1 Crónicas 21 - Biblia en Guaraní - ?anderuete ?e’? Por? 2015

David oipapa hetãyguakuéra

1Satana katu oñemoĩ Israel rehe, ha oipy’ara’ã Davídpe oipapa hag̃ua Israelguakuérape.

2Ha David he’i Joab ha mburuvichakuérape: Tapeho ha peipapa Israelguakuérape Beerséba guive Dan peve, ha pemombe’u chéve mboýpa oĩ, aikuaa hag̃ua.

3Ha Joab he’i Davídpe: Ñanderuete tombohetave 100 jevyve ne retãyguakuérape, che jára ha che retã ruvichaguasúpe g̃uarã, ha’ekuéra ningo ne rembiguái hekoite peguáva; ha ma’erãiko che jára oikuaase mboýpa oĩ hikuái, ma’erãpa reityse Israelguakuéra ári ko angaipa kóva.

4Ha tetã ruvichaguasu ndoikuaaséi mba’eve ha nohendúi Joab ñe’ẽ. Ha Joab osẽ ha oguata Israel retã tuichakue rupi oipapa hag̃ua hetãyguakuérape ha ou jevy Jerusalénpe omombe’u Davídpe mboy hetãyguakuérapa oĩ hetãme.

5Ha ojejohu Israélpe 1.100.000, ha Judápe 470.000 kuimba’e oiporukuaáva kyse puku.

6Ko’ãva apytépe ndojepapái Leviguakuéra ni Benjamin ñemoñarenguérape, ivaígui Joab resápe huvichaguasu ojapoukáva.

7Ko’ã mba’e ndo’a porãi avei Ñanderuetépe, ha ombohasy Israélpe.

8Upémaramo David he’i Ñanderuetépe: Che rembiapo vaiete, ajerure ningo emboguemi che reko ñaña, ajapógui ko’ã mba’e tarovapópe.

9Ha Ñanderuete oñe’ẽ Gad, David profétape, he’ívo:

10Tereho ha eñe’ẽ Davídpe, ha ere ichupe: Péicha he’i pende Ruete: Mbohapy mba’evai amoĩ nde resa renondépe, reiporavo hag̃ua ijapytégui peteĩ mba’e Che ajapótava nderehe.

11Ha Gad ou David rendápe, ha he’i ichupe: Péicha he’i Ñanderuete:

12Eiporavo ko’ã mba’evairãgui peteĩ mba’e: Mbohapy áño pukukue ñembyahýi; térã mbohapy jasy pukukue nderehe ija’e’ỹva ipu’akáta nderehe; térã mbohapy ára pukukue, Ñanderuete kyse puku, ho’a hag̃ua ne retãme, ha Ñanderuete yvága rembiguái ojapo hag̃ua sarambiguasu Israel retãme mba’asy iñasãiva rupi. Ema’ẽ porãke, mba’épa ha’éta che mbouharépe.

13Upémaramo David he’i Gádpe: Ajepy’apyeterei. Ajerure tovénte ta’a Ñanderuete pópe, iporiahuvereko ituichágui ha ndaijapýrai; anínte ha’a jevy yvy ariguakuéra pópe.

14Upévare Ñanderuete ombou peteĩ mba’asy iñasãiva Israelpýre, ha omano 70.000 kuimba’e Israel retã apytégui.

15Ha Ñanderuete ombou ijyvága rembiguái Jerusalénpe ohundi hag̃ua; ha ohundi jave hína, Ñanderuete, oma’ẽ ha ombyasy pe mba’evai ojapoukáva. Ha he’i ijyvága rembiguáipe: Topántema, ejoko nde po. Ha ha’e oĩhína Ornánpe, Jebusgua ñemitỹ ra’ỹi mopotĩháme.

16Ha David ohupívo hesa ohecha peteĩ yvága rembiguái oñembo’ýva yvága ha yvy pa’ũme, ha peteĩ kyse puku nandi ipópe, oipysóva Jerusalen gotýo. Upémaramo David ha umi karai ancianokuéra ojeity yvy rehe ha oñemonde ao vosápe.

17Ha David he’i Ñanderuetépe: Ndachéipara’e aipapaukava’ekue tetãyguakuérape. Chénte pe añemoangaipamava’ekue, ha añetehápe ajapo vaiete; ha ko’ã ovecha, ore Ruete, che Jaratee, mba’épa ojapo hikuái, nde po tou che ári, ha che ru róga ári, ha ani oútei pe mba’asy iñasãiva ne retãyguakuéra ári.

18Ha pe yvága rembiguái he’i Gádpe, ere Davídpe tojupi ha tomopu’ã peteĩ kuave’ẽmby renda pende Ruetépe Ornan, pe Jebusgua ñemitỹngue mopotĩha rendápe.

19Upémarõ David ojupi Ornan rendápe Ñanderuete he’iuka haguéicha ichupe Gad juru rupi.

20Upejave Ornan ojykýi itrígo irundy ita’ýra ndive, ha Ornan ojerévo ohecha avei pe yvága rembiguái, ha ita’yrakuéra katu okañymba.

21Ha David og̃uahẽvo Ornan rendápe, ha Ornan ohechávo Davídpe, osẽ iñemitỹngue mopotĩha rendágui, oñesũ hag̃ua David renondépe.

22Upémarõ David he’i Ornánpe: Eme’ẽ chéve ko ñemitỹngue mopotĩha renda, amopu’ã hag̃ua peteĩ kuave’ẽmby renda Ñanderuetépe g̃uarã; eme’ẽ chéve hepyteére, opi hag̃ua ko ñemanoita Israel retãgui.

23Ha Ornan he’i Davídpe: Ejapyhy ne mba’erã, che retã ruvicha, che jára, tojapo iporãve háicha ichupe; ha tóro jepeve ame’ẽta kuave’ẽmby ojehapypa hag̃ua ha ñemitỹ ra’ỹi jykyiha eiporu jepe’a ramo, ha hi’ári che ame’ẽta avei trígo kuave’ẽmby tembi’u reheguáva ramo.

24Upéramo tetã ruvicha David he’i Ornánpe: Nahániri, hepyete rehénte ajoguáta ndehegui; ndajapyhymo’ãi Ñanderuetépe g̃uarã ne mba’éva ha ndajukamo’ãi kuave’ẽmby ojehapypáva oñeme’ẽ reíva’ekue chéve.

25Ha David ome’ẽ Ornánpe pe yvy péva rehe 6,7 kílo óro.

26Ha upépe David omopu’ã peteĩ kuave’ẽmby renda Ñanderuetépe g̃uarã, ha oikuave’ẽ hi’ári kuave’ẽmby ojehapypáva ha kuave’ẽmby py’aguapy reheguáva, ha ohenói Ñanderuete réra, ha Ha’e ombohovái ichupe yvága guive omboúvo tata pe kuave’ẽmby renda ári.

27Upévo Ñanderuete oñe’ẽ pe yvága rembiguáipe: Emoinge jevy nde kyse puku hyrúpe.

Ñanderuete róga rendag̃ua

28David ohechávo Ñanderuete ohendu hague ichupe Ornan, pe Jebusgua ñemitỹngue mopotĩha rendápe, oikuave’ẽ upépe ikuave’ẽmby.

29Ha Ñanderuete róga jojohuha Moises ojapova’ekue pe desiértope, ha pe kuave’ẽmby renda upéramo oĩ gueteri Gabaónpe, pe yvy yvatehápe.

30David ndikatúi oho upépe oikuave’ẽ hag̃ua Ñanderuetépe g̃uarã, okyhyjégui yvága rembiguái kyse pukúgui.