̃ua ogueru hembireko Vástipe iñakã jeguaka (coróna) reheve, ohechauka hag̃ua hetãyguakuéra ha mburuvichakuérape hete iporãiteha.

12Tetã ruvicha rembireko, Vásti katu, ndojapói iména rembipota ha ndoúi hendápe oje’e haguéicha ichupe, upévare tetã ruvicha ipochyeterei, ha ipochýgui hova ipytãmba.

13Upéramo pe tetã ruvicha oporandu umi kuimba’e iñaranduetévape ha oikuaa porãva hetã rembiapoukapy ha oma’ẽva avei pe jasy tata rape rehe oikuaa hag̃ua araka’etépa iporãve ojejapo hag̃ua ojejaposéva.

14Ha oĩ hendive: Carsena, Zetar, Admata, Tarsis, Meres, Marsena ha Memucan, ko’ãva oiko mburuvichaguasu Pérsia ha Mediayguáva jerekuévo, ha oipytyvõva Asuérope hembiapoguasúpe.

15Upéramo Asuéro oporandu ichupekuéra mba’épa ojejapova’erã tetã ruvicha rembireko Vásti rehe, Pérsia retã rembiapoukapy he’i háicha ramo ha’e ndojapói haguére tetã ruvicha Asuéro rembipota.

16Ha Memucan he’i tetã ruvichápe ambue mburuvichakuéra renondépe: Pe tetã ruvicha rembireko Vásti noñemoangaipái tetã ruvicha renondépente, oñemoangaipáma avei opaite mburuvichakuéra, ha opaite tetãyguakuéra oĩva guive tetã ruvicha Asuéro retãguasu ndive avei.

17Ko tetã ruvicha rembireko rembiapo og̃uahẽta opaite kuñakuéra apysápe, ha noñemoĩsemo’ãvéima imenakuéra poguýpe, he’ívo hikuái: Pe tetã ruvicha Asuéro rembireko Vasti naiñe’ẽrendusevéi iménape, upévagui ndoúi hendápe.

18Ha upéicharamo umi Pérsia ha Mediaygua kuñakaraikuéra nohenduveiva’erã avei imenakuérape, imburuvicha ramo, ohendu guive tetã ruvicha rembireko rembiapo oñemoĩva’erã hikuái avei iménare; ha oikóta pochy ndetuicháva ha ñorãirõ ne retãguasúpe.

19Ho’a porã ramo tetã ruvichápe, ha’e ome’ẽ’arã peteĩ tembiapoukapy ipyahúva ha tojehai Pérsia ha Média rembiapoukapykuéra apytépe, opavave ojapova’erãva. Vásti araka’eve nog̃uahẽveiva’erã tetã ruvicha Asuéro renondépe; ha tetã ruvicha toiporavo ambue hembirekorã iporãva, Vásti rendaguépe.

20Ha pe tembiapoukapy pyahu tetã ruvicha ohaiukátava oñehendúta ko tetãguasu tuichakuépe, jepémo ituichaiterei, ha opaite kuñakuéra omomba’éta imenakuérape, upe tuichavéva guive upe imichĩvéva peve.

21Ko ñe’ẽ kóa oĩ porã tetã ruvicha resa renondépe, ha avei ambue mburuvichakuéra resa renondépe, ha tetã ruvicha ojapo Memucan he’i haguéicha ichupe.

22Upérõ Asuéro ohaiuka ha omondo pe kuatiañe’ẽ péva opaite tetã ruvichakuérape ipoguýpe oĩva guive. Iñe’ẽteépe he’iuka opaite kuimba’ekuérape omoĩ hatã hag̃ua hogapýpe imburuvicha reko, ha toñemoherakuã ko’ã mba’e ko’ãva opaite Pérsia retãguasuetépe.