1Opáma ramo pe tembiapo Salomon ojapoukava’ekue Ñanderuete rógape g̃uarã, Salomon omoinge ipype umi mba’e itúva David omboykemava’ekue: Pe pláta, pe óro ha opaite tembiporukuéra.
Salomon oguerova Ñanderuete karameg̃ua hogaguasúpe2Upéramo Salomon ombyatyuka Jerusalénpe: Israel karai ancianokuérape, opaite tríbu ruvichakuérape ha Israel rogaguasu ruvichakuérape, oguerova hag̃ua Ñanderuete karameg̃ua David távagui, upéva hína Sion.
3Upéicha oñembyaty tetã ruvicha ndive opaite kuimba’e Israelgua, pe jasy 7-hápe, pe areteguasu jave,
4oupa Israel karai ancianokuéra ha umi Levigua ha ohupi pe karameg̃ua,
5ha ogueraha Ñanderuete karameg̃ua, ha pe óga jojohuha ha opaite tembiporu oĩva guive pe óga jojohuhápe, pa’i ha Leviguakuérante oguerojapa umi mba’e.
6Ha tetã ruvicha Salomon, ha opaite Israelgua oñembyatyva’ekue hendive pe karameg̃ua renondépe, oikuave’ẽ hag̃ua hetaiterei ovecha ha tóro ndaikatuvéima ojepapa.
7Ha pa’ikuéra omoinge Ñanderuete karameg̃ua hendag̃uáme, pe kotyguasúpe oñemboykéva Ñanderuete ha pa’iguasúpe g̃uarã, umi querubin (ángel ra’ãnga) pepo guýpe.
8Umi querubin pepo ojepyso pe karameg̃ua ári, ha péicha umi querubin omo’ã yvatéguio pe karameg̃uáme, hi’yvakuéra reheve.
9Hi’ýva ojehechakuaa pe kotyguasúgui oñemboykéva pa’ikuérape g̃uarã, ndojehechái okáguio; ha upépe opyta ko ára peve.
10Pe karameg̃ua ryepýpe oĩ umi mokõi ita ipéva Moises omoingemava’ekue Horeb cérrope, umíva rupi Ñanderuete oñembopy’apeteĩva’ekue Israel ñemoñarenguéra ndive, osẽ ramoguare Egipto retãgui.
11Ha umi pa’i osẽva’ekue ikotyguasúgui oñemboheko potĩva’ekue, ndaha’éi ramo jepe hi’ára omba’apo hag̃ua Ñanderuete rogaguasúpe.
12Umi Levigua opurahéiva, oĩ opaite Asaf, Heman ha Jedutun reheguáva, ita’ýra ha ityvyrakuéra reheve, oñemonde hikuái ao líno hepývape ha ombopu platíllo, mbaraka ha árpa pe kuave’ẽmby rendágui kuarahyresẽ gotýo, ha hendivekuéra oĩ 120 pa’i ombopúva ituru.
13Umi ombopúva iturukuéra ha umi opurahéiva, umi ombopúva iplatíllo ha ambue mba’epu, omomba’eguasu oñondivepa Ñanderuetépe, ha he’i: Ha’e ipy’aporã ha iporiahuvereko oĩ opaite árape; ha upévo Ñanderuete rogaguasu henyhẽ peteĩ araígui.
14Pe arai oĩgui upépe pa’ikuéra ndaikatuvéi opyta ipype ojapo hag̃ua hembiapo; Ñanderuete reko jajaipa omyenyhẽgui hogaguasu.
Who We AreWhat We EelieveWhat We Do
2025 by iamachristian.org,Inc All rights reserved.
