1Upévare ore ndaikatuvéimagui roha’ãrõve, ropyta ore año Aténaspe,
2ha romondo pene rendápe Timotéo, ñane hermánope, ha’e ningo ore irũ voi, omoherakuãgui orendive Ñanderuete ñe’ẽ porãite. Ichupe romondo pene rendápe penemombarete ha penemokyre’ỹ hag̃ua pende jeroviápe,
3ani hag̃ua avave ikangy ko’ã jehasa asy rupi. Peẽ peikuaa porã voi ñande jahasa asytaha, (jajeroviágui Hesu Crísto rehe).
4Ore roime ramoguare penendive gueteri, ore voi romombe’u porã peẽme ore rohasa asytaha, ojehu haguéicha avei uperire, ha ko mba’e peikuaa porãmba voi.
5Upévare, che ndachepu’akavéigui, aha’ãrõve hag̃ua amondo Timotéope, aikuaa hag̃ua mba’éichapa pehasa pende jeroviápe, ani hag̃ua (Satana) pendepy’ara’ã vaiete ha ore rembiapokue pende apytépe opyta rei.
6Ko’ág̃a Timotéo ojevy riréma pene rendágui, omombe’u oréve pende jerovia ha pene mborayhu iporãha ha peẽ penemandu’a porãha tapia orerehe, ha peẽ orerechaseitereiha, ore pohechase háicha peẽme avei.
7Iñe’ẽ ningo, che hermanokuéra, tuicha oremoangapyhy ore jehasa asy apytépe, roikuaávo peẽ pejerovia porãha pehóvo.
8Ko’ág̃a ningo orekyre’ỹve jevy, roikuaávo peẽ peime hatãha pende jeroviápe Hesu Crísto rehe.
9Upévare heta roagradece Ñanderuetépe penderehe ha pe vy’a roñandúva rehe henondépe pende jerovia porã rupi.
10Ára ha pyharépe rojerure asy ore ñembo’épe Ñandejárape, ore rohecha hag̃ua pende rova ha ore romyenyhẽ hag̃ua opaite mba’e ofaltáva guive gueteri pende jeroviápe.
11Ñandejára Ñanderuete ha Ñandejára Hesu Crísto tombosako’i ore raperã rog̃uahẽ meve pene rendápe.
12Ñanderuete tomongakuaa ha tomboheta pe mborayhu añeteguáva oñondive g̃uarã ha opavave ndive g̃uarã, ore pohayhu háicha.
13Peẽ penembareteve hag̃ua pende py’apýpe, ha pende reko ta’ipotĩve hag̃ua pehóvo Ñandejára Ñanderuetépe g̃uarã ha Ñandejára Hesu Crísto oúrõ g̃uarã opaite heseguakuéra ndive, taupéicha (amén).
Who We AreWhat We EelieveWhat We Do
2025 by iamachristian.org,Inc All rights reserved.
