1Péicha he’i Ñanderuete: Ema’ẽ porãke, Che amopu’ãta peteĩ yvytu hatãva ha peteĩ pytu vai ohundi hag̃ua Babilónia retãme, ha umi ipype oikóvape.
2Che amondóta Babilóniape umi tetã ambueygua omongora hag̃ua itavaguasu, ha’ekuéra oipejuva’erã ha ombovevava’erã ichupe ku trígo mono’õhára ojapo háicha, ha oñemongorapa jave itáva ohasa asyetereíta.
3Umi hu’y mombohára oipyso reíta iguyrapa ha omonde reíta hete mo’ãha; hesekuéra ija’e’ỹva ndoiporiahuverekomo’ãi imitãrusukuérape ha ohundipaitéta Babilónia soldádo atykuérape.
4Caldeaygua re’õnguekuéra oñemosarambíta hetãme, ha ijyvyra puku akua oikutúva ho’a reíta hapekuéra rehe.
5Ñanderuete, yvága atykuéra jára, Israel ha Juda Jára, ndopoíri hetãgui opyta hag̃ua ku kuña imenave’ỹvaicha, hetãyguakuéra oñemohenyhẽmba ramojepe hembiapo vaígui.
6Pekañy Babilónia retãgui, pesalva hag̃ua pende rekove, ani pemanótei avei hembiapo vaikue rupi, og̃uahẽmagui pe ára Ñanderuete ohepyme’ẽ hag̃ua hembiapo vaikue Babilóniape.
7Babilónia oiko Ñanderuete pópe, peteĩ váso oroguiguáva ramo omonga’uva’ekue opaite tetãnguérape; tetãnguéra ho’u ivíno; upévagui itarovapa hikuái.
8Sapy’aitépe Babilónia ho’a ha oñepehe’ãmba, pejahe’o hese, pejapyhy pohã hyakuã porãva ijekutukuépe g̃uarã ha jahecha okueránepa.
9Ñaipohãnóma Babilóniape, ndokuerái katu; japoi ichugui ha peteĩteĩva jaha ñane retãme; hembiapo vaieta og̃uahẽma yvága peve, ha ijehavirarã ohupitýtama ichupekuéra.
10Ñanderuete oguenohẽgui hesakãháme ñande justícia; jaha ha ñamoherakuã Siónpe Ñanderuete, Ñandejára rembiapo.
11Pehãimbe’e pende hu’ykuéra, ha pemyenyhẽ pende hu’y ryru, Ñanderuete omombáygui Média retã ruvichakuéra pytu ohundi hag̃ua Babilóniape hembiapo vaikue rehe ha ombyai haguére Ñanderuete rogaguasu Jerusalénpe.
12Pemopu’ã pende poyviveve Babilónia korapyjere yvatépe, pembohetavéke umi tahachi oñangareko hag̃ua ha pembosako’i ñuhãrã; umi mba’e Ñanderuete ojaposéva Babiloniaygua rehe katuete ojapóta avei.
13Nde Babilónia, reikóva yeta pa’ũme, rembyaty ramojepe hetaiterei mba’erepy, og̃uahẽta katuete avei nde ára paha.
14Ñanderuete oñe’ẽme’ẽ ijehe, he’ívo: Che amyenyhẽma ramojepe ne retã ku tukúicha yvyariguágui, katuete oñehundíta, nderehe ija’e’ỹva sapukái vy’apópe nembopoguývo.
15Ñanderuete voi ojapova’ekue ko yvy ipu’akapa rupi, ha iñarandu rupi omoĩva’ekue ko yvy hendag̃uáme, ha omyasãiva’ekue avei yvagakuéra.
16Ha’e osunu jave yeta hyapu ára rehe, ha yvy apýra pahágui omopu’ã araikuéra; Ha’e voi ojapo umi aravera ama reheve, Ha’e oguenohẽ pe yvytu iñongatuhágui.
17Tetãyguakuéra itavypa ha naiñarandúi; umi ta’ãnga apoha otĩ joáta hembiapokue reheve, ijára gua’u ra’ãnga ningo japu rei, naipytuhẽigui.
18Umíva mba’e reiete ha toryja; ijehaviraha árape oñehundipáta.
19Ndaupéichai Jacóbo Jára; Ha’e voi ningo opaite mba’e apohare, ha Israel retã Jára voi, héra: “Yvága Atykuéra Jára”.
20Nde, Babilónia, reikomava’ekue chéve g̃uarã ku martílloicha, ñorãirõ rembiporu ramo; ha ndérupi ahundíma tetãnguérape ha ambopoguy tetã ruvichakuérape.
21Ndérupi ahundíma kavajukuéra ha hi’ariguápe, ha ndérupi ahundíma carrokuéra ha umi ipype ojupívape.
22Ha ndérupi avei ahundíma kuimba’e ha kuñakuérape, ha ndérupi ahundíma tuja ha mitãrusukuérape, ha ndérupi ahundíma karia’y ha kuñataĩkuérape.
23Ha ndérupi ahundíma avei ovecha rerekua ha ijovecha atykuérape; ndérupi ahundíma kokuépe omba’apóvape ha oñangarekóva hymba gueikuéra rehe, karai ha mburuvichakuérape ahundíma nderupi.
24Ko’ág̃a katu amyengoviáta pende resa renondépe opaite mba’evai Babilóniaygua ojapova’ekue ha mayma Caldeaygua rembiapo vai ojapova’ekue Siónpe, he’i pende Ruete.
25Péina ápe, Che apu’ã nderehe, nde, peteĩ cérro oporohundipava’ekue, he’i pende Ruete, rehundipahaguére tetãnguérape; ko’ág̃a katu Che aipysóta che po nderehe, ha rombyapajeréita cerrorusu guive, ha ndehegui ajapóta peteĩ cérro okaipáva.
26Avave ndojapyhymo’ãi ndehegui ita omopu’ã hag̃ua hogarã; opaite ára peve ndetaperétagui, he’i pende Ruete.
27Pemopu’ã poyviveve tetã ryepýpe, pembopu turu tetãnguéra pa’ũme; tetãnguéra peñembosako’i peñemoĩ hag̃ua Babilónia rehe, pembyaty hese umi tetã Ararat, Mini ha Askenaz pegua; ha pemoĩ hi’arikuéra mburuvichakuéra, ha pemondo hendápe kavaju arigua tuku atyguasúicha.
28Pembosako’i umi tetãme oñemoĩ hag̃ua Babilónia rehe, umi Média retã ruvicha, idepartaménto ruvichakuéra, itáva ruvichakuéra ha opaite tetãyguakuéra oĩva guive ipoguýpe toñembosako’ipa.
29Ijyvy oryrýi ha ojepy’apy; ojehútagui katuete opaite mba’e Ñanderuete he’íva guive Babilónia rehe, ombotapere hag̃ua Babilónia retã, ha oikove’ỹ hag̃ua ipype yvyariguakuéra.
30Umi soldádo Babilónia pegua ipy’aguasuvéva noñorãirõsevéi, okañy hikuái itakuápe, ikangypáma hikuái, ojogua hikuái kuñáme, opẽmbáma hóga ñembotyhakuéra ha hogakuéra okaipáma.
31Umi ñe’ẽreraha oñani pya’ete ohupity peve iñirũme, ha’ekuéra ombohasa hag̃ua Babilónia retã ruvichápe pe marandu itáva oparupiete ojeikemaha.
32Umi ysyry jehasaha (páso) ho’áma avei hese ija’e’ỹva pópe, ha umi ñemo’ãha renda tatápe ojehapypa, ha umi soldádo ipy’a tarovapa.
33Péicha he’ígui Yvága Atykuéra Jára ha Israel Jára: Babilónia retã ha’eténte peteĩ ñemitỹngueha oñemopotĩ hag̃uáicha trígo ra’ỹi; og̃uahẽmbotaitégui imono’õha ára.
34Nabucodonosor, Babilónia retã ruvicha, chembotarova ha chemokõma he’i Jerusalen, ha chereja ku kambuchi nandi veráicha; chemokõ ku tejujaguáicha, omyenyhẽ hye che rembi’u hevévagui, ha chemombo okápe.
35Sidongua te’i: Babilónia ári to’a jejahéi ojejapova’ekue che ha che rete rehe, ha umi Jerusalengua te’i: Che ruguy to’a Caldeayguakuéra ári.
36Upévare pende Ruete he’i: Ema’ẽ porãke, Che añorãirõta nderehe, amyengovia hag̃ua hembiapo vai; amokãta hi’yguasu ha ambohypáta hi’yvukuéra.
37Ha Babilóniagui oikóta tapere, jagua saite raity, ha ñeporomongyhyjeha ha toryjárõ, avave oiko’ỹ hag̃ua ipype.
38Okororõta hikuái leõicha; leõra’ýicha ochiã joáta.
39Okaruseiterei jave Che amoĩta ichupekuéra ikaruguasurã, ha amonga’upáta ovy’a hag̃ua hikuái, oke hag̃ua opayve’ỹre, he’i pende Ruete.
40Upéi arahaukáta ichupekuéra ojejuka hag̃uáme, ojejuka háicha kavara ha ovecha mácho ita’yrarusu reheve.
41Mba’eichaitépa Babilónia ho’a ambue tetã poguýpe, ha ojepe’a hetã rerakuã porã. Mba’eichaitépa Babilóniagui oiko mba’e oporomondýiva tetãnguéra apytépe.
42Pe yguasu ojupi Babilónia ári; hi’y pochy oñu’ãmba.
43Itavakuéra oñembotaperepa, pe yvy ikãmba ha oiko ichugui yvy perõ, ijyvýpe avave oikove’ỹ hag̃ua, ha upérupi ndohasamo’ãvéi tetãyguakuéra ñemoñare.
44Che ahaviráta Baal, ijára gua’úpe, Babilónia retãme, ha aguenohẽta ijurúgui umi omokõmava’ekuépe; tetãnguéra ndouveiva’erã hendápe, ha Babilónia korapyjere yvate ho’apáta.
45Pesẽ ijapyteguikuéra Che retãyguakuéra, peteĩteĩva osalva hag̃ua hekove Ñanderuete pochýgui.
46Ha aníke pendepy’amano, ha ani pekyhyje ñe’ẽ ñemígui oñehendútava pe tetãme; peteĩ áño ou ramo peteĩ ñe’ẽ ñemi, ha ambue áño ambue ñe’ẽñemi; oiko hag̃ua ñorãirõ ko yvy apére ha umi oisãmbyhýva opu’ãta ojuehe.
47Upévagui peikuaa porã, oúta pe ára Che ahundipáta Babilónia pegua jára gua’u ra’ãngakuéra, ha hetã opytáta tĩndyhápe, ha he’õnguekuéra ho’áta ijapytepekuéra.
48Yvagakuéra ha yvy ha opavave oĩva guive ipype opurahéita vy’apópe ohechávo umi mba’e ojehúva Babilóniape; oúta nórteguio imbyaiharã, he’i pende Ruete.
49Babilónia ho’ava’erã umi Israel retãygua rupi, ho’a haguéicha heta tetã Babilónia rupi.
50Peẽ pekañyva’ekue kyse pukúgui, tapeho, ani pepyta pyta; peñemomandu’áke Ñanderuete ha Jerusalen rehe.
51Rotĩeterei rohendúvo ñe’ẽ oremotĩva; py’atarova oñu’ã ore rova, oúgui tetã ambueygua Ñanderuete rogaguasúpe.
52Upévagui ema’ẽ porã, outahína pe ára, he’i pende Ruete, Che ahunditaha ijára gua’u ra’ãngakuéra, ha hetã tuichakue javeve ipyahẽta umi ojekutúmava.
53Babilónia ojupi ramojepe yvága peve, ha omopu’ã yvateiterei ramojepe hóga oñemombaretepyréva, Che voi amboúta hi’ári imbyaihararã oitypa hag̃ua, he’i pende Ruete.
54Oñehendu sapukaiguasu Babilóniagui, ha jepy’apy asy Caldeayguakuéra oñanduhína.
55Ñanderuete ombotapere Babilóniape, ha ohundi ichupe sapukaiguasúpe hese ija’e’ỹva oñemoĩ Babilónia rehe ku yguasu oñemopu’ã háicha hyapu tuichaiterei jave.
56Babilónia ñehundiha ára og̃uahẽma ojapyhy hag̃ua ipy’aguasúvape, iguyrapa opẽmbáma, Ñanderuete katuete omyengoviahína yvyarigua rembiapo, Ha’e voi omyengovia peteĩteĩme hembiapo iporã térã ivai ramo.
57Pende Ruete, Yvága Atykuéra Jára he’i: Amonga’úta imburuvicha ha iñaranduvakuérape, tetã sãmbyhyhára, karaiguasu ha isoldadokuérape, ha okepáta hikuái kéra ijapyra’ỹva ha ndopaymo’ãvéima.
58Péicha he’i Ñanderuete, Yvága Atykuéra Jára: Pe Babilónia korapy jere yvate ha ipyetéva ojeitypaitéta, ha hokẽ ijyvatetéva tatápe ojehapypáta; reiete omba’apomava’ekue umi tetãygua, ha pe tetãguasuete oñemokane’õ tatápe g̃uarãnte.
59Ko ñe’ẽ proféta Jeremías oguerahaukava’ekue Seraíaspe, Nerías ra’y, Maasías ra’yre, ha’e oho ramoguare Sedequías, Juda retã ruvicha ndive Babilóniape, ha’e oisãmbyhy aja irundyha áñope. Seraías omoirũ tetã ruvicha Sedequíaspe iviájepe, hembiguaiguasu ramo.
60Ha Jeremías ohai peteĩ kuatiañe’ẽme opaite mba’evai og̃uahẽtava Babilónia távape; opaite mba’evai ojehútava Babilóniape ohai paite ko kuatiañe’ẽ kóvape.
61Ha Jeremías he’iuka Seraíaspe: Reg̃uahẽ vove Babilóniape emoñe’ẽmba ko kuatiañe’ẽ kóva.
62Upéi eréta: Nde, ore Ruete, eremava’ekue rehunditaha ko yvy kóvape, ndaiporivéi peve ipype oikóva, taha’e kuimba’e, kuña térã tymba, itapere hag̃ua opaite árape.
63Ha remoñe’ẽmbávo ko kuatiañe’ẽ kóva, reñapytĩta hese peteĩ ita, ha eity ysyry Éufratespe,
64ha eréta: Péicha ho’yguýta Babilónia, ha nopu’ãmo’ãvéi umi mba’evai rupi, Che voi aguerútava hi’ári, ha ipy’amanóta hikuái. Ko’ápe Jeremías ñe’ẽngue opa.
Who We AreWhat We EelieveWhat We Do
2025 by iamachristian.org,Inc All rights reserved.
