Salmokuéra 49 - Biblia en Guaraní - ?anderuete ?e’? Por? 2015

Umi ojerovia’ỹva mba’erepy pya’e opa - Core ra’ykuéra purahéi

1Pehendúke ko’ã mba’e, tetãnguéra maymáva, pejapysaka opavave peikóva guive ko yvy apére,

2taha’e karai térã tembiguái, ipirapire hetáva térã imboriahúva.

3Che juru oñe’ẽta arandu reheguáva, ha che py’apýgui heñóita akãguapy porã reheguáva.

4Che apysa ame’ẽ ñe’ẽ arandúpe, amombe’úta árpa púpe che ñe’ẽkañy.

5Mba’érehe piko akyhyjéta ajejopy vaiha árape, umi chejopy asýva ojerepa ramojepe cherehe.

6Ha’ekuéra ningo ojerovia imba’erepyeta rehe, ha oñembotuicha ipirapire heta rehe.

7Avave ndikatumo’ãi ojogua (pirapire rehe) ityvýrape ha ndaikatúi avei ome’ẽ Ñanderuetépe hekove repyrã.

8Hepyetereígui pe tekove ha péva avave ndohupitymo’ãi, ome’ẽ hag̃ua Ñanderuetépe,

9oikove hag̃ua tapia ha ndohechamo’ãi araka’eve iñemanorã.

10Jahecha voi umi iñarandúva jepe omanova’erãha, omano háicha itavýva ha ivýrova, ha ohejapa imba’erepyeta ambuekuérape g̃uarã.

11Ipy’apýpe hi’ã ichupekuéra hogakuéra opytáta tapia g̃uarã, ha iñemoñare rekove noñehundimo’ãiha araka’eve, upévare oñehenóita tetãnguérape heratee rupi.

12Pe yvyarigua katu ndoikomo’ãi tapiaite, oñemombe’u porã ramojepe, ojogua avei mymba omanóvape, ha og̃uahẽva’erã katuete pe ára ha’e omanova’erãha avei.

13Kóva ojehúta umi ojeroviáva imba’eita rehe ha ojehúta avei umi ohayhúva umi iñe’ẽngatúvape. Selah

14Ku ovecha atýicha ojegueraháta omanómava retãme, pe ñemano oisãmbyhýta ichupekuéra ha umi heko potĩva og̃uahẽvo pyharevekue ombopoguýta ichupekuéra, iporãngue oguéta ichugui, ha aña retãme oikova’erã.

15Ñanderuete katu cheguenohẽta ñemano pu’akágui, ha Ha’e chegueraháta hendive (yvágape). Selah

16Upévare ani rekyhyjétei oĩ ramo tapicha oñembopirapire hetáva, ha hetaiterei ramojepe imba’erepy.

17Ág̃a omano vove ndoguerahamo’ãi mba’eve hendive, ha ndoguejymo’ãi hapykuéri imba’eita.

18Oiko porã ramojepe ko yvy apére, ha ambuekuéra omomba’eguasu ramojepe ichupe peteĩ ára katuete ndovalevéima ipirapireita (ichupe g̃uarã).

19Ohova’erã katuete ituvakuéra rendápe ha ndohechaveimava’erã kuarahy mimbi.

20Pe kuimba’e oñembotuicháva ha ndoikuaaséiva mba’eve ojogua avei umi mymba omanova’erãvape.