1Ha opaite tetãyguakuéra oñembyaty peteĩ kuimba’eichaite pe okẽ y renda pegua okárape (plázape), ha he’i hikuái kuatia haihára Ésdraspe ogueru hag̃ua Moises rembiapoukapykuéra, Ñanderuete ome’ẽva’ekue Israélpe.
2Upéramo pa’i Ésdras ogueru umi tembiapoukapy, opaite kuimba’e ha kuñakuéra oñembyatýva guive ha ikatúva oikuaa mba’épa umi tembiapoukapykuéra he’ise, ha péva ojehu pe ára peteĩháme, jasy 7-hápe.
3Ha omoñe’ẽ pe kuatiañe’ẽ hetãygua atyguasu renondépe, opytáva pe okárape (pláza) y renda pegua okẽ renondépe, ko’ẽtĩ guive asaje pyte peve, opaite kuimba’e ha kuñakuéra ikatúva guive oentende pe kuatiañe’ẽme he’íva guive; ha tetãyguakuéra ojapysaka joa pe kuatiañe’e rembiapoukapy rehe.
4Ha pe kuatia haihára Ésdras ojupi peteĩ ipyendarã (púlpito) yvyrágui ojejapova’ekue ári, ha hendive oĩkuri Matitías, Sema, Anaías, Urías, Hilcías ha Maasías ipo akatúa gotýo; ha ipo asu gotýo, Pedaías, Misael, Malquías, Hasum, Hasbadana, Zacarías ha Mesulam.
5Ha Ésdras oipe’a pe kuatiañe’ẽ opaite tetãyguakuéra resa renondépe, ha’e oĩgui yvateve opaite tetãnguéragui; ha Esdras oipe’ávo pe kuatiañe’ẽ opaite tetãyguakuéra oñembo’yhína.
6Upéramo Ésdras omomba’eguasu Ñanderuete, Ijára tuichaitévape. Ha opaite hetãyguakuéra ombohovái: Taupéicha, taupéicha, (amen, amen) omopu’ãvo ipokuéra; ha oñemomirĩete hikuái ha omomba’eguasu hikuái Ñanderuetépe oñakãity joávo yvy peve.
7Ha Leviguakuéra: Jesúa, Bani, Serebías, Jamin, Acub, Sabetai, Hodías, Maasías, Kelita, Azarías, Jozabad, Hanan ha Pelaía, oikuaauka porã tetãyguakuérape pe tembiapoukapy he’iséva, hesakã porã hag̃ua.
8Ha omoñe’ẽ pe kuatiañe’ẽ, oĩháme Ñanderuete rembiapoukapy, ha péicha ombohasa Israelguakuérape Ñanderuete rembipota, ikatu hag̃uáicha oikuaa porã pe kuatiañe’ẽ he’iséva.
9Ha Nehemías, pe tetã sãmbyhyhára, ha pa’i Ésdras, pe kuatia haihára, ha umi Levigua oikuaauka porã tetãyguakuérape pe kuatiañe’ẽ he’iséva, ha he’i hikuái opaite tetãyguakuérape: Ko ára kóva onemboykéma Ñanderuetépe g̃uarã; ani peñembyasýtei, ha ani penerasẽtei; opaite tetãyguakuéra hasẽmbágui ohendúvo pe tembiapoukapy he’íva.
10Upéi Nehemías he’ive ichupekuéra: Tapeho ha pe’u tembi’u ikyráva, ha pe’u víno he’ẽva, ha peguerahauka avei tembi’u umi mba’eve nombosako’iriva’ekuépe; ko ára kóvape oñemboykémagui Ñandejárape g̃uarã; ani peñembyasýtei, Ñanderuete vy’a tapenemyenyhẽ uvei pende py’apy.
11Ha umi Levigua omokirirĩ opaite hetãyguakuérape, he’ívo: Pekirirĩ, ko ára kóva oñemboykémagui Ñanderuetépe g̃uarã, ha ani peñembyasyvétei.
12Ha opaite tetãygua oho okaru ha hoy’u hag̃ua, ha ome’ẽ avei hi’upyrãgui oguereko’ỹvape ha ovy’aite hikuái oikuaámagui pe ñe’ẽ oñembo’eva’ekue ichupekuéra.
13Ha iko’ẽvo oñombyaty ogaguasu ruvichakuéra, opaite tetãyguakuéra, pa’ikuéra ha Leviguakuéra, pe kuatia haihára Ésdras ndive, oikuaa porãve hag̃ua mba’épa he’ise umi tembiapoukapykuéra.
14Upéramo ojohu hikuái Ñanderuete rembiapoukapykuérape, Moises po ohaiva’ekue, Israelguakuéra oikova’erã óga yvyrarogue guýpe pe jasy 7-hápe, areteguasu jave.
15Upévare oikuaauka hikuái ha oñemoherakuã opaite tavakuéra ha Jerusalen rupi, ha he’i: Pesẽ joa ka’aguy rehe, yvyrarakã rekávo ha pegueru olívorakã, pe olívo saite rakã, ha arrayan rakã, karanda’y ha opaichagua yvyrarakã ikuarahy’ã porãva guive, ojejapo hag̃ua hoga’ikuéra (ráncho), ojehai háicha Moises kuatiañe’ẽme.
16Ha hetãyguakuéra osẽ ha ogueru joaite yvyrarakãnguéra ha ojapo hikuái hoga’i, peteĩteĩva hóga ape ári, térã ikorapykuérape, térã Ñanderuete róga korapýpe, térã pe y rokẽ megua okárape (plázape), térã pe Efrain rokẽ megua okárape.
17Ha pe atyguasu ou jevyva’ekue guive jepokuahágui ojapo joaite hoga’i ha oiko joaite hikuái ipype, Josue, Nun ra’y, ára guive ko ára kóva peve ndojejapovéi peichagua arete Israel retãme. Ha oĩ vy’aguasuetéva.
18Ha Ésdras ko’ẽ ko’ẽ rehe omoñe’ẽ Moises rembiapoukapykuéra oñepyrũha ára guive ka’arupytũ meve; ha omboareteguasu hikuái 7 ára pukukue, ha pe ára 8-hápe oiko atyguasu, ojejapóva hekoitépe.
Who We AreWhat We EelieveWhat We Do
2025 by iamachristian.org,Inc All rights reserved.
