Cantar de los cantáres 4 - Biblia en Guaraní - ?anderuete ?e’? Por? 2015

Pe menarã omomba’eguasu hembirekorãme

1Karia’y oñe’ẽ: Péina ápe nde ningo neporãite, kuñataĩ, che añetehápe ahayhuetéva, nde neporãite; nde resa ku pykasu resáicha, oma’ẽva ne akã aomo’ãha guýpe, ne akã rague ku kavara atýicha, oguejy joáva Galaad cérrogui.

2Ne rãi ojogua peteĩ ovecha aty oñeñapĩmbyrépe, ou joáva oñembojahu hágui, imembykõi joaitéva, ha ndaipóri imemby’ỹva ijapytépe.

3Ne rembe ku inimbo pytãitéicha, ha iporãite nde juru; nde rova yke ha’ete granáda (yva) aju, nde rova aomo’ãha guýpe.

4Nde ajúra, ha’ete ku David róga yvate oñemopu’ãva’ekue itágui iñorãirõ rembiporu rendag̃ua; 1000 hu’y mo’ãha osãingo joáva hese, ipy’aguasúva hu’y ryru reheve.

5Nde pyti’a ku guasu kõinguemícha, okaru joáva yvoty (lírio) apytépe.

6Iñapysẽ guive pe ára ha okañy meve pe kuarahy’ã aháta pe mírra ha inciénso (mba’e ryakuã asy porã) rekávo cérrope.

7Nde kuñataĩ, che mborayhu, neporãite, ndaipóri mba’eve ivaíva ne akã guive nde py peve.

8Ejúna chendive, nde che rembirekorãmi; ejúna chendive pe Líbanogui. Ema’ẽmi pe Amana ru’ã guive, Senir ha Hermon ru’ã guive, umi leõ raity guive, ha umi jaguarete hũ oikoha cérro guive.

9Che rembirekorãmi, che mborayhu, ne ma’ẽ ha nde ajurigua chembotarovaite.

10Iporãite ningo ne mborayhu, che rembirekorãmi. Ne kunu’ũ iporãiteve vínogui, ha ne mba’e ryakuã hyakuã asyve opaite ambue mba’e ryakuã asývagui.

11Eíra omondyky ne rembégui, nde che rembirekorãmi; eíra ha kamby oĩ ne kũ guýpe; ha umi nde ao ryakuã ojoguaite Líbano ryakuãme.

12Yvotyty oñembotypyréva nde, che rembirekorãmi; yvu oñembotypyréva, nde.

13Opaite mba’e oĩva térã osẽva guive ndehegui ojogua peteĩ granada’a aty iporãvape (yvyra hi’a he’ẽ asýva). Opaite imba’e ryakuã iporãitéva reheve (alhéña ha nárdo),

14 nárdo ha azafrán, takuapi hyakuã asýva ha canéla, ha maymave inciénso, mírra ha áloe, opaichagua mba’e ryakuã asy reheve.

15Nde ningo peteĩ yvu yvotytýpe, hi’y oikovéva osyry Líbanogui.

16Kuñataĩ oñe’ẽ: Epu’ãna, yvytu yvatégui oipejúva, ha eju yvytu yvy gotýogui oipejúva; peipeju che yvotytýpe, ha ta’iñasãi tyakuã porã. Tou che mborayhu jára ijyvatýpe, ha to’u yva he’ẽ asýva.