1Ko’ág̃a peẽ Israelguakuéra, pehendúma ko’ã mbo’epy ha tembiapoukapy, che pombo’emava’ekue ha pejapóke hekoitépe peikove hag̃ua pe yvýpe Ñanderuete, pende rukuéra Jára, ome’ẽtava peẽme.
2Anítei pembojoajuve térã peipe’a mba’eve che ha’éva guive peẽme, pejapopa uvei hekoitépe Ñanderuete rembiapoukapy che ha’e hagueichaite peẽme.
3Pende resa ohechapákuri Ñanderuete ojapova’ekue Baalpeor rehe; Jahve, Ñanderuete, ohundíkuri, pende apytégui, opaite kuimba’e ohomava’ekue Baalpeor rapykuéri.
4Ha peẽ pehova’ekue Ñanderuete rapykuéri katu, peikove gueteri ko ára kóva peve.
5Pema’ẽ porãke, che pombo’ékuri Ñanderuete mbo’epy ha hembiapoukapykuéra, Ha’e he’i haguéicha chéve, pejapopa ramo hekoitépe, pe yvy mamo peiketahápe katuete opytáta pene mba’erã.
6Peñangarekókena ha pejapo hekoitépe hembipota; péva ningo peẽme g̃uarã arandu ha akãporã ambue tetã renondépe, ohendu ramo hikuái ko’ã ñe’ẽ ha tembiapoukapy he’iva’erã: Añetehápe ko’ã Israelgua iñarandu ha iñakãporã, ko tetã kóva ningo ituichaite.
7Mba’eichagua tetãpa oguereko Ijára ag̃uiete ichuguikuéra, Ñanderuete oiko háicha ñanendive ha opaite mba’e ikatúva jajerure ichupe.
8Ha mba’eichagua tetãpa oguereko ko’ã mbo’epy ha ñembojovake iporãva peẽ peguereko háicha, amoĩ jevýva pene renondépe ko ára kóvape.
9Upévagui peñangarekóke pendejehe ha peñangareko porãke pene ánga rehe, ani hag̃ua penderesarái térã pemboyke pende py’apýgui umi mba’e pende resa ohechamava’ekue peẽ peikove aja pukukue; ha péva pembo’e jevyva’erã pende ra’ykuéra ha pene reminenonguérape.
10Peñemomandu’a porãke pe ára rehe peime ramoguare Jahve, pende Jára renondépe Horébpe, Ha’e he’i ramoguare chéve: Embyaty chéve ne retãyguakuérape ahenduka hag̃ua ichupekuéra che ñe’ẽ, ha reikuaaukava’erã okyhyje hag̃ua chehegui opaite ára oikove aja yvy apére ha upéicha ombo’e jevyva’erã avei ita’yrakuérape;
11ha peñemboja ha peñembo’y pe cérro ypýpe, pe tata hendýva oĩ aja cérro ru’ãme ha ojupíva yvágape ha pe cérro ru’ã jerekuévo hi’araipa ha iñypytũmba.
12Ha Ñanderuete oñe’ẽ penendive tata rendy pa’ũ guive; pehendúkuri iñe’ẽ, ndapehechái hete ramojepe.
13Ha’e omyesakã peẽme iñe’ẽme’ẽ ha he’i peẽme pejapo hag̃ua umi 10 tembiapoukapy Ha’e voi ohaiva’ekue mokõi ita rehe.
14Upéramo Ñanderuete he’i avei chéve, pombo’e hag̃ua peẽme umi mbo’epy ha tembiapoukapy, pejapopa hag̃ua hekoitépe iñe’ẽ, peike guive pe yvy pene mba’erãvape.
Ñanderuete oavisa Israelguakuérape ani hag̃ua omomba’eguasu ta’ãngakuéra15Peñangareko porãkena pene ánga rehe; ndapehecháikuri mba’eveichagua ta’ãnga Ñanderuete oñe’ẽ jave penendive tata mbyte guive;
16ani hag̃ua peñemongy’átei ha pejapo pendejupe g̃uarã peteĩ tete ra’ãnga, mba’eveichagua ta’ãnga, taha’e kuimba’e térã kuña ra’ãnga,
17ni tymba oĩva yvy ape ári térã guyra ipepóva ha ovevéva yvate,
18ni tymba otyryrýva yvy apére térã pira oĩva ýpe.
19Ha pema’ẽvo ára rehe ha pehecha ramo pe kuarahy, pe jasy, umi mbyjakuéra térã ambue mba’e ani pejeity henondepekuéra pemomba’eguasu hag̃ua; umía Ñanderuete oheja ambue tetãnguéra oĩva ára guýpe g̃uarã.
20Pende Ruete katu pendeporavo ha penerenohẽ Egíptogui, tatakua hierroguiguágui peiko hag̃ua hetãtee ramo ko ára peguáicha.
21Ha Ñanderuete ipochy chendive pene ñe’ẽ rehe, ha he’i chéve, che ndahasamo’ãitaha Jordan mboypýri, ha ndaikeiva’erãha pe yvy porãme Jahve, Ñanderuete ome’ẽtava peẽme pene mba’etee ramo.
22Péicha che amanóta ko yvýpe ha ndahasamo’ãi Jordan mboypýri; peẽ katu pehasáta ha peñemomba’éta pe yvy porã rehe.
23Peñangarekóke pendejehe ha ani penderesarái Jahve, Ñanderuete ñe’ẽme’ẽgui, Ha’e ojapova’ekue penendive ha ani pejapótei mba’eveichagua tete ra’ãnga, Jahve, Ñanderuete ndoipotáigui.
24Jahve, Ñanderuete, ningo tata oporombokusuguepáva, Ñanderuete heko rakate’ỹva.
25Ha ág̃a pende ra’ykuéra ita’ýra jevyha ára, ha pendetujáma ramo pe tetãme, ha pende reko vai ha pejapo ramo tete ra’ãnga térã oimeraẽ mba’e ra’ãnga, péicha ramo pejapo ivaíva Ñanderuete, pende Jára rehe, ha hesa renondépe, pembopochýta ichupe;
26che ahenói techahare ramo yvagakuéra ha ko yvy pya’eiterei peñehundipava’erã pe yvy mamo pehohápe; pemomba’eguasu ramo ambue járape, ndapeikomo’ãi are ipype, katuete peñehundipáta.
27Ha Ñanderuete penemosarambiva’erã umi tetãnguéra apyte rupi, ha sa’i penerembýta umi tetã apytépe Ñanderuete pendererahatahápe.
28Ha upépe peikóta jára gua’u rembiguái ramo, kuimba’e ojapova’ekue, yvyra térã itágui, ha’ekuéra ndohechái, nohendúi, ndokarúi ni nohetũi.
29Upégui peheka jevýta pende py’aite guive ha pene ánga mbytete guive pende Ruetépe ha pejohu jevýta ichupe.
30Peime vove jepy’apýpe ha penderupity ramo opaite ko’ã mba’evai, umi ára pahague gotyoguápe, pejevy ramo Jahve, pende Jára gotýo, ha pehendu ramo iñe’ẽ,
31Ha’e pendeporiahuvereko jevýta; ndopoimo’ãi pendehegui ni ndahesaraimo’ãi pe ñe’ẽme’ẽgui oikova’ekue pende rukuéra ndive.
32Peporandu umi ára ymaguare oikova’ekuépe, umi ára Ñanderuete ojapo ypy ramoguare kuimba’e ha kuña yvy apére, ojejapómapa ko’ãichagua mba’eguasu, térã oñehendúmapa ambue mba’e peichagua peteĩ yvága apýra guive ambue yvága apýra peve.
33Oĩ piko peteĩ tetã ohendúva Ñanderuete ñe’ẽ, oñe’ẽmava tata mbyte guive, peẽ pehendu haguéicha, ha upéi oikove gueteri.
34Térã oĩ piko peteĩ Jára oñeha’ãva ou hag̃ua yvy apére oguenohẽ hag̃ua peteĩ tetãme ambue tetãnguéra apytégui imba’etee ramo, milagrokuéra rupi, tembiapo ohecha’ỹva térã ñorãirõ rupi, térã pyapy mbarete ha jyva jepyso rupi, térã tembiapo oporomondýiva rupi, Jahve, pende Ruete, ojapo haguéicha Egípto retãme, pende resa renondépe.
35Peẽmente ojehechaukákuri, peikuaa hag̃ua Jahve, Ñanderuetépe, ha ijykére ndaipóri ambue.
36Yvága guive Ha’e ohenduka peẽme iñe’ẽ, penembo’e hag̃ua; ha yvy ári ohechauka peẽme hata guasuete, ha tata mbyte guive pehendu iñe’ẽ.
37Ha ohayhúgui pende rukuérape, oiporavo iñemoñarenguérape imba’erã ramo, ha penerenohẽ Egíptogui, hendivénte oĩgui pu’akapa,
38omosẽ hag̃ua pene renonderãgui tetãnguéra ituicha ha imbaretevévape pendehegui, ha ijyvykue ome’ẽ peẽme pene mba’eteérã, pehecha háicha ko árape.
39Peikuaákena ko árape ha pejepy’amongeta porãke pende py’apýpe, Jahve ha’eha pende Ruete, yvagakuérape ha yvy apére ndaiporiha ambue Ha’éichagua Jára.
40Upévare pejapóke iñe’ẽ ha hembiapoukapykuéra, che ha’éva guive peẽme ko árape, oho porãmba hag̃ua peẽme ha pende ra’ykuérape, ha pembopukuve hag̃ua umi ára, peikove hag̃ua ko yvy kóvape, Ñanderuete ome’ẽséva peẽme opaite árape g̃uarã.
Táva oñekañyháme Jordan yke asúpe41Upéramo Moises omboyke mbohapy táva Jordan yke asúpe, kuarahyresẽ gotýo,
42okañy hag̃ua upépe pe oporojukávagui, ndojukaséi ramojepe hapichápe ha ndoguerekoiva’ekue juavy hendive araka’eve; ha upe okañýva ko’ã táva peteĩmeosalváta hekove:
43Béser yvypépe opyta Rubénpe; Ramot, Gad yvýpe, opytáva Galaádpe; ha Golan, Manases yvýpe opytáva Basánpe.
Moises omomandu’a jevy Israelguakuérape Ñanderuete rembiapoukapy44Ko’ã tembiapoukapy Moises omomandu’a jevy Israel ñemoñarenguérape.
45Ko’ãva hína umi ñe’ẽ mbo’epy ha tembiapoukapy Moises he’iva’ekue Israel ñemoñarenguérape, osẽ ramoguare hikuái Egíptogui.
46Jordan yke asúpe, kuarahyresẽ gotýo, pe válle Petpeor rovái, Moises ha Israelguakuéra ombopoguy haguépe Sehónpe, Amorgua retã ruvicha, oikova’ekue Hesbónpe, ha ojapova’ekue hesekuéra sarambiguasu.
47Upéi oñemomba’e hikuái Og, Basan retã ruvicha yvy rehe; mokõivéva Amorguakuéra retã ruvicha oikova’ekue Jordan yke asúpe, kuarahyresẽ gotýo,
48Aroer guive, opytáva Arnon yakã rembe’ýpe, Sirion cérro peve, péva hína Hermon,
49ha Araba tuichakue javeve Jordan yke asúpe, kuarahyresẽ gotýo, pe Araba yguasu ha Písga cérro rembe’y peve.
Who We AreWhat We EelieveWhat We Do
2025 by iamachristian.org,Inc All rights reserved.
