Márcos 8 - Biblia en Guaraní - ?anderuete ?e’? Por? 2015

Hesu ohechauka imborayhu, omongarúvo 4.000-pe

1Ha umi árape, ijaty jevývo hetãyguakuéra, ha ndoguerekóigui ho’uva’erãva, Hesu ohenói hemimbo’ekuérape, ha he’i ichupekuéra:

2Aiporiahuverekoite ko’ãvape, ojapóma ningo mbohapy ára oĩha chendive hikuái, ha ndoguerekovéima mba’eve ho’uvarã.

3Ha che amondo ramo ichupekuéra hogakuérape py’a nandi reheve, ipy’amanóne tape rehe, oiméko ijapytépe mombyrýgui oúva.

4Ha hemimbo’ekuéra he’i ichupe: Mba’éichapa ñamohyg̃uatãta ichupekuéra pánpe ko desiérto kóvape.

5Ha Hesu oporandu ichupekuéra: Mbovy pan piko peguereko, ha ombohovái hikuái: siéte.

6Ha Hesu omboguapyuka umi tetãygua yvýpe. Ha ojapyhy umi siéte pan, oipehe’ã, ha oagradece rire, ome’ẽ hemimbo’ekuérape ombohasa hag̃ua peteĩteĩme.

7Oguereko avei hikuái mbovymi pira, ha ome’ẽuka avei umíva.

8Okarupa ha hyg̃uatãmba hikuái, umi pehẽngue hembyva’ekuégui omyenyhẽ jevy 7 ajaka.

9Umi okaruva’ekue 4.000 kuimba’e rupi. Upéi Hesu omondopa hógape.

10Uperire ojupi hemimbo’ekuéra ndive canoaguasúpe ha oho Delmanúta gotýo.

11Ha osẽ fariseokuéra oñemoĩ oñoñe’ẽapi hendive, ha ojerure ichupe peteĩ yvága techaukaha (señal), oipy’ara’ã hag̃uánte ichupe.

12Hesu ipyahẽ Ipytu Porãme, ha he’i: Mba’érehepa ko’ã ñemoñare ko’ãva ojerure peteĩ techaukaha. Añetéko ha’e peẽme ko’ã ñemoñare ko’ãvape noñeme’ẽmo’ãi mba’eveichagua techaukaha.

13Oheja ichupekuéra ha ojupi jevy pe canóape ha ohasa y mboypýri.

14Hesu remimbo’ekuéra hesarái ogueraha hag̃ua pankuéra icanóape, oguereko hikuái peteĩmínte.

Umi oñemoĩva Hesu rehe hova mokõi

15Ha Hesu oavisa porã ichupekuéra ha he’i: Pema’ẽke, ha peñeñangarekóke umi fariséo ha Heródes levadúragui (mbo’epykuéragui).

16Ha ha’ekuéra he’i ojupe: Péva Hesu he’ínte ndajaguerúigui pan.

17Ha Hesu ohechakuaávo he’i ichupekuéra: Mba’érehepa peñoñe’ẽ’api ndapeguerúigui pan, napenemandu’ái ha napentendéi mba’eve gueteri piko, pendepy’a hatã gueteri ningo.

18Penderesa ningo ha ndapehechái, pendeapysa ningo ha napehendúiri. Peẽ penderesaráima,

19amboja’o hague 5 pan 5.000-pe g̃uarã, ha mboy ajaka renyhẽpa pembyatyva’ekue uperire gueteri. He’i hikuái: 12.

20Ha amboja’o ramoguare 7 pan umi 4.000 kuimba’épe g̃uarã mboy ajaka renyhẽpa pemono’õ. Ha hemimbo’ekuéra he’i: 7.

21Ha Hesu he’i ichupekuéra: Ndapehechakuaái piko gueteri (che pombo’eséva).

Hesu omonguera peteĩ hesatũvape

22Hesu og̃uahẽvo Betsáidape, ojegueru hendápe peteĩ hesatũva, ojerure asy hikuái ichupe opoko hag̃ua hese.

23Hesu ojapyhy pe hesatũva po ha ogueraha ichupe tava’ígui oka gotýo ha omoĩ rire hesáre hendy, omoĩ ipo hi’ári, ha oporandu ichupe: Rehechámapa.

24Ha ha’e ojesape’ávo he’i: Ahecha kuimba’ekuérape yvyráicha, oguatavahína.

25Hesu omoĩ jevývo ipo hesa ári, upépe ae ha’e ohecha porã, hesãi opytávo, ha ohecha sakã porã mombyry peve.

26Omondo hógape, ha he’i ichupe: Ani reike jey pe tava’ípe.

Pédro he’i Hesu ha’eha pe Mesias

27Upéi Hesu ha hemimbo’ekuéra oho Cesaréa, Filípo tava’ikuéra gotýo, ha tape rupi Hesu oporandu hemimbo’ekuérape: Mba’épa he’i kuimba’ekuéra, mávapa Che ha’eha.

28He’i hikuái ndeha Juan, pe oporobautizáva, ambue katu he’i: Eliasha, ambueve katu, peteĩ profetaha.

29Upérõ katu oporandu ichupekuéra: Ha peẽ, mba’épa peje Che ha’eha. Ha Pédro he’i: Nde ningo pe Crísto.

30Ha Hesu he’i jevy jey ichupekuéra ani hag̃ua he’i avavépe ha’eha pe Crísto, pe Mesías.

Hesu he’i omanotaha

31Ha Hesu oñepyrũ ombo’e ichupekuéra pe yvyarigua Ra’y (Hesu Crísto) ohasa asyva’erãha, umi karai anciáno (sanedrín) ombohasa asytaha ichupe; pa’i ruvichakuéra ha kuatia haihára ojukaukataha ichupe, ha mbohapy ára rire oikove jevyva’erãha.

32Hesu he’i sakã porã ko’ã ñe’ẽ, Pédro katu, ohenói ichupe ha’eñoháme, ha oñe’ẽ pohýi ichupe, ani hag̃ua péicha he’ive.

33Hesu katu oñembojere, oma’ẽ hemimbo’ekuéra rehe, ha oja’o Pédrope, he’ívo: Ejei che renondégui, nde Satana, nerepensái Ñanderuete rembipotáre, kuimba’e rembipotáremante repensa.

34Ha ohenóivo umi oñembyatýva ha hemimbo’ekuérape, he’i ichupekuéra: Opavave ouséva che rapykuéri, toñembotove ojupe, tohupi ikurusu ha tou che rapykuéri.

35Opavave osalvaséva hekove, ohundiva’erã, ha umi ohundíva hekove cherehehápe ha evangélio rehehápe katu, ojesalvava’erã katuete.

36Mba’épa ohupitýne pe kuimba’e oñemomba’epárõ jepe ko múndo rehe ha ohundírõ hekove.

37Mba’épa kuimba’ekuéra ha kuñakuéra ikatúne ome’ẽ hekove rekovia.

38Oimeraẽ yvyarigua ha angaipavóra otĩva cherehe ha che ñe’ẽ rehe, Ñanderuete Ra’y otĩva’erã avei hese, ouha árape Ñanderuete reko ojajaipáva reheve ha hi’angelkuéra heko potĩva ndive.