Ezequiel 27 - Biblia en Guaraní - ?anderuete ?e’? Por? 2015

1Ñanderuete ñe’ẽ ou chéve ha he’i:

2Nde, kuimba’e ra’y, epurahéi pe purahéi jahe’o Tíro rehe.

3Ha eréta Tírope, yguasu rembe’ýpe oikóva, ha oñemúva heta tetã yguasu pegua ndive, péicha he’i pende Ruete: Tíro, nde ereva’ekue ndejehe, che cheporãiterei.

4Umi yguasu mbyte peve ojepyso ne retã pu’aka; nde apoharekuéra nde’apo porãmbaitéva.

5Senir cérro peguare cipres yvyra ojeporu nde barcoguasúpe g̃uarã; ojapyhy hikuái Líbanogui cédro ojapo hag̃ua ndéve nde barcoguasu ýva puku.

6Ha Basan peguare encína yvyrágui ojapo hikuái ne remokuéra; ha nde guapyhakuéra yvyra Chípre rembe’y peguarégui, ha elefánte ratĩnguégui oñemoinge moinge hese jeguaka ramo.

7Ha pe aosãingo (véla) pe yvytu oipeju hag̃ua hese, omýi hag̃ua pe barcoguasu, ojeporu avei poyvi ramo, ojejapo ao linoguiguágui Egípto peguare. Ha nde bárco ape (técho) ojejapo pe ao pytã ha hovývagui, ouva’ekue Elísa retã rembe’ýgui.

8Sidon ha Arvadgua omongu’e ne rémo, umi kuimba’e arandu Tíro pegua voi oiko nde bárco sãmbyhyha ramo.

9Umi Gebalgua kuimba’ekuéra ikatupyryvéva opa’ũmboty nde barcoguasu yvyra ojoapyhápe; opaichagua barcoguasu, ha ipypeguakuéra ohopa ne rendápe oñemu hag̃ua nendive.

10Persiaygua, Lud ha Futguakuéra oiko nde soldádo ramo, hete ha iñakã mo’ãhanguéra omosãingo pende barcoguasu tápiare ha umía rupi remimbipa.

11Umi Arvad ha Helecgua oiko nde soldadokuéra ndive nde korapy tápia yvate ári, ha umi Gamadgua oñangareko nde róga yvate rehe, omosãingo joa hete mo’ãha pende korapy tápia yvate jerekue rehe; ha upéicha nde táva omimbiete.

12Tarsis pegua oñemu nendive hetaiterei mba’erepy ha ne mba’erepy rekovia ome’ẽ pláta (óro morotĩ), hiérro, estáño ha plómo.

13Grécia, Tubal ha Mesecgua avei oñemu hikuái nendive: Tembiguái rei (esclávo), ha tembiporu bronceguiguáva ome’ẽ ne mba’erepy rekovia.

14Umi Togarmaygua ogueru ikavajukuéra ha imburikakuéra oñemu hag̃ua nendive.

15Umi Dedan ñemoñare oñemu nendive; heta y rembe’y rupigua avei ojogua ne mba’erepyeta; ha ne mba’erepykuéra rehe ome’ẽ ndéve elefánte ratĩngue ha ébano yvyra.

16Edom oñemu nendive ne mba’erepyeta rehe; ogueru hikuái ita vera hovy, ao pytã, ao jeguapáva, ao líno, coral (pérla) ha ita vera pytã.

17Juda ha Israel oñemu avei nendive: Trígo Minit peguare, eíra ha acéite, ha yvyra aysy ryakuã porã.

18Damásco oñemu nendive ne mba’erepyeta rehe, umi mba’erepyeta reguerekóva rehe: Víno Helbon peguare reheve ha ovecha rague morotĩ reheve oñemu hikuái.

19Ha péicha avei Vedan ha Javan ou hikuái ne ñemuha rendápe, oñemu hag̃ua hiérro oñemba’apopyre rehe, mírra oñemondykypyre ha takuapi ryakuã asy reheve.

20Dedan oñemu nendive ao hepýva ojeporúva kavaju oñembyape hag̃ua.

21Arábia ha mayma Cedargua ruvichakuéra oñemu nendive ovechara’y, ovecha ha kavara machokuéra rehe; ko’ãva umi oñemuva’ekue nendive.

22Umi Saba ha Ramaygua oñemu avei nendive; umi mba’e ryakuã ojepotavéva rehe, ha opaichagua ita vera hepýva rehe, ha óro reheve ou hikuái ne ñemuha rendápe.

23Haran, Cane, Eden, Sabaygua, Asiriaygua ha Quilmadgua oñemu avei nendive.

24Ko’ã ñemuhára ko’ãva oñemu nendive heta mba’e rehe: Ahojakuéra hovy ha jeguaka, aosãingo iporã ha isã imbaretéva rehe.

25Umi barcoguasu Tarsis pegua ou ojoapykuéri ne mba’erepy reheve; upéicha nde rembyatyve rehóvo ne mba’erepyeta ha oiko ndehegui peteĩ táva imbareteitereíva.

26Umi omongu’éva ne remokuéra ndereraha mombyry, ha pe yvytu kuarahyresẽguio oúta hikuái nehundi hag̃ua yguasu mbytépe.

27Ne mba’erepyeta, umi mba’e reñemúva, ne rémo omongu’éva, nde barcoguasu sãmbyhyhára, nde barcoguasu myatyrõharakuéra, umi omoñemúva ha mayma nde soldádo ha opaite tapicha aty oĩva guive nendive ho’apáta pe yguasu mbytépe reñehundiha árape.

28Ha umi ne remokuérare omba’apóva sapukái ryapukuégui oryryipáta pe y rembe’y.

29Ha oguejypáta umi omongu’éva ne remokuéra, opaite ambue omba’apóva pende barcoguasúpe ha isãmbyhyharakuéra osẽmbáta opyta hag̃ua yvy apére.

30Ha’ekuéra osapukái asy joáta nderehe, ha omombóta yvy timbo iñakã ári, ha ojapajeréita tanimbúpe.

31Nderehehápe oikytĩ joáta iñakã raguekuéra, oñemonde joáta ao vosakuépe, ha nderehe opurahéi jahe’o asýta py’a ñembyasypópe.

32Purahéi jahe’o asy rupi ndeguerojahe’óta hikuái, he’ívo: Mávapa ojogua Tírope, yguasu mbytépe oñehundíva.

33Ne mba’erepy rupi umi tetã ou yguasúgui oñemohyg̃uatã hag̃ua; umi tetã ruvicha yvy apére rembopirapire heta ne mba’erepyeta ha mba’e ñemumby rupi.

34Ág̃a reñehundiha ára yguasu ruguápe, ne mba’e ñemumby ha opaite umi oikóva guive nendive ho’apáta yguasu ruguápe.

35Mayma umi y rembe’y rupi oikóva ipy’andýi joáta ohechávo reñehundimaha, ha hetã ruvichakuéra oryryipáta kyhyjégui ha hovakuéra iñambuepáta.

36Opaite ñemuhára oikóva guive ambue tetãme katu oñembohorýta nderehe ha ovy’aitéta reñehundi ha opa haguére nde réra tetãnguéra apytépe.