Josue 1 - Biblia en Guaraní - ?anderuete ?e’? Por? 2015

Israel oñembosako’i oñemomba’e hag̃ua Canaan yvy rehe

1Moises, Ñanderuete rembiguái, omano rire, Ñanderuete oñe’ẽ Josue, Nun ra’ýpe, Moises rembiguaikue, ha he’i ichupe:

2Che rembiguái Moises omanóma, upévare epu’ã nde ha embohasa opaite Israelguakuérape Jordan mboypýri, pe yvy Che ame’ẽmava Israel ñemoñarenguérape.

3Che ame’ẽ peẽme, opaite umi yvy opyrũtahápe pende pykuéra, Che ha’e haguéicha Moiséspe.

4Pe desiérto guive Líbano ha Éufrates ysyryguasu peve, umi Hetgua yvy tuichakue javeve pe yguasuete peve kuarahy reikeha gotýo, opytáta pene retã ramo.

5Avave noñemoĩmo’ãi nderehe reikove aja pukukue; aime haguéicha Moises ndive, peichaite aiméta avei nendive, ndorohejamo’ãi ha noromotyre’ỹmo’ãi.

6Eñeha’ãmbaitéke ha eñembopy’aguasu, nde remboja’óta ko yvy ne retãyguakuéra mba’erã ramo, ha’e haguéicha ituvakuérape.

7Eñeha’ãmbaitéke ha eñembopy’aguasu, rejapo porãmba hag̃ua che rembiguái Moises he’i haguéicha ndéve; ani reñemboykétei akatúa ni asu gotýo, osẽ porãmba hag̃ua ndéve opaite mba’e rejapótava guive.

8Araka’eve neremboykeiva’erã ne akãgui ko tembiapoukapy kuatiañe’ẽme he’íva guive, ára ha pyhare ejepy’amongeta hese, eñangareko ha ejapopa ipype ojehai haichaite; péicha ramo tuicha reñakãrapu’ãta, ha opaite mba’e osẽ porãmbáta ndéve.

9Ema’ẽ porãke, Che ha’éma ndéve eñeha’ãmba ha eñembopy’aguasu; ani rekyhyjétei ha ani ndepy’akangýtei, pende Ruete, pende Jára, oĩta nendive mamo rehoha rupi.

10Ko’ã ñe’ẽ Josue he’i mburuvichakuérape:

11Pehasa pe tekoha rupi ha peje pene retãyguakuérape: Pembosako’i pene rembi’urã, ko’águi mbohapy arahápe jahasáta pe Jordan ysyry rupi ñañemomba’e hag̃ua Canaan yvýre, Ñanderuete, Ñandejára ome’ẽta ñandéve, ñane mba’erã ramo.

12Josue oñe’ẽ avei umi Rubengua, Gadgua ha Manases tríbu mbyterépe, ha he’i:

13Penemandu’áke Moises, Ñanderuete rembiguái, ñe’ẽ rehe, he’ívo: Ñanderuete, Ñandejára ñandegueru ko yvy rembe’ýpe, ome’ẽ hag̃ua peẽme ko yvy kóva.

14Pene rembireko, pene mitã ha pene rymbakuéra opytapava’erã ko Jordan rembe’y ágotyo Moises ome’ẽgui peẽme ko yvy kóva; ha peẽ, kuimba’e ipy’aguasu ha imbaretéva guive, pehasáta pene ñorãirõ rembiporu reheve pende ryke’ykuéra renonderãme, peipytyvõ hag̃ua ichupekuéra (ombopoguy hag̃ua Canaanguakuérape).

15Ñanderuete ome’ẽ meve pytu’u pende ryke’ykuérape, ome’ẽ haguéicha peẽme, ha ha’ekuéra oguereko hag̃ua avei imba’erã pe yvy Ñanderuete, Ñandejára, ome’ẽtava ichupekuéra; ha uperire peju jevýta ko yvy, pene mba’erãme, Moises, Ñanderuete rembiguái, ome’ẽva’ekue peẽme, ko Jordan rembe’y ágotyo, kuarahyresẽ gotýo, peñemomba’e hag̃ua hese.

16Upéramo he’i hikuái Josuépe: Ore rojapóta opaite mba’e ereva’ekue guive oréve, ha rohóta mamo nde oremondosehápe.

17Oreñe’ẽrendu haguéicha Moiséspe, péicha oreñe’ẽrendúta avei ndéve, Ñanderuete, nde Jára, oĩ ramo nendive, oĩ haguéicha Moises ndive.

18Oimeraẽ oñemoĩva ne rembiapoukapy rehe, ha ndojapóiva umi mba’e nde eréva guive omanova’erã; eñeha’ãmbaitéke ha ndepy’aguasúke.