1 Corintoyguakuérape 9 - Biblia en Guaraní - ?anderuete ?e’? Por? 2015

Páblo, Hesu Crísto apóstol

1Nachesãsói nga’u piko. Ndaha’éipa che peteĩ apóstol. Ndahecháipa ra’e Ñandejára Hesu Crístope. Ndaha’éipa peẽ che rembiapokue Hesu Crísto rupi.

2Ambuekuérape g̃uarã che ndaha’éi ramo jepe peteĩ apóstol, peẽme g̃uarã che ha’e; peẽ pejeroviágui pehechauka che Hesu Crísto apostolha.

3Ha kóicha ambohovái umi cherehe oñe’ẽvaívape:

4Ndoroguerekói piko ore avei pe derécho rokaru ha roy’u hag̃ua,

5ndoroguerekói piko ore pe derécho romenda hag̃ua avei peteĩ hermána rehe, ambue apostolkuéraicha, ha Hesu Crísto ryvykuéraicha ha Pédroicha,

6térã piko che ha Bernabe añónte ndoroguerekói pe derécho ropoi hag̃ua ore po rembiapógui.

7Máva piko oho ñorãirõme ijehegui reínte. Máva piko oñotỹ parral ha ndo’úi hi’a. Máva piko omongakuaa hymbakuéra ha ndo’úi ikamby.

8Che piko ha’e ko’ã mba’e che akãguireínte, Moises rembiapoukapy nde’íri avei péicha.

9Moises kuatiañe’ẽme voi ningo he’i: Ani rejokua ne rymba guéi juru ha’e ojykýi aja nde koga’a; ko mba’e kóva piko Ñanderuete ohaiuka ojepy’apýgui pe guéi rehe (Deuteronómio 25,4),

10térãpa ñande kuimba’e ha kuña rehe. Ñanderehe uvei ojehai avei ko ñe’ẽ kóva: Upe ombovóva ikokue yvy ha ojykýiva ikóga ra’ỹi omba’apo oha’ãrõgui ohupity hag̃ua ikoga’a.

11Ore roñotỹ ramo pendepype mba’e Pytu Porãmbáva rehegua, mba’eguasuetéta piko romono’õrõ pendehegui ore remikotevẽ ore retépe g̃uarãva.

12Ambuekuéra oiporu porã ramo ko derécho kóva, ndaijavéipa oréve rohupityve hag̃ua avei. Ha ija ramojepe oréve ore ndoroiporuséi ko derécho roguerekóva, ore rogueropu’aka uvei opaite mba’e ani hag̃ua romoĩ peteĩ cárga ore rekove rupi (hermanokuérape g̃uarã), romyasãi aja Hesu Crísto ñe’ẽ porãite.

13Ndapeikuaái piko umi Levigua omba’apóva Ñanderuete rogaguasúpe oikoveha pepegua rembiapógui, ha umi pa’i omba’apóva pe kuave’ẽmby rendápe ho’uha avei pe kuave’ẽmby ro’ógui.

14Upéicha Hesu Crísto oipota avei umi omyasãivahína iñe’ẽ porãite oiko avei ko tembiapo kóvagui.

15Che voi ndaiporúi ko derécho arekóva, ni ndahaíri ko mba’e kóva oñeme’ẽ hag̃ua chéve che remikotevẽ amyasãi hag̃ua Hesu Crísto ñe’ẽ porãite. Amanoseve ajerure rãngue koichagua pytyvõ rehe amyasãi hag̃ua Ñanderuete ñe’ẽ porãite, ha avave ndoipe’amo’ãi chehegui ko terakuã arekóva.

16Che amyasãi ramojepe ndaguerekói mba’érehepa che ajererovu hag̃ua, péva ajapova’erã voínte. Angái che, che namyasãivéi ramo.

17Che voi amyasãi ramo ahupitýta che rembiapo repy, Hesu Crísto katu chejokuái aiko hag̃ua hembiguái ramo.

18Upéicharamo mba’épa che rembiguái rembiapo repy, péva ningo pe vy’a che arekóva amyasãigui Ñanderuete ñe’ẽ porãite aiporu’ỹre che derécho, amyasãigui ko evangélio kóva acobra’ỹre mba’eve che rembiapo repy rehe.

19Upéicha che sãso opavavégui, upeichavéramo jepe che voi añemoĩ opavave rembiguái ramo, ahupity hag̃ua hetavépe.

20Upéicha che aiko aja Judayguakuéra apytépe, aiko Judaygua ramo ahupity hag̃ua ichupekuéra pe evangélio rupi, che ndaikovéi ramo jepe Moises rembiapoukapykuéra poguýpe, ahupityse avei ichupekuéra,

21ha umi tetã ndoikuaáiva Moises rembiapoukapykuéra, che aiko ijapytépe peteĩ kuimba’e ndoikuaáirõ guáicha Moises rembiapoukapykuéra, naiméi ramojepe Moises rembiapoukapy’ỹre; ko’ág̃a katu apytáma Hesu Crísto rembiapoukapykuéra poguýpe, ahupity hag̃ua Hesu Crísto evangélio rupi umi oikóvape Moises rembiapoukapy’ỹre.

22Ikangýva apytépe che aiko avei ikangýva ramo, ahupity hag̃ua ichupekuéra pe evangélio rupi. Opavavépe g̃uarã aiko ha’ekuéraicha, anohẽkuaa hag̃ua mbovymíme jepe heko vaígui, (Ñanderuetépe g̃uarã).

23Opaite ko’ã mba’e ko’ãva ajapo pe evangélio rehehápe, che voi aiko hag̃ua heseguakuéra ramo avei.

24Ndapeikuaái piko umi oñaníva carrerahápe oñanimba joa añete ningo, peteĩmínte oñeme’ẽva’erã katu pe oñaníva repy (prémio), upévare peñani porã pehupity hag̃ua avei pe oñaníva repy.

25Umi oñeha’ãmbáva ojejoko heta mba’égui ohupity hag̃uánte peteĩ yvyra rogue ñopẽmbyre iñakã rehegua jeguaka ramo, ha pya’e oñembyaíva; ñandéve g̃uarã katu oñembosako’i peteĩ akã rehegua ñopẽmbyre jeguaka oñembyai’ỹva araka’eve.

26Upévare che añani ramo, nañani reíri, ha añorãirõ ramo, nainupãi yvytu rei rehe,

27péicha che añeha’ãmba ajoko hag̃ua che rete heta mba’égui, ha’e opyta hag̃ua che rembipota poguýpe, ani hag̃ua che ambo’e rire ambuekuérape oñeha’ã porãmba hag̃ua, ha che voi apia Hesu Crísto rapégui.