Levítico 22 - Biblia en Guaraní - ?anderuete ?e’? Por? 2015

Kuave’ẽmbynguéra

1Ñanderuete oñe’ẽ Moiséspe, ha he’i:

2Ere Aaron ha ita’yrakuérape tomomba’e umi me’ẽmby oñemboykéva pende Ruetépe g̃uarã, Israel ñemoñarenguéra ome’ẽva’ekue chéve, anítei omongy’a che réra porãite. Che ningo, pende Jára.

3Ere ichupekuéra: Mayma kuimba’e pene ñemoñarenguéra apytépe oñemboja ramo umi mba’e oñemboykéva pende Ruetépe g̃uarã rehe Israel ñemoñarenguéra ome’ẽva’ekue chéve, ha’e oñemongy’a ha upévare ojejukava’erã ichupe che renondégui, Che ningo pende Jára.

4Oimeraẽ Aaron ñemoñare iléprava, térã imba’e tykýva, ndo’uiva’erã umi mba’e oñemboykemava’ekuégui ha’e ipotĩ jevy peve. Pe opokóva oime haichagua te’õngue rehe, térã pe kuimba’e imombary ñehẽva’ekue rehe,

5térã pe kuimba’e opokova’ekue oime haichagua yvyja rehe ha péicha rupi oñemongy’a, opokova’ekue peteĩ hapicha oñemongy’ava’ekue rehe,

6upe kuimba’e upéva opyta iky’áva ramo avei kuarahy oike peve, ha ndo’uiva’erã umi mba’e oñemboykemava’ekuégui pende Ruetépe g̃uarã ojahu peve.

7Pe kuarahy oike rire ipotĩ jevýta ha ikatu ho’u jevy umi mba’e oñemboykémava pende Ruetépe g̃uarã, hembi’urã voi ningo umíva.

8Mba’e re’õngue ha mymba ñarõ ojepehe’ãva’ekue ndo’uiva’erã, oñemongy’áta hesekuéra, Che ningo, pende Jára.

9Pejapóke che rembiapoukapy, ha ani peñemoangaipa umi mba’e rupi, ani hag̃ua pemano pepyrũgui hese. Che, pende Ruete amboykéma umi mba’e chéve g̃uarã.

10Avave hesegua’ỹva ndo’uiva’erã umi mba’e oñemboykémava pende Ruetépe g̃uarã; ni pa’i mbohupa, ni pe omba’apóva ichupe g̃uarã.

11Pe pa’i ojogua ramo oimeraẽ tembiguái, kóa ho’ukuaa ichugui, ha avei ita’ýra onacéva hógape ikatu ho’u avei ko tembi’u kóvagui.

12Pe pa’i rajy omenda ramo kuimba’e hesegua’ỹva rehe, ndo’uiva’erã umi kuave’ẽmbýgui.

13Ha oime ramo iména omano térã ojepoi ichugui, ha naimembýi ha ou jevy ramo itúva rógape, ku imitã ramoguaréicha, ho’ukuaa jevy itúva rembi’úgui; avave hesegua’ỹva katu ndo’uiva’erã ichugui.

14Ha peteĩva ho’u ramo ko’ã mba’e oñemboykemava’ekuégui pende Ruetépe g̃uarã oikuaa’ỹre, omyengoviapa jevýta pa’ípe ha hi’ári 20 por cientove.

15Israel ñemoñarenguéra noñemongy’aiva’erã umi mba’e oñemboykemava’ekue rehe pende Ruetépe g̃uarã.

16Upe ho’úva umi mba’égui; oñemoangaipa pende Ruete renondépe.

17Ñanderuete oñe’ẽ Moiséspe, ha he’i:

18Eñe’ẽ Aarónpe, ita’yrakuéra ha opaite Israel ñemoñarenguérape, ha ere ichupekuéra: Oimeraẽ kuimba’e Israelgua térã tetã ambueygua oikóva Israel retãme, oikuave’ẽ ramo kuave’ẽmby, taha’e ome’ẽgui iñe’ẽ pende Ruetépe (vóto) oikuave’ẽtaha térã ijeheguieténte oikuave’ẽse kuave’ẽmby ojehapypáva pende Ruetépe g̃uarã,

19oñemoĩ porã jevy hag̃ua, upérõ toikuave’ẽ peteĩ tóro, térã ovecha térã kavara mácho iporãitéva.

20Mba’eve imarãva napeikuave’ẽiva’erã, napenemoĩ porãmo’ãigui.

21Upéicha avei oimeraevã oikuave’ẽséva kuave’ẽmby py’aguapy reheguáva pende Ruetépe g̃uarã omboajeva’erã (ocumpli) iñe’ẽme’ẽ térã oikuave’ẽséva, taha’e tóro, térã ovecha, térã kavara mácho, togueru peteĩ tymba iporãitéva.

22Tymba hesatũva, hetymapẽva, oĩmba’ỹva, ikytãmbáva, ikura’ỹiva térã ikurúva, ndapeikuave’ẽiva’erã pende Ruetépe, ko’ãva anítei pemoĩ pende Ruete kuave’ẽmby renda ári, kuave’ẽmby hendypáva ramo.

23Ndejeheguínte reikuave’ẽse ramo reikuave’ẽkuaa avei ne rymba ikarẽva térã noĩmbáiva; reikuave’ẽse ramo katu peteĩ tymba reme’ẽgui ne ñe’ẽ pende Ruetépe (promésa, vóto) ndaikatuiete.

24Tymba ha’ỹi oñembyaíva térã oñehungapyréva, osoróva térã oñekytĩva, ndikatúi peikuave’ẽ pende Ruetépe g̃uarã, ndaipotái pejapo ko’ã mba’e pene retãme.

25Ndapejapyhyiva’erã avei tetã ambueyguágui ko’ãichagua tymba peikuave’ẽ hag̃ua pende Járape tembi’u reheve, oĩgui hesekuéra oñembyaíva ha imeg̃uáva, ndovalemo’ãi peẽme g̃uarã.

26Ha Ñanderuete oñe’ẽ Moiséspe, ha he’i:

27 Torora’y térã ovechara’y, térã kavarara’y, 7 ára onace rire okambuva’erã isy rehe; ha pe ára 8-ha guive ikatúma peikuave’ẽ kuave’ẽmby hendypáva ramo pende Ruetépe g̃uarã.

28Taha’e tóro térã ovecha, ndere’ajúra kytĩriva’erã peteĩ árape isy ha imembýpe oñondive.

29Ha peikuave’ẽ ramo kuave’ẽmby agradecimiénto reheguáva pejapopa hekoitépe pemomba’eguasu hag̃ua pende Ruetépe.

30Pe’upa pe kuave’ẽmbyha árape, ndapehejaiva’erã mba’eve ambue árape g̃uarã. Che ningo Jahve.

31Pejapókena che rembiapoukapykuéra, Che ningo Jahve.

32Ha aníke pemongy’átei che réra porãite, Che reko iporãgui Israel ñemoñarenguéra apytépe. Che, pende Ruete, pomopotĩ ahávo,

33ha Che poguenohẽva’ekue Egípto retãgui, aiko hag̃ua pende Jára ramo, Che ningo Jahve, pende Ruete.