Salmokuéra 62 - Biblia en Guaraní - ?anderuete ?e’? Por? 2015

Ñanderuete añoiténte yvyarigua mo’ãhára añeteguáva - David purahéi

1Ñanderuete ndivénte che ánga opytu’ukuaa, ichuguínte ou chéve ñepytyvõ.

2Ha’énte hína che itaguasu ha chepytyvõva añetehápe, Ha’e ningo chemo’ãva, ndachepysyrymo’ãi.

3Araka’e peve piko peñemoĩta cherehe, peñeha’ã joa chemopẽ hag̃ua ku óga tápia ho’ávaicha ha korapyjere ojeitypyrévaicha.

4Ha’ekuéra chereitysénte pe cérrogui. Ohayhu ningo hikuái pe japu, ijurupekuéra cherovasa, ipy’apýpe katu chemaldeci. Selah

5Ñanderuete ndivénte che ánga opytu’ukuaa, ichuguínte aha’ãrõ ñepytyvõ.

6Ha’émante che itaguasu ha che pytyvõharaguasu. Ha’e che mo’ãhára, ndachepysyrymo’ãi.

7Ñanderuete rupivénte ahupity ñepytyvõ porã ha che rerakuã porã, Ñanderueténte che itaguasu ha che mo’ãhára.

8Opaite árape pejerovia hese, peẽ che retãyguakuéra, henondépe peguenohẽ pende py’apýpe oĩva guive, Ñanderuete ningo ñane mo’ãhára. Selah

9Mboriahu ha naimboriahúiva ojoguánte yvytúpe, ha mokõivéva opa reiva’erã; oñeha’ã ramo balánzape ivevuive yvytúgui.

10Ani pejeroviátei pirapire rehe ojepe’áva mbaretépe térã oñemondava’ekue rehe, oñemboheta hetave ramo pende pirapire, ani pemoĩtei hese pende py’a (ani pejerovia pende pirapire rehe).

11Ñanderuete oñe’ẽva’ekue, ahendu porã iñe’ẽ he’ívo: Pende Ruete ipu’akapa,

12ha nendive, che Jára, oĩ poriahuvereko, ha Nde remyengovia peteĩteĩvape hembiapokue ojerure háicha.